Համաշխարհային մամուլը Ադրբեջանի ընտրությունների մասին

Աշխարհի առաջատար մամուլը շարունակում է անդրադառնալ Ադրբեջանում նոյեմբերի 1-ին անցկացված խայտառակ խորհրդարանական ընտրությունների` իշխանությունների կողմից կեղծված լինելու փաստերին, Ադրբեջանում տիրող ավտորիտար կառավարմանը, բռնաճնշումներին:

 Ֆրանսիայի հեղինակավոր Le Figaro թերթն իր` «Ադրբեջանում ընտրություն է. իշխանությունը հաղթեց» վերնագրով հոդվածում նշել է, որ «Ալիեւի ռեժիմը հերթական անգամ ժողովրդից խլեց իշխանությունը»:

Թերթը գրում է, որ չնայած ընտրությունները միջազգային չափանիշներին համապատասխան անցնելու մասին  իշխանությունների հավաստիացումներին, ընդդիմադիր եւ ժողովրդավար ուժերի «Ազգային խորհուրդ» միավորումը, «Մուսավաթ» կուսակցությունը եւ բազմաթիվ ոչ կառավարական կազմակերպություններ հայտարարել են ընտրություններն ամբողջությամբ կեղծված լինելու մասին:

«Սա իշխանության բացահայտ առգրավում է: Ալիեւի ռեժիմը հերթական անգամ ժողովրդից խլեց իշխանությունը», -»Ազգային խորհուրդ»-ի հայտարարությունից մեջբերում է կատարել թերթը` նշելով, որ «Հանրապետական այլընտրանք» (REAL) շարժումը հայտարարել է ընտրությունների արդյունքները չճանաչելու մասին:

 «Ալ Ջազիրա» հեռուստաալիքը հայտնել է, որ միջազգային հանրությունը կասկածի տակ է առնում Ադրբեջանում անցկացված խորհրդարանական ընտրությունները, քանի որ ավտորիտար Ադրբեջանում դա ընտրությունների նմանակում էր:

«Նախագահ Ալիեւի գլխավորած «Ենի Ազերբայջան» կուսակցությունը հաղթանակել է ընտրություններն ընդիմության կողմից բոյկոտվելու պայմանում: Միջազգային իրավապաշտպան կազմակերպությունները կասկածի տակ են առնում ընտրությունների արդյունքները: Նրանք իշխանություններին մեղադրում են շինծու մեղադրանքներով իրենց մրցակիցներին բանտեր նետելու, ընտրական արշավում ընդդիմության հնարավորությունները սահմանափակելու մեջ: 2003 թվականից Ալիեւի իշխանության գալուց հետո այդ երկրում անցկացված ոչ մի ընտրություն միջազգային դիտորդները ազատ եւ արդար չեն գ նահատել», -նշել է արաբական հեռուստաալիքը:

Արտասահմանյան մամուլն ընդգծել է, որ Ադրբեջանի իշխանությունների կողմից արված սահմանափակումների պատճառով ԵԱՀԿ-ը հրաժարվել է դիտորդական առաքելություն ուղարկել այդ ընտրություններին: