Ադրբեջանի խորհրդարանական ընտրությունները լեգիտիմ չեն. դեմոկրատական ուժեր

 Ադրբեջանի ընդդիմադիր եւ դեմոկրատական ուժերի «Ազգային խորհուրդ» միավորումը, որը ներառում է տասնյակ առաջատար ընդդիմադիր կուսակցություններ եւ հասարակական կազակերպություններ,  այդ երկրում նոյեմբերի 1-ին անցկացված խորհրդարանական ընտրությունները լեգիտիմ չեն համարել:

Վկայակոչելով «Ազադլըգ» թերթը, այդ մասին արված պաշտոնական հայտարարության մեջ «Ազգային խորհուրդը» նշել է, որ «Ալիեւների ռեժիմը հերթական անգամ բռնի ճանապարհներով ժողովրդից խլել է իշխանությունը»:

Նշվում է, որ նոյեմբերի 1-ի խորհրդարանական ընտրությունները Ադրբեջանի պատմության մեջ ամենախայտառակ ընտրությունն էր:

«Երկրում ռեպրեսիվ մթնոլորտը պահպանվեց նաեւ ընտրությունների ժամանակ: Ավտորիտար կառավարման ամբողջ ուժով շարունակվող պայմանում խոսք չէր կարող լինել ազատ ընտրությունների անցկացման հնարավորության մասին: Բոլոր ընտրական տեղամասերը գտնվել են իշխանության վերահսկողության տակ, որտեղ իսպառ բացառվել է մրցակցային մթնոլորտը:

Հաշվի առնելով այս բոլորը, «Ազգային խորհուրդը» իշխանության առաջ հանդես էր եկել ազատ եւ արդարացի ընտրության համար պայման ստեղծելու մի քանի քաղաքական եւ իրավական փոփոխությունների պահանջով, ինչն անտեսվել է: Այդ պատճառով «Ազգային խորհուրդը» ընտրությունները բոյկոտելու որոշում էր ընդունել», -ասվում է հայտարարության մեջ:

  Նշվում է, որ Ադրբեջանում ընտրությունների համապատասխան պայման չստեղծվելու պատճառով դիտորդական առաքելությունից հրաժարվել է եվրոպական տարածաշրջանում ընտրությունները գնահատող միակ կառույցը` ԵԱՀԿ ժողովրդավարական հաստատությունների եւ մարդու իրավունքների գրասենյակը, ինչով, փաստորեն, բոյկոտել է դրանք:

Ընտրությունները բոյկոտեց նաեւ դրանց նախապես կեղծվելն ընդունած Եվրոպական միության խորհրդարանը եւ եվրոպական կառույցներին կոչ արեց դիտորդներ չուղարկել Բաքու:

Ադրբեջանի պատմության մեջ սա միջազգային մակարդակով բոյկոտի ենթարկված առաջին ընտրությունն է:

Ընտրական գործընթացն անցավ օրենքի զանգվածային խախտումներով, եւ ընդդիմության անվան տակ ընտրություններին միացած հասարակական-քաղաքական կառույցների բացարձակ մեծամասնությունը գործընթացի ընթացքում հետ վերցրեց թեկնածությունը: Գրանցված թեկնածուների, այդ թվում`անկախ 40 տոկոսից ավելին (500 հոգուց ավելի) հրաժարվեց մասնակցել ընտրությանը:

Չնայած այն բանին, որ փաստորեն իշխանությունն ընտրությունների գնաց առանց մրցակիցների, դարձյալ ընտրական արշավի հնարավորություն չստեղծեց, թեկնածուներին եթերի ժամանակ չհատկացրեց, անգամ ընտրությունների համար իմիտացիոն մթոլորտ չապահովեց: Առանց չափազանցելու կարող ենք ասել, որ ընտրողների մեծ մասն ընդհանուր առմամբ ընտրությունների անցկացումից անտեղյակ էր: Դրա արդյունքը եւս իրեն ցույց տվեց ընտրության օրը. ժողովուրդը բոյկոտեց ընտրությունը: «Ազգային խորհորդի» դիտարկումների համաձայն` այս ընտրություններում ընտրողների ակտիվությունը մո տ 10 տոկոսի շրջակայքում էր: Իշխանությունն աշխատեց իր կողմից նախապես ստեղծված «կարուսել» խմբերի  հաշվին արհեստականորեն բարձրացնել ընտրությանը մասնակցության տոկոսը:

Իշխանությունը ոչ թե ընտրություն անցկացրեց, այլ օրինականացրեց ամիսներ առաջ կազմած պատգամավորների ցուցակը. այսինքն, պատգամավորները ոչ թե ընտրվեցին, այլ նշանակվեցին:

«Ալիեւների ռեժիմն այս ընտրություններում ամբողջությամբ ոչնչացրեց երկրում ընտրության ինստիտուտը: Դրանով ավելի մեծ հարված հասցվեց երկրում ընտրության ճանապարհով իշխանափոխության նկատմամբ մեր քաղաքացիների ունեցած հավատին: Նման ընտրության անցկացմամբ` իշխանությունն ավելի խորացրեց իր ժողովրդի եւ դեմոկրատական աշխարհի միջեւ անդունդը, ինչը ոչ մի լավ հեռանկար չի խոստանում իրեն եւս:

«Ազգային խորհուրդը» հայտարարում է, որ նոյեմբերի 1-ի ընտրությունը չի արտահայտում ժողովրդի կամքը եւ ամբողջությամբ կեղծված է: Քաղաքական իշխանությունը վարչական բռնության ճանապարհով բացահայտ կերպով գրավել է օրենսդրական մարմինը եւ այն ձեւավորել ժողովրդի կողմից վստահություն չունեցող անձանցով: 20 տարուց ավելի երկրում տիրակալող Ալիեւների ռեժիմը հերթական անգամ ժողովրդի իշխանությունը բռնությամբ խլել է նրանից:»Ազգային խորհուրդը» հայտարարում է, որ այս ընտրությամբ ձեւավորված խորհրադարանը չի արտահայտում ժողովրդի կամքը եւ լեգիտիմ չէ», -ասվում է հայտարարության մեջ:

Ադրբեջանում անցկացված ընտրությունները չի ճանաչել նաեւ «Մուսավաթ» կուսակցությունը, որը հայտարարել է, թե ընտրություններն անցել են զանգվածային խախտումներով, շատ ընտրատեղամասերոմ դիտորդներին հեռացրել են կամ սահմանափակել են քվեատուփերին հետեւելու հնարավորությունը, քվեարկությունից առաջ ընտրաթերթիկները դիտորդների մասնակցությամբ չեն հաշվարկվել, որոշ տեղամասերում առավոտվանից քվեատուփերը լցված են եղել ընտրաթերթիկներով, դիտվել է քաղաքացիների խիստ ցածր ակտիվություն:

The Washington Post թերթն անդրադարձել է Ադրբեջանում բոյկոտի ենթարկված ընտրություններին` նշելով, որ առաջին անգամ է, որ ԵԱՀԿ-ը չի հետեւել այդ երկրի ընտրություններին:

Ամերիկյան թերթը գրել է, որ Ադրբեջանն ընտրություններն անցկացրել է Արեւմուտքի քննադատությունների ֆոնին, միջազգային կազմակերպությունները կառավարությանը մեղադրում են խոսքի ազատությունը սահմանափակելու մեջ, առաջատար ընդդիմադիր կազմակերպությունները բոյկոտել են ընտրությունը:

Նշենք, որ Ադրբեջանի իշխող «Արդարություն եւ զարգացում» կուսակցությունը հայտարարել է կիրակի անցկացված խորհրդարանական ընտրություններում նախնական տվյալներով իր հաղթելու մասին: Կուսակցությունը խորհրդարանում կզբաղեցնի 125 պատգամավորական տեղերից նվազագույնը 70-ը: