Իշխանությունների հակակոռուպցիոն դասեր–պայքարը կսկսվեն ՆՈՒՀ–երից

«Փաստ» օրաթերթը գրում է

 

Կրթության և գիտության նախարարությունը կրթական ոլորտում մի շարք բարեփոխումներ է ձեռնարկել, որոնց շնորհիվ Նախադպրոցական ուսումնական հաստատություններում, դպրոցներում և բուհերում նախատեսվում է ամեն ինչ անել՝ կոռուպցիոն ռիսկը նվազեցնելու համար: Կոռուպցիայի դեմ այդ պայքարը մի քանի ուղղությամբ է տարվելու՝ հակակոռուպցիոն դասընթացներ, աշխատակիցների ընդունման թափանցիկ համակարգի ներդրում, եռամսյակային հաշվետվություններ և այլն: Այս ամենը պարփակվել է մեկ նախագծի մեջ:

Այսպես, նախ և առաջ այս հաստատություններում տարվա ընթացքում կսկսվեն հակակոռուպցիոն թեմաներով դասավանդումներ: Մանկապարտեզներում ամեն ինչ կսկսվի թեթևից՝ ամիսներ անց մանկապարտեզ հաճախող սաները կմասնակցեն իրենց տարիքին համապատասխան հակակոռուպցիոն բնույթի դասերի, հանդեսների, խաղերի ու բեմականացված ներկայացումների: Դպրոցներում կավելացվի կոռուպցիայի վերաբերյալ դասաժամերին հատկացված ժամաքանակը, նույնը և բուհերում:

Ամենաուշագրավ առաջարկներից մեկն էլ ՆՈՒՀ–երի բյուջեներում կենցաղային պարագաներ և գրենական պիտույքներ գնելու համար անհրաժեշտ միջոցներ նախատեսելն է: Այս հատկացումները կկատարվեն այս տարվա օգոստոսին՝ մինչ ուսումնական նոր շրջանի մեկնարկը: Մինչ այս ոչ ոքի համար գաղտնիք չէր, որ թե՛ գրենական պիտույքների ձեռքբերումը և թե՛ ժամանակ առ ժամանակ տնտեսական ապրանքների գնումը կատարվում էր սաների ծնողների կողմից:

Միաժամանակ մանկապարտեզների, դպրոցների ու բուհերի հաստատված բյուջեները, տարեկան և եռամսյակային ֆինանսական հաշվետվությունները կհրապարակվեն տվյալ համայնքի, բուհի պաշտոնական կայքերում:

Այս տարվա վերջին նշված հաստատությունները «պարտավոր» կլինեն նաև յուրաքանչյուր եռամսյակ հրապարակել ուսումնական հաստատությունների պատասխանատվության ենթարկված աշխատակիցների թվաքանակի վերաբերյալ տեղեկատվություն:

Մի քանի հետաքրքիր դրվագ էլ կրթական ոլորտը քաղաքականությունից հեռու պահելու վերաբերյալ: Այսպես, Կրթության և գիտության նախարարությունն իր համար պարզել է, որ բուհերի կառավարման խորհուրդները քաղաքականացված են և որ անհրաժեշտ է օրենքով ամրագրել բարձրաստիճան պաշտոնատար անձանց՝ խորհրդի նախագահ լինելու անհնարինությունը: Բացի այդ, Ընտրական օրենսգրքում և կրթության ոլորտը կանոնակարգող համապատասխան իրավական ակտերում պետք է ամրագրել դրույթներ, որոնք կարգելեն դպրոցների ղեկավար անձնակազմին և ուսուցիչներին աշխատանքային ժամերին զբաղվել քաղաքական քարոզչությամբ, կուսակցական գործունեությամբ, օգտագործել ուսումնական հաստատության տարածքը, գույքը, հեռախոսակապն ու այլ ռեսուրսներն ի շահ կուսակցության: Գուցե նախորդ տարվա դառը փորձից դրդվա՞ծ:

Նախագծի մեկ այլ կետ էլ վերաբերում է դպրոցում դասավանդողի կողմից իր սովորողին վճարովի կրթական ծառայություններ մատուցելն (կրկնուսուցում) արգելող դրույթներին: Բանն այն է, որ հանրակրթական դպրոցներում առկա են ուսումնական առաջադիմության կողմնակալ գնահատման, ներառյալ գնահատականների մտադրված ձևով բարձրացման դեպքեր, և այսկերպ նախարարությունը կփորձի պայքարել դրա դեմ:

Նախագծով նաև առաջարկվում է Երևանի երկու ավագ դպրոցներում փորձնական կարգով ներդնել դպրոց մուտքը ամրագրող քարտային համակարգ, որը կնույնականացնի աշակերտին: Համակարգը պիտի փոխկապակցվի dasaran.am կայքի հետ: Այս նորամուծությունը կներդրվի սեպտեմբերի վերջին: Նման համակարգի ներդրումը պայմանավորված է ավարտական դասարաններում աշակերտների բացակայությունների տարածվածությամբ, ներառյալ բացակայող աշակերտներին ներկա նշանակելու և ուսումնական առաջադիմություն գնահատելու հետ: Իսկ արդեն տարեվերջին պիլոտի արդյունքների վերլուծության և դրա հիման վրա բոլոր ավագ դպրոցներում համակարգի ներդրման ծրագրեր կմշակվեն: