Ազատ Արշակյան. «Կառավարությանը հեղկոմ եմ համարում, իսկ Նիկոլ Փաշինյանը հիմա հեղկոմի ղեկավարն է». «Փաստ»

«Փաստ» օրաթերթը գրում է.

Հակահեղափոխության վտանգ երկրի ներսում չկա, դրսից ևս նշաններ չկան: Խոսելով ներքաղաքական իրավիճակի մասին` «Փաստ»–ի հետ զրույցում նման տեսակետ հայտնեց Գերագույն խորհրդի նախկին պատգամավոր Ազատ Արշակյանը:

«Արտաքին ուժերը հատուկ նշաններ չեն տալիս, ըստ որի` կարող ենք ասել, թե ՀՀ– ում ուզում են վերականգնել ճորտատիրությունը, «եվրասիականությունը» և հետադիմությունը: Հակահեղափոխություն չի սպառնում, այլ բան է, որ հարկավոր է արմատախիլ անել այն: Հակահեղափոխության դրածոները Հայաստանում զրկվում են ռեսուրսներից` մենք հեղափոխության այդ փուլում ենք: ՀՀԿ բռնապետության յուրաքանչյուր մասնակցի իր արարքի համար համապատասխան իրավական պրոցեսով, առանձին–առանձին պետք է «գնահատել»: Ցածր, միջին և բարձր օղակների բոլոր այն ներկայացուցիչները, որոնք հայ ժողովրդից խլել են ինքնիշխանությունը, պետք  է պատժվեն: Հայ ժողովուրդը 2 միլիոն 40 հազար ձայնով կողմ քվեարկեց անկախությանը, ընտրեց դեմոկրատիան, ազատությունը: Բայց նրանից այդ բոլորը խլել էին: Քաղաքական ազատության, ժողովրդավարության գողերին հարկավոր է հայտնաբերել և պատժել: Բոլոր նրանք, ովքեր դավաճանել են մեր ժողովրդին, դեմ են գնացել մեր երկրի ամրապնդմանը, զարգացմանը, պետք է ոչ միայն հեռացվեն իշխանությունից, այլ ստանան իրենց արժանի պատիժը. ամենաբարձրից` նախագահներից սկսած, մինչև զինվորականներ, հարկահավաքներ, ճարտարապետներ, ովքեր ոչնչացրել են կանաչապատ տարածքները և մանկական հրապարակները քանդելու որոշումների տակ են ստորագրել»,–ասաց Ազատ Արշակյանը: 

Վերջինիս բավարարում են ԱԱԾ գործողությունները: 

«Մենք մինչև հիմա ունեցել ենք КГБ` КГБ–ի ժառանգ: Հիմա ունենք ԱԱԾ, որովհետև ԱԱԾ–ն իրավամբ զբաղվում է անվտանգության խնդիրներով: Հնարավոր է, որ ինչ– որ հարցերում շատ ավելի լավ կարող էին իրականացնել լուծումները, չգիտեմ, բայց հիմա աշխատանքը բավարարում է: Այդ մարտավարությունը պետք է մինչև վերջին դավաճանը, մինչև վերջին թալանչին շարունակվի: Անկախության, ժողովրդավարության, բարեկեցության հակառակորդները պետք է իմանան, որ պատիժն անդառնալի է»,–նշեց նա: 

Ազատ Արշակյանի խոսքով, որպեսզի նախկին իշխանությունների սխալները չկրկնվեն, հարկավոր է Հայաստանը ժողովրդավարական ու մրցակցային պահել. «Հարկավոր է նաև հաշվետու և պատասխանատու իշխանություն: Եթե ժողովրդավարություն լինի, որևէ իշխանություն չի կարող անել այն, ինչ արեցին նախորդները: Նախորդների սխալների պատճառը ժողովրդավարության պակասն էր, ինչի հետևանքով իշխանությունը զավթված էր»:

Ինչ վերաբերում է կառավարության գործունեությանը, Գերագույն խորհրդի նախկին պատգամավորն ընդգծեց. «Այս կառավարությանը հեղկոմ եմ համարում, այսինքն` հեղափոխական կոմիտե: Ժամանակավոր կառավարություն է` հեղկոմ, որը դեռևս ձևավորում է ժողովրդավարական իշխանություն: Կառավարությունն այժմ ավելի շատ զբաղված է հակահեղափոխությունը վերացնելով, Հայաստանը մաքրելով ու ընտրություններին նախապատրաստելով: Հեղկոմի մասին լավ կարծիք ունեմ: Կարծում եմ` ազատ, մրցակցային, արդար ու թափանցիկ ընտրություններ կկազմակերպեն: Նիկոլ Փաշինյանը հիմա հեղկոմի ղեկավարն է և ոչ թե վարչապետը: Հենց իր կուսակցությունը մեծամասնություն ունենա ԱԺ–ում, նա նշանակվի վարչապետ և ձևավորի իր կառավարությունը, ես կհամարեմ, որ արժանի է, և հեղափոխականները կարող են նաև կառավարություն դառնալ: Դառնալ օրինական և արդար իշխանություն»: