Շուկան բաց է, ցանկություն չկա՞. «Փաստ»

ОБЩЕСТВО 7 Июнь, 2018 8:37

«Փաստ» օրաթերթը գրում է.

Մայիսի 31–ին հայտնի դարձավ, որ Արցախի Հանրապետության արդեն նախկին պետական նախարար Արայիկ Հարությունյանը ձեռք է բերել պայմանավորվածություն «Ղարաբաղ Տելեկոմ»–ի մենաշնորհի վերացման և սակագների նվազեցման վերաբերյալ: Բացի այդ, Հայաստանում գործող երեք օպերատորներին ուղղված նամակներով առաջարկվել էր գործունեություն ծավալել Արցախի կապի և հեռահաղորդակցության ոլորտում:

«Փաստ»–ը փորձեց նախ պարզել, թե ինչո՞ւ նման նախաձեռնությամբ հանդես եկան հատկապես հայաստանյան իշխանափոխությունից հետո, ի՞նչը կամ ո՞վ էր խանգարում նախկինում նման նախաձեռնությամբ հանդես գալ:

Արցախի պետական նախարարի աշխատակազմի տեղեկատվության և հասարակայնության հետ կապերի բաժնի գլխավոր մասնագետ Էդգար Էլբակյանը, անդրադառնալով հայաստանյան իշխանափոխության և նախաձեռնության համընկման վերաբերյալ դիտարկմանը, նշեց.

«Իրականում Արցախում մինչ այս մի քանի անգամ և՛ հասարակական, և՛ խորհրդարանական մակարդակով մենաշնորհի հարցը բարձրացվել է: Կառավարության կողմից ներկայացվել է, որ դա ամրագրված է պայմանագրով: Միշտ էլ դժգոհություններ, քննարկումներ եղել են: Իսկ թե ինչո՞ւ համընկավ երևանյան իրադարձությունների ու իշխանափոխության հետ, ճիշտ կլինի հարցնել կազմակերպիչներին»:

Նշենք, որ կազմակերպիչները Արցախի «Արևիկ» մանկական բուժմիավորման ակնաբույժներ Տիգրան Պետրոսյանն ու Սևակ Ասլանյանն են, ովքեր օրեր շարունակ հանդես էին եկել «Ղարաբաղ Տելեկոմի» առաջարկած ծառայությունների դեմ հայտարարություններով ու կոչ արել արցախցիներին միանալ իրենց նախաձեռնությանը: Տիգրան Պետրոսյանն իր տեսաուղերձում նշել էր. «Հայաստանյան իրադարձությունների շունչը հասել է Արցախ: Ժողովրդի համբերության բաժակը լցվել է: «Ղարաբաղ Տելեկոմ»–ը մատուցում է անորակ կապ և ինտերնետ, որի դիմաց գանձում է աստղաբաշխական գումարներ: Եկեք միասին քայլ անենք և մերժենք «ՂՏ» մենաշնորհը՝ թալանը»:

Շարունակելով թեման` Էդգար Էլբակյանը մեզ այլ մանրամասներ հայտնեց. «Գոյություն ունի 2001 թվականին կնքված պայմանագիր, որի մի կողմը Արցախի կառավարությունն է, մյուս կողմն էլ` Հայաստանում չգրանցված օտարերկրյա ընկերություն: Ըստ պայմանագրի` այդ ընկերությանը 30 տարի ժամկետով արտոնագիր է տրված` հեռահաղորդակցային համապատասխան ծառայություններ մատուցելու համար` սկսած օնլայն բանկինգից, վերջացրած` հեռախոսակապ, ինտերնետ, տաքսաֆոններ և այլն: Պայմանագրով Արցախի կառավարությունը պարտավորվում է մեկ այլ որևէ ընկերության արտոնագիր չշնորհել, ինչը կարող է մրցակցություն ենթադրել: Ըստ էության, սա էր մենաշնորհի հիմքը` միշտ ասվում էր, որ կա մենաշնորհ, որն ամրագրված է պայմանագրով: Պայմանագիրը հիմա էլ է գործում, այն չի չեղարկվել: Պարզապես Արցախի պետնախարար Արայիկ Հարությունյանի և այդ օտարերկրյա ընկերության ղեկավարի հետ բանավոր բանակցությունների ժամանակ պայմանավորվածություն է ձեռք բերվել, որ հավասար մրցակցային պայմաններով ցանկության դեպքում շուկա կարող են մտնել նաև այլ օպերատորներ: Սա բանավոր պայմանավորվածություն է, որը պարոն Հարությունյանի հավաստմամբ մոտ ապագայում պետք է նաև գրավոր տեսք ստանա: Այսինքն` կարելի է ենթադրել, որ պայմանագրում կարող է ինչ–որ հավելում արվել: Պայմանագիրը երկու կողմերի համաձայնությամբ փոփոխություն անելու հնարավորությունը տալիս է: Այս պահին հիմնվում ենք միայն բանավոր համաձայնության վրա»:

Մեր զրուցակցից հետաքրքրվեցինք` հայաստանյան օպերատորներն արձագանքե՞լ են նամակներին:

Ի պատասխան, Էդգար Էլբակյանը նշեց. «Մեր ունեցած տեղեկություններով` այս պահին ոչ մի օպերատոր ցանկություն չի հայտնել: Կառավարությունն իր մասով շուկան բացել է, մնացածը, ինչպես տնտեսագետներն են ասում, արդեն շուկայի «անտեսանելի ձեռքի գործն» է: Այսինքն` կառավարությունը, կոպիտ ասած, չի կարող ուժով ինչ– որ տնտեսվարողի բերել: Տնտեսվարողն ունի իր ներդրումային քաղաքականությունը և ինքն է որոշում, թե որևէ շուկա մտնելն իր համար երկարաժամկետ կամ միջնաժամկետ հեռանկարում ձեռնտո՞ւ է, թե՞ ոչ»:

Շարունակությունը՝ «Փաստ» օրաթերթի այսօրվա համարում