Մաշա Արիստակեսյանը՝ նոր մասնագիտության, պարարվեստի և ընտանիքի մասին

Life.panorama.am-ը գրում է.

Life.panorama.am-ի այսօրվա զրուցակիցն է դերասանուհի Մաշա Արիստակեսյանը, ով հեռուստադիտողին հայտնի է տարբեր հեռուստասերիալներից եւ «Պարահանդես» նախագծից:

-Մաշա, առաջինը կցանկանայի պատմեք, թե ինչո՞վ եք այս շրջանում զբաղված, ի՞նչ ծրագրեր կան առաջիկայում:

- Այս տարի ընդունվեցի ԵՊՀ-ի «Մասս Մեդիա»-ի հեռուստաժուռնալիստիկա բաժնի մագիստրատուրան ու կրկին դարձա ուսանող: Միաժամանակ պատրաստվում եմ նոյեմբերի 2-ին կայանլիք «Մենք եւ մոխրոտը» պրեմիերային, որտեղ մարմնավորում եմ մոխրոտին:

-Հետաքրքիր է ինչո՞ւ եք որոշել այդ մասնագիտությունն ունենալ: Չե՞ք ցանկանում դերասանական արվեստում շատ խորանալ:

- Չեմ կարծում, որ մեկը մյուսին խանգարում է:

-Դուք էլ շատերի նման թատրոնից եք եկել հեռուստատեսություն, միաժամանակ, հետաքրքիր է՝ չնայած նրան, որ հեռուստատեսությունն է դերասանին հայտնիություն ու ճանաչում տալիս, Ձեզ համար եւս թատրոնը առաջնային տեղո՞ւմ է գտնվում:

- Դա շատ հարաբերական հարց է, բայց այս պահին ինձ համար ավելի հոգեհարազատ է թատրոնը:

-Մաշա, «Պարահանդես»  նախագծից հետո հեռուստադիտողը տեսավ Ձեր պարային ունակությունները, տաղանդը, Ձեզ համար եւս այն բացահայտո՞ւմ էր:

- Այո, այն էլ ինչպիսի: Գիտեի, որ երաժշտության տակ շարժվել գիտեմ, բայց որ կարող եմ պարել բարդ պարեր, այ դա չգիտեի:

-Պարարվեստին ասես սիրահարվել եք, գուցե այս ոլորտում առաջիկայում քայլե՞ր ձեռնարկեք:

- Շատ եմ ցանկանում, բայց այս պահին ժամանակս չի ներում, թեպետ վստահ եմ, որ կշարունակեմ պարել, շատ եմ սիրում:

-Մաշա, հետաքրքիր է՝ մեկ տանիքի տակ երկու դերասանները ինչպե՞ս են բնակվում, դա օգնո՞ւմ է, թե խանգարում:

- Բնականաբար օգնում է, այդպես իրար լավ ենք հասկանում:

-Դուք եւ Ձեր ամուսինը հաճա՞խ եք իրար մասնագիտական դիտողություններ կամ հաճոյախոսություններ անում, այդ հարցում օբյեկտի՞վ եք, թե այնուամենայիվ, սերը չի թողնում թերություններ նկատել:

- Ինձ համար շատ կարեւոր է ամուսնուս կարծիքը, նա միշտ տեղին եւ դիպուկ դիտողություններ է անում:

-Երիտասարդ ընտանիք եւ արդեն երկու հրաշքներ, արդյոք ստացվո՞ւմ է ժամանակը աշխատանքի հետ այնպես բաշխել, որ երեխաները դրանից չտուժեն:

- Այո, իհարկե, մեր բալիկներն էլ պարապ չեն:

-Մի փոքր կպատմե՞ք փոքրիկների մասին:

- Քանի որ տարիքային տարբերությունը մեծ չէ (տղաս՝ Վաչեն 4 տարեկան է, աղջիկս՝ Նոյեմին՝ 2.5), նրանց հետաքրքրությունները համընկնում են: Այս հարցում մեր բախտը բերել է՝ հեշտ է երկուսին էլ գոհացնել: Քույր եւ եղբայր շատ են կապված, օրվա մեծ մասը միասին են անցկացնում, միասին հաճախում են մանկապարտեզ, միասին կազմակերպում խաղերը եւ բավականին ակտիվ են:

-Երեխաներին հաճա՞խ եք թատրոն տանում, նրանց դո՞ւր է գալիս:

- Իհարկե, հաճախ ենք տանում, պետք է նկատեմ, որ միշտ շատ տպավորված են վերադառնում:

 

Հեղինակ՝ Անուշիկ Մելքոնյան