Ամուլսարը լակմուս՝ կառավարության համար. «Փաստ»

ИНТЕРВЬЮ 8 Июнь, 2018 9:03

«Փաստ» օրաթերթը գրում է.

Կառավարության պատասխանատուները հայտարարել են, որ մեկ շաբաթվա ընթացքում բնապահպանության և ընդերքի տեսչական մարմինը պետք է դուրս բերվի բնապահպանության նախարարության ենթակայությունից և կառավարությանն առընթեր մարմին դառնա, որի փաստաթղթավորումը կավարտվի 7–10 օրվա ընթացքում: Դրանից հետո ևս 10–15 օր է անհրաժեշտ լինելու Ամուլսարի վերաբերյալ ստուգումներն իրականացնելու համար:

Թեմայի շուրջ «Փաստ»–ը զրուցել է բնապահպան Գագիկ Սուխուդյանի հետ:

– Այն, որ հայտարարությունն արվում է առաջին փոխվարչապետի մակարդակով, հույսեր ներշնչո՞ւմ է, որ Ամուլսարի ծրագի րը կկասեցվի:

–Խիստ կասկածում եմ:

–Ինչո՞ւ:

–Որովհետև այնտեղ կարիք չկա ստուգումներ իրականացնել: Չարաշահումներ չեն լինի, այնտեղ դեռևս շինարարություն է գնում: Հարկավոր է փաստաթղթերը ստուգել, արդյո՞ք ՇՄԱԳ–ը (շրջակա միջավայրի վրա ազդեցության գնահատում) և մյուս փաստաթղթերը բարեխիղճ են արել: Եթե հասնեն այս փաստաթղթերին, ես ուրախ կլինեմ: Իսկ եթե այս կառավարությունն էլ «դաբրո» տա Ամուլսարին, մեծ հիասթափություն կունենան բոլոր բնապահպանները, որովհետև մեզ համար բնապահպանությունը և առաջին հերթին Ամուլսարը՝ Ջերմուկն ու Սևանը, լակմուս է յուրաքանչյուր կառավարության համար: Եթե կառավարությունը կարծում է, որ ինքը բնությունից ավելի հավերժ է և ավելի որոշիչ, և որքան էլ ուզում է մեզ դուր գալ, հավերժական չի կարող լինել, որովհետև առաջին հերթին սա մեր հողն է, մեր հետնորդների՝ մեր թոռների շահերն են և նրանց ապագա բնակավայրը: Այդ 75 տոննա ոսկին ոչ մի բան չարժե Ջերմուկի առողջարանի, Սևանի ջրերի դիմաց: Մի քանի տարի անց աշխարհում ամենաթանկ բանը ջուրն է լինելու:

– Եթե ստուգումները փաստաթղթերին չհասնեն ու Ամուլսարում ոչինչ չհայտնաբերվի, բնապահպանների կողմից հետագա ի՞նչ քայլեր կձեռնարկվեն

Պայքարը կշարունակվի: Բնապահպանների համար նշանակություն չունի, թե ինչ կառավարություն է: Բնապահպանների համար առաջին հերթին իրենց երկիրն է կարևոր: Քաղաքականությունն այնքանով է քաղաքականություն, որ պետք է օգնի բնությանը, նրա մեջքին կանգնի:

–Նախարարությունն այդ փաստաթղթերը չուսումնասիրելու հիմքեր կամ պատճառներ ունի՞ հիմա:

– Իհարկե ունի: Նախորդ նախարարությունը «Լիդիան» ընկերությունից բավական մեծ գումար է ստացել: Կաշառքի մի ձև էր դա, բայց չգիտես ինչու մոռացվեց, մի քանի միլիոն դոլարի մասին էր խոսքը: Ձևակերպվել էր որպես ինչ–որ մի բարեգործական օգնություն:

–Նախկին ղեկավարության այդ գործարքը կարո՞ղ է կաշկանդել նոր նախարարությանը:

–Ինչո՞ւ չի կարող: Այժմյան նախարարը այն ժամանակ էլ փոխնախարար է եղել:

– Միակ արդարացի լուծումը կտրվի այն ժամանակ, երբ նախարարությունը ծանոթանա՞ այդ փաստաթղթերին:

– Հայկական բնապահպանական ճակատը և մյուս ակտիվ բնապահպանները կրկին անկախ փորձագետներին են ուղարկել այդ փորձաքննությունը, ովքեր միանշանակ ասում են, որ «Լիդիանի» փորձաքննությունն ու ՇՄԱԳԸ եղել են ոչ թե թերի, այլ՝ շահագործողի շահերից ելնելով:

Շարունակությունը՝ «Փաստ» օրաթերթի այսօրվա համարում