Գերմանական «կազմակերպվածություն». «Փաստ»

«Փաստ» օրաթերթը գրում է.

Ներողություն, որ պիտի մի քիչ հեռանանք ԱԱԾ–ական ու ոստիկանական թոփ թեմայից: Ինչպես ասում են՝ բացահայտումներդ ֆուտբոլով կտրենք, առավել ևս, որ այս օրերին Աշխարհի առաջնությունն է ընթացքի մեջ: Ընդունեք, որ չորս տարին մեկ տեղի ունեցող այս իրադարձությունը երբեք այսքան երկրորդված չի եղել, որքան այս օրերին: Դե, հասկանալի է՝ ինչ պատճառներով: Բայց շատ ավելի զարմանալի է, որ նույնիսկ Աշխարհի առաջնության մասին չէ խոսքներս, այլ ներհայաստանյան ֆուտբոլային իրադարձության, որը շատ ավելի քաղաքական է, քան մարզական: Դե, քաղաքական, քանի որ հաճախ մեր երկրում քաղաքականությունը ձևավորվում է անձնային հարաբերությունների մակարդակում: Իսկ այս դեպքում առաջին հերթին հենց անձնային հարաբերություններն էին «գլխավոր դերում»: Իշխանափոխության, ապա և աածամոլության ֆոնին գրեթե աննկատ մնաց «Շիրակ» ֆուտբոլային ակումբի փաստացի լուծարումը: Ակումբ, որը լուրջ ավանդույթներ և պատմություն ունի, որն անցած մրցաշրջանում կարող էր չեմպիոն դառնալ, եթե գերմանական կազմակերպվածությամբ նրանից չխլվեր այդ տիտղոսը: Ժամանակը ցույց կտա՝ որքանով էր արդար ֆուտբոլի ֆեդերացիան՝ իր նման քայլով, կամ որքանով էր ֆուտբոլասերների առջև ազնիվ Արման Սահակյանը՝ ակումբը առաջնությունից հանելով ու, ըստ էության, լուծարելով: Բայց փաստ է, որ հայկական ֆուտբոլին հերթական հարվածը հասավ՝ ներհհկական կոնֆլիկտի պատճառով, սոսկ անձնական թշնամական հարաբերությունների պատճառով: Հենց նման հարաբերություններն են որոշել ՀՀԿ–ական Հայաստանում ոչ միայն քաղաքական, այլև մարզական, մշակութային, կրթական ու մնացյալ բոլոր ոլորտների զարգացման, ավելի ստույգ՝ հետընթացի տեմպերը:

Իսկ ֆուտբոլի ֆեդերացիան այս բոլոր տարիների ընթացքում, անպատժելիության մթնոլորտում, անփոխարինելիության զգացման սարդոստայնում ուղղակի տապալել է այս մարզաձևը մեր երկրում, ուղղակի կործանել է ֆուտբոլային մի ամբողջ սերունդ, ինչի արդյունքում, Աստված գիտե, թե ևս քանի տարի պետք կլինի ուշքի գալու համար: Այսինքն, ֆուտբոլի ֆեդերացիան ոչ միայն ոչնչով չի տարբերվել մյուս ոլորտներից, այլև ձախողման առումով առաջամարտիկներից է եղել: Այնպես որ, հարգելի նոր իշխանություններ, հենց մի քիչ պարապ մնաք, այս ոլորտով էլ մի հատ զբաղվեք, խնդրում ենք: Տեսնում եք, չէ՞, ի վերջո, չկարողացանք շրջանցել սկզբում նշված թեմաները...