Հանրապետականները վերընտրվելու ցանկություն են հայտնել

«Փաստ» օրաթերթը գրում է

 

2018 թվականի մարտի 11–ին տեղական ինքնակառավարման մարմինների հերթական ընտրություններ են անցկացվելու Արագածոտնի, Արարատի, Արմավիրի, Լոռու, Կոտայքի և Շիրակի մարզերի թվով 19 համայնքներում, և ավագանու անդամի արտահերթ ընտրություն` Տավուշի մարզի Ազատամուտ համայնքում:

Կենտրոնական ընտրական հանձնաժողովի փոխանցմամբ՝ նշված 20 համայնքներից 4–ում կայանալու են միայն համայնքի ղեկավարի, 6–ում` միայն ավագանու անդամի, իսկ 10–ում՝ միաժամանակ համայնքի ղեկավար և ավագանի կընտրեն:

«Փաստ»–ը ԿԸՀ–ից տեղեկացավ, որ մի շարք համայնքներում թեկնածուներն արդեն հայտնի են:

Եվ այսպես՝ Արարատի մարզի Դարբնիկ համայնքում երկու թեկնածու կա՝ մեկը հանրապետական, մյուսը՝ անկուսակցական: Հանրապետականի թեկնածուն համայնքի գործող ղեկավար Դավիթ Գզիրյանն է, իսկ անկուսակցական ինքնաառաջադրված թեկնածուն՝ Ռաֆիկ Վիրաբյանը: Վերջինս չի նշել, թե ինչ գործունեությամբ է զբաղվում:

Հարևան Զորակում նույն պատկերն է՝ 2 թեկնածու: Նրանցից մեկը կրկին հանրապետական է, մյուսը որևէ կուսակցության անդամ չէ: ՀՀԿ–ական թեկնածուն համայնքի ղեկավար Մանուկ Մալոյանն է: Նրա անկուսակցական մրցակիցը Էդուարդ Խաչատրյանն է:

Խաչփարում գործող հանրապետական գյուղապետ Ղազար Մարտիրոսյանի դեմ է դուրս եկել համայնքապետարանի առաջատար մասնագետ Կարեն Միկինյանը:

Լոռու մարզի Դեբեդ համայնքում առայժմ մեկ հոգի է որոշել գյուղապետ ընտրվել: Նա համայնքի մշակույթի կենտրոնի տնօրեն, «Հայ Հեղափոխական Դաշնակցություն» կուսակցության անդամ Արայիկ Սարգսյանն է:

Առավել ակտիվություն են ցուցաբերել ավագանու անդամները: Դարբնիկում 8 անկուսակցական ցանկանում են ավագանի ընտրվել:

Զորակում ավագանու թեկնածուի մեկ առաջադրում կա:

Խաչփարում 6 քաղաքացի է ուզում ավագանի դառնալ: Թեկնածուներից Արարատ Ալեքսանյանը տնկարանի պատասխանատու է: ՀՀԿ–ական Սերգեյ Գևորգյանը Տրանսգազ ՍՊԸ–ում օպերատոր է աշխատում: Այս ընկերությունից մեկ անձ էլ է իր թեկնածությունն առաջադրել: Հանրապետական Տիգրան Եսայանը, ով որոշել է ավագանի դառնալ, ՀԷՑ–ում կարգավար է աշխատում:

Սայաթ–Նովա համայնքում 4 առաջադրում կա: Առաջադրվածներից միայն մեկն է իր աշխատանքի վայրի մասին տեղեկատվություն հայտնել: Նա այս համայնքի դպրոցի մանկավարժ Գագիկ Խաչատրյանն է:

Նշենք, որ Տավուշի մարզի Ազատամուտ համայնքում ավագանու ընտրությունը արտահերթ տեղի կունենա:

2017 թվականի օգոստոսի 18–ին վաղաժամկետ դադարեցվել էին համայնքի ավագանու անդամներ Մարգարիտա Ալթունյանի, Ալիկ Էլարյանի, Հակոբ Մելիքբեկյանի, Լևոն Սարիբեկյանի և Սևակ Գասպարյանի լիազորությունները՝ «Տեղական ինքնակառավարման մասին» ՀՀ օրենքի 22–րդ հոդվածի 1–ին մասի 7–րդ կետի (մեկ տարվա ընթացքում անհարգելի պատճառով բացակայել են ավագանու նիստերի ավելի քան կեսից) հիմքով: Այդ հանգամանքից ելնելով՝ անհնարին է դարձել ավագանու նիստերի հետագա անցկացումը:

Թեկնածուների գրանցումներն արդեն սկսված են: Նրանք ինքնաբացարկի դիմում կարող են ներկայացնել մինչև մարտի 1–ը ժամը 18:00–ն:

Իսկ նախընտրական քարոզարշավը մեկնարկելու է փետրվարի 21–ին, ավարտվելու՝ մարտի 9–ին մինչև ժամը 24:00–ն:

Հիշեցնենք նաև, որ հերթական ընտրությունների համար ձևավորված թվով 19 տեղամասային ընտրական հանձնաժողովների նախագահների և քարտուղարների պաշտոնները բաշխվել են հետևյալ համամասնությամբ` Հայաստանի Հանրապետական կուսակցություն` 10–ական, «Ծառուկյան» կուսակցությունների դաշինք` 6–ական, «Ելք» կուսակցությունների դաշինք` 2–ական, Հայ Յեղափոխական Դաշնակցություն՝ 1–ական:

 

Մանյա Պողոսյան