«Սերժ Սարգսյանի հրաժարական տալու տրամաբանությամբ պետք է ցրել Ազգային ժողովը». քաղաքագետ. «Փաստ»

«Փաստ» օրաթերթը գրում է.

Ձևավորված կառավարությունն այսօր ամբողջովին արտահայտում է ժողովրդի կամարտահայտությունը, իսկ Ազգային ժողովը՝ ոչ: Քաղաքագետ Հայկ Սուքիասյանն այն համարում է ոչ լեգիտիմ ու շեշտում, որ ԱԺ–ն պետք է ցրել, այն էլ՝ որքան հնարավոր է շուտ: Ստեղծված իրավիճակում խորհրդարանական արտահերթ ընտրություններ երբ, ինչպես և ինչ մեխանիզմով կարող են լինել հարցերն են առաջ գալիս: Քաղաքագետը, սակայն, Ազգային ժողովի ցրումը իրավական տեսանկյունից դիտարկել չի ցանկանում, այստեղ նա միայն քաղաքական խնդրի լուծում է տեսնում: Սուքիասյանի խոսքով, մեր երկրում քաղաքական իրավիճակ է փոխվել, և ներկայիս ԱԺ–ն այնտեղ ներկայացված ուժերի համամասնությամբ հասարակության տրամադրությունները չի արտացոլում: Այն բացարձակ ոչ լեգիտիմ է: «Չպետք է գնալ իրավական մեխանիզմների ուղղությամբ, որովհետև այդ դեպքում կարող են բլեֆներ անել: Կասեն՝ այս օրենքով չեք կարող, այն մի օրենքով կարող եք, այս մի օրենքով արգելված է: Սա իրավական հարց չէ, այլ՝ քաղաքական: Հետևաբար ԱԺ–ը պետք է ցրել, ընդ որում՝ որքան հնարավոր է շուտ՝ 3–4 ամսում, մինչև տարվա վերջ ցրել և արտահերթ ընտրություններ նշանակել»,–նշեց նա: Դիտարկմանը, թե կառավարության ծրագրի ընդունումը այդ գործընթացի վրա կարո՞ղ է անդրադառնալ, քաղաքագետը պատասխանեց, թե դա կապ չունի, քանի որ ԱԺ–ը ներկայիս հասարակության քաղաքական ու մշակութային պատկերը չի արտահայտում: Ամբողջ ժողովուրդը Հանրապետական կուսակցությանը և կոալիցիային՝ Դաշնակցության հետ միասին, անվստահություն է հայտնել: «Ո՞ւմ է ներկայացնում այս խորհրդարանը: Ժողովրդի 90%–ը մեծամասնությանը մերժել է, հիմա այս մեծամասնությունն ԱԺ–ում մնում է, որ ի՞նչ անի: Եթե այս ԱԺ–ն այսպես մնաց մեկ կամ երկու տարի, ժողովրդի պաթոսը իջնելու է: Հանրապետական կուսակցությունը ինչպես էլ չլինի, Նիկոլ Փաշինյանի կառավարության մեջ մեկ–երկու խնդիր տեսնելու է ու ցույց տա, հետո դա կդարձնեն մ ա տի փա թ ա թան և  այդ պես շա րունակ»,–նկատեց նա: ԱԺ–ն ցրելու և արտահերթ ընտրություններ նշանակելուն չպե՞տք է նախորդի ինչ–որ գործընթաց կամ որոշակի քայլերի հերթականություն: Սրան ի պատասխան Սուքիասյանը նշեց, որ ոչ մի քայլերի հերթականություն էլ պետք չէ: Ինչպես Սերժ Սարգսյանը հրաժարական տվեց, այդ նույն տրամաբանությամբ էլ պետք է ցրվի Ազգային ժողովը: Օրենքին հղում անել պետք չէ: Ազգային ժողովը ցրելու իրավասությունը ժողովրդի լիազորությունների մեջ է մտնում: «Ժողովուրդը հավաքվում է, մեկ օր էլ ԱԺ–ն ցրում: Բայց կարող են այլ կերպ վարվել: Քաղաքական ուժերը իրար հետ պայմանավորվեն, գան կոնսենսուսի, արձանագրեն երկրում առկա քաղաքական վիճակը, արձանագրեն, որ այս պահին ԱԺ–ը ՀՀ–ի և հայ ժողովրդի քաղաքական տրամադրությունների հետ որևէ առնչություն չունի: Հիմա իրենք ինչո՞ւ են մնում ԱԺ–ում: Այստեղ իրավունքը ժողովրդինն է: Ժողովուրդն իր ինքնիշխանությունը երկրում հաստատել է՝ տապալելով գործող վարչական համակարգը, այն ժամանակվա իշխանությունը: Հիմա այդ իշխանության մնացորդները ինչո՞ւ են մնում:  Իրավական դաշտ բերելու դեպքում հնարավոր չի լինի ցրել ԱԺ–ն: Սերժ Սարգսյանը իրավական դաշտո՞վ է հրաժարական տվել: Նա ընտրված վարչապետ էր: Բայց լեգիտիմություն չուներ և ժողովուրդը իջեցրել է իրեն այդ պաշտոնից»,–ընդգծեց նա: Առանց Նիկոլ Փաշինյանի նմանատիպ «հրահանգի» ժողովուրդը նման քայլի կգնա՞: Այս հարցին ի պատասխան Սուքիասյանը նկատեց, որ ԱԺ–ն ցրելու պահանջն ամեն օր էլ կա: Եվ եթե կոչով դիմեն, ժողովուրդը մեկ օրվա մեջ ԱԺ–ը կտապալի: Բայց որպեսզի ամեն ինչը դրան չհասնի, ըստ քաղաքագետի՝ քաղաքական ուժերը գոնե մեկ անգամ ժողովրդի տրամադրություններին ի շահ պետք է գործեն: Հարցին, թե ԱԺ–ը չցրելու և նույն թիմով մի քանի տարի աշխատելու դեպքում ի՞նչ կարող է լինել, ՀՀԿ–ն իր ուժերը ի մի կարո՞ղ է բերել, զրուցակիցս պատասխանեց, որ ՀՀԿ–ն իր ուժերը չի կարող հավաքել, ինքնակազմակերպվել, այն քանդվելու եզրին է, բայց կարող է լինել հակառակը: Եթե Նիկոլ Փաշինյանի կառավարությունն այդ հարցը չլուծեց, կարող է իր լեգիտիմությունն ընկնել: «Պետք է խորհրդարանը ցրել, անցկացնել լեգիտիմ ընտրություններ, և մենք կունենանք երկու լեգիտիմ քաղաքական մարմին՝ կառավարություն և ԱԺ: Հակասությունը պետք է լուծել շատ արագ, ընդ որում՝ դա բխում է պետության ու հեղափոխությամբ իշխանության եկած քաղաքական գործիչների շահերից»: