«Պետք են իրական, այլ ոչ թե ձևական կոալիցիաներ, որտեղ խանդը սիրուց ուժեղ է». «Փաստ»

«Փաստ» օրաթերթը գրում է.

«Փաստ» օրաթերթի հարցերին է պատասխանում «Օրինաց երկիր» կուսակցության նախագահ Արթուր Բաղդասարյանը:

–Վերջին հարցազրույցներից մեկում նշել եք, որ արտահերթ խորհրդարանական ընտրություններում հավակնում եք 49+1 տոկոս ձայն ստանալ: Ունե՞ք նման վարկանիշ:

Այո, որովհետև վարկանիշը գործունեոթյամբ է ձևավորվում: Մենք բազմիցս ապացուցել ենք մեր մրցունակությունը: Շատ են ասել, թե չենք հավաքի 5 տոկոսի շեմը: Ասում էին, որ 3 տոկոս էլ չեմ հավաքի, երբ նախագահի թեկնածու էի: Բայց տեսա՞ք` որքան հավաքեցի: Մենք խոսում ենք մեծ հավակնությունների մասին, որովհետև Հայաստանում տեղի է ունեցել լուսավոր փոփոխություն: Ժողովուրդն ասում է` Նիկոլի թիվն է, բայց նաև գրագետ, փորձառու մարդկանց թիվն է: Մենք ներկայացնելու ենք մրցունակ գաղափարներ: Հայաստանում այլևս չեն լինի փողի, ընտրակաշառքի, վարչական ճնշումների ընտրություններ: Վերջին ընտրություններում ՕԵԿ–ն ավելի շատ ձայն հավաքեց, քան մյուս արտախորհրդարանական ուժերը: Մեզ մի քանի հազար ձայն չհերիքեց, որ հայտնվենք խորհրդարանում: Դրա մեջ սարսափելի բան չեմ տեսնոմ, որովհետև նույն կուսակցությունը Գյումրի և Վանաձոր քաղաքներում 2016թ. հոկտեմբերին հավաքեց 22–24 տոկոս քվե, իսկ ընդամենը մի քանի ամիս անց` 2017թ. ապրիլին, 5 տոկոս, ըստ որում՝ նույն Գյումրի և Վանաձոր քաղաքներում: Դա լայնածավալ փողաբաժանման հետևանք էր: Ինչո՞ւ 49+1, որովհետև մենք կողմ ենք բազմաբևեռ իշխանությանը, ոչ թե քաղաքական մենաշնորհին: Հանրապետականն ուներ քաղաքական մենաշնորհ, պտուղները տեսանք: Քաղաքական մենաշնորհը բերում է տնտեսական մենաշնորհի: 

Պետք են իրական, այլ ոչ թե ձևական կոալիցիաներ, որտեղ խանդը սիրուց ուժեղ է:

– Ձեր հարցազրույցները նման են դեժավյուի: Միշտ լրագրողները կրկնում են 2008 թվականի քաղաքական իրավիճակի մասին հարցը: Ինչո՞ւ Ձեզ չի հաջողվում դուրս գալ այդ շրջանակից: Գուցե Ձեր պատասխաններն ու փաստարկներն անհամոզի՞չ են:

–2008 –ին ես եղել եմ թե՛ Սերժ Սարգսյանի, թե՛ Լևոն Տեր–Պետրոսյանի թիրախում: Իմ դեմ իրականացվել է լայնածավալ հակաքարոզչություն: Շատ է շահարկվել այդ հարցը: Ես իմ ելույթներում բազմիցս ասել եմ, որ մարտի 1–ը պետք է բացահայտել: Այդ ժամանակ մարդկանց մտածողության մեջ տեղի կունենա բովանդակային փոփոխություն: Երբ մարդուն մատուցում ես կեղծ լուր, որը հետո չի հերքվում, դա չի կարող դրական եզրահանգումների բերել: Ես կարծում եմ, որ այս հեղափոխությունը թույլ կտա մարտի 1–ը և շատ այլ քրեական այլանդակություններ բացահայտել: Այդ շրջանի մասին շատ եմ խոսել: Բայց դարձյալ ստեր են գրում, թե ես փետրվարի 29–ին դարձա Անվտանգության խորհրդի քարտուղար: Ես մայիսի 4–ին եմ նշանակվել:

– Ի՞նչ կապ ունի նշանակման օրը: Մինչ այդ եղել է կոալիցիոն հուշագրի ստորագրումը, շամպայն խմելը, երբ հայտարարեցիք, որ սեղմում եք Ձեզ մեկնած ձեռքը: 

Շատ կարևոր է, որովհետև նշանակման հետ կապեցին մարտի 1–ը: 10 տարի է անցել, բայց ես շարունակում եմ մնալ ամենաքննարկված անձանցից մեկը: Հիշեցնեմ, որ 2008 –ի փետրվարի 26–ին զորքը շրջապատել էր Երևանը: Բախման վտանգն արդեն կար: Բայց, եթե ես սխալ եմ արել կամ իմ արածը սխալ է հասկացվել, դրա մեջ վատ բան չկա: Իսկ ո՞վ չի սխալվում: Անգամ Չերչիլն է սխալվել: Ես այնպիսի սխալ չեմ արել, որ մարդու քթից արյուն գա: Իմ ստորագրած հուշագրի նպատակն է եղել, որ ավելի քիչ մարդ հավաքվի, ավելի քիչ զոհեր լինեն: 

– 2006–ին և 2014–ին, դուրս գալով կոալիցիայից, դուք հիմնավորում էիք, որ չի հաջողվում լուծել շատ հարցեր ՕԵԿ–ի ունեցած ռեսուրսներով: 6 տարի՞ էր պետք, որ դա հասկանաք:

–2003–ին դարձանք երկրորդ ուժը խորհրդարանում` ունենալով 20 պատգամավոր: Հնարավոր չէր առանց մեզ իրական իշխանություն ձևավորել: Կազմեցինք կոալիցիա, հետո, ունենալով հրապարակային տարաձայնություններ Ռոբերտ Քոչարյանի հետ, դուրս եկանք: Անցանք քաղաքական, քրեական հետապնդումների ծանր փուլ: 2008 –ին նորից մտանք կոալիցիա: Ամբողջ աշխարհում ընդունված է, որ մի ուժ կարող է ութ անգամ մտնել կոալիցիա և դուրս գալ: Դա նաև ընտրությունների արդյունքներով է պայմանավորված: 6 տարին որևէ նշանակություն չունի: Այդ տարիներին մենք հեղինակել ենք շուրջ 250 օրենք: Վերադարձվել են ավանդները, ծննդօգնությունը դարձել է անվճար, արգելվել է դպրոցների,մանկապարտեզների, մշակութային օջախների սեփականաշնորհումը: Բայց ունեցանք նաև Սերժ Սարգսյանի հետ տարաձայնություն` կապված վարչապետի նշանակման, կուտակային համակարգի, սահմանադրական փոփոխությունների հետ, Հանրապետական կուսակցությունը նորից ապագայում գերակա ուժ դարձնելու Սերժ Սարգսյանի մոտեցման հետ: Այդ ժամանակ իրական կոալիցիա չկար: Մի մարդ էր ամեն ինչ որոշում: Սակայն մենք ներսից պայքարել ենք: 

– Դուք երբեմն քննադատում էիք կառավարությանը, օրինակ` 2012–ի նախընտրական ժամանակաշրջանում, երբ դեռ կոալիցիայում էիք: Բայց մնացիք Տիգրան Սարգսյանի կառավարությունում մինչև «հաղթական ավարտ»: Ինչո՞ւ: 

–Խնդիրը մինչև Տիգրան Սարգսյանի գնալը կամ չգնալը չէր: Քանի որ ես հարցազրույց եմ տալիս «Փաստ» օրաթերթին, եկեք խոսենք փաստերով: Ես և իմ խմբակցությունը, լինելով կոալիցիայում, բազմիցս քննադատել ենք կառավարությանն ու անձամբ Տիգրան Սարգսյանին: Այնպես չէ, որ նա գնաց, իսկ մենք որոշեցինք դուրս գալ: Նախորդ հարցին պատասխանելիս թվարկեցի այն տարաձայնությունները, որոնք մենք ունեցել ենք իշխանության հետ: Եկավ իշխանության ձևավորման նոր փուլ: Մենք, տեսնելով, որ մեր կարծիքները հաշվի չեն առնվում, չմասնակցեցինք այդ փուլին: 

– Դուք սիրում եք կրկնել, որ ՕԵԿ–ը կապ չունի այս երկրում ոչ՛ արյան հետ, ոչ՛ թալանի հետ: Սա ինչ–որ քաղաքական ուժի հասցեին ակնա՞րկ է: Արդյոք նստե՞լ եք աշխատանքային սեղանի շուրջ նշված երևույթների հետ կապ ունեցող մարդկանց հետ: 

–Մենք հիմա էլ կրկնում ենք նույնը, որ այս երկրում մենք ո՛չ արյունի, ո՛չ թալանի հետ ոչ մի կապ չունենք: Նախկինում դա հնարավոր չէր անել և պարզել` ովքեր ինչեր են արել և ունեցել, հիմա դա հնարավոր է: Մենք առաջին ուժն էինք, որ պաշտպանեցինք այս հեղափոխությունը: Այն հնարավորություն կտա լույս սփռել բազմաթիվ մութ էջերի վրա: