Որդեգրում են նաև 18–30 տարեկանները. «Փաստ»

«Փաստ» օրաթերթը գրում է.

Ըստ ՀՀ աշխատանքի և սոցիալական հարցերի նախարարության ամփոփ տեղեկատվության, 2018թ. հունվար–հունիսին կենտրոնացված հաշվառման վերցված որդեգրման ենթակա երեխաների թվաքանակը կազմել է 53, որոնց 56.6%–ը կամ 30–ը աղջիկներ են: 53–ից 14–ը մինչև վեց ամսական են, 14–ը՝ 6–12 ամսական: Որդեգրման ենթակա են նաև 10–15 և 15–18 տարեկան երեխաներ, համապատասխանաբար՝ 11 և 6: Ընդ որում, 10–15 տարեկան որդեգրման ենթակա երեխաների ճնշող մեծամասնությունը՝ 8–ը, կրկին աղջիկներ են:

Համաձայն վիճակագրության, այս տարի որդեգրման ենթակա երեխաներից 11–ը ունեն երկու ծնող, 7–ը միայնակ մոր երեխա են, 5–ը մնացել են առանց ծնողական խնամքի, իսկ 25–ի դեպքում ծնողները զրկվել են ծնողական իրավունքից:

Շուտով նոր ընտանիքի անդամ դարձող 53 երեխաներից 35–ը հաշվառված են մայրաքաղաքում, այնուհետև որդեգրման պատկերն ըստ մարզերի հետևյալ տեսքն ունի՝ 6–ական Շիրակի և Լոռու մարզերում, 1–ական Արմավիրի և Կոտայքի, ինչպես նաև 4 երեխա էլ հաշվառված է Գեղարքունիքի մարզում:

53 երեխաներից 19–ը առողջ են, 34–ն ունեն առողջական խնդիրներ, որից 12–ը՝ հաշմանդամություն: Ի դեպ, որդեգրման ենթակա հաշմանդամ երեխաների մեծ մասը 10–18 տարեկան է:

Կենտրոնացված հաշվառման վերցված որդեգրողի թեկնածուների թվաքանակն այս պահին կազմում է 106, որից 62–ը կանայք են: Ընդ որում, ամբողջ թվից 69–ը Հայաստանում բնակվող ՀՀ քաղաքացիներ են, մեկը Հայաստանում բնակվող օտարերկրյա քաղաքացի է, իսկ 36–ն էլ արտերկրում բնակվող օտարերկրյա քաղաքացիներ: 

Որդեգրման պատրաստ ապագա ծնողներից երկուսը բավական երիտասարդ են՝ 18–30 տարեկան, 35–ը՝ 30–65 տարեկան, իսկ մեկն էլ 65 տարեկանից բարձր տարիք ունի:

Շարունակությունը՝ «Փաստ» օրաթերթի այսօրվա համարում