Նախկինում Սաշիկով, հիմա էլ ԱԱԾ–ով են սպառնում. «Փաստ»

ОБЩЕСТВО 13 Июнь, 2018 7:50

«Փաստ» օրաթերթը գրում է.

Պարզվում է, որ ինքնիրավչությունը Հայաստանում բավականին տարածված հիվանդություն է: Ու եթե նախկինում նման հակումներ ունեցողները վազում էին «սաշիկների» դռները, հետո ասլան կտրած հետ վերադառնում ու սկսում «տերիտորիա» ու բիզնես իրար մեջ կիսել, հիմա այս կարգի «դաբրոների» ժամանակներն անցել են, բայց նման ոճին սովոր մարդիկ այս կամ այն բիզնես–հավակնությունները բավարարելու համար սկսել են մարդկանց ԱԱԾ–ով «վախեցնել»:

«Փաստի» խմբագրություն ահազանգած քաղաքացին, ով մարզերից մեկում տաքսի ծառայություն ունի, արդեն տևական ժամանակ է՝ հայտնվել է մեզ Հարություն ներկայացած անձի «տեսադաշտում», ով ոչ միայն զանգահարում է ծառայություն՝ ճշտելու, թե այսինչ տեղից այնինչ տեղ հասնելը որքան գումար կկազմի, այլև հարց ու փորձ անելու աշխատանքի օրինական թույլտվության, վճարվող հարկերի և իրեն չվերաբերող այլ հարցերի մասին՝ սպառնալով, որ եթե իրեն նման տեղեկություն չտրամադրեն, ապա ինքը ԱԱԾ կդիմի:

Կարճ ասած, եթե նախկինում նման ճարպիկները իրենց քրտինքով աշխատողներին փորձում էին սաշիկներով, վաչիկներով կամ այլ անձերով վախեցնել ու ճնշում գործադրել, հիմա, երբ այդ էջը փակված է, փորձում են սեփական սցենարով նույն «տիտղոսին» արժանանալ: Նրանք մոռացել են, որ ոչ միայն «դաբրոյի» ինստիտուտը չկա, այլև չկա նաև այսինչի մարդ, այնինչի մոտիկ, սանիկ, քեռու տղա կատեգորիա: Բայց, ստացվում է, որ ժամանակի ճեպընթացից դուրս մնացածներից ոմանք հիմա էլ որոշել են թափուր մնացած տեղը զբաղեցնել և մարդկանց ԱԱԾ–ով «վախեցնել»: Նրանք հավանաբար մոռացել են, որ աշխատող մարդուն ԱԱԾ–ով վախեցնել չեն կարող, քանի որ այդ կառույցը բավականին «լավ գիտի», թե ով ինչ է շնչում:

Ի դեպ, մեզ հետ զրույցում Հարություն ներկայացած անձնավորությունը հերքեց, որ իր հեռախոսից կարող է այլ անձ զանգահարած լինել: Հերքեց նաև, որ ինքն է զանգահարել տաքսի ծառայություններ: Բայց ասաց, որ ինքը, իբր ընդամենը տաքսու վարորդ է, ով իր սեփական մեքենայով ծառայություններ է մատուցում, բայց միայն շրջաններում է տաքսի վարում: Ավելացնենք, որ ընդամենը վայրկյանների հարց է պարզելը, թե տվյալ հեռախոսահամարից հիշյալ ծառայության հեռախոսահամարին զանգ եղե՞լ է, թե՞ ոչ: Եվ պարզ է, չէ՞, որ շանտաժ, ինքնիրավչություն իրականացնելու և այլ արարքների համար ով ավելի շուտ կարող էր հայտնվել իրավապահների ուշադրության կենտրոնում: Բայց խնդիրը դա չէ, այլ բարձրաձայնելը, որ հիմա էլ նման ճարպիկներն են սկսել սեփական բախտը փորձել ու մարդկանց ահաբեկելով զբաղվել՝ հույսով, թե՝ կարող է մի բան էլ իրենց «կպնի» ու իրենք էլ մի բանի «տեր» դառնան:

Իսկ մենք ո՛չ միայն զգուշացնում ենք, այլ նաև իրազեկում, որ ինչպես ժողովուրդն է ասում, նման մարդկանց սուտը բացահայտելն ամենաշատը 40 օր կարող է տևել, ուստի սրան–նրան ԱԱԾ–ով ահաբեկելու և ավելորդ հեքիաթներ հորինելու փոխարեն, լավ կլինի, որ ամեն մարդ չփորձի մյուսի ոտքի տակ ընկնել, քանի որ ինքը շատ արագ կհայտնվի իր լարած թակարդում:

Հ. Գ. Մենք չենք հրապարակում տվյալ անձի հեռախոսահամարը՝ պահպանելով անձնական տվյալների գաղտնիության սկզբունքը: Սակայն, եթե իրավապահներին հետաքրքրի այս հարցը, կարող ենք տրամադրել:

Շարունակությունը՝ «Փաստ» օրաթերթի այսօրվա համարում