Հայտնի քավոր-սանիկները (լուսանկարներ)

Հայոց ավանդական ընտանեկան կենցաղում քավորի դերը շատ մեծ է եղել: Առանց նրա մասնակցության չէր կատարվում ընտանեկան և ոչ մի նշանավոր իրադարձություն, ոչ մի հանդես: Քավորը մեծ հարգանք ու պատիվ էր վայելում. ընտանեկան բոլոր տոնախմբությունների և սգո արարողությունների անցկացման գլխավոր դերակատարն էր ու պատվավոր ղեկավարը: Քավորի դերը հատկապես մեծ էր հարսանեկան ծեսերի և կնունքի ժամանակ, որոնցում առավել ցայտուն էին ի հայտ գալիս նրա լայն գործառույթների կարևորագույն տարրերը: Նա նորաստեղծ ընտանիքի ամենահարգված ու հեղինակավոր անձն էր, խորհրդատուն և վեճերի հաշտարարը: Քավորի յուրաքանչյուր այցը համընտանեկան իրադարձություն էր, իսկ խոսքը՝ օրենք: Ոչ մի կարևոր հարց, առանց քավորի միջամտության, ավարտին չէր հասնում: Անգամ եթե սանիկներից մեկին սպանեին, և սպանողի ընտանիքից քավորը հաշտության միջնորդություն աներ, թշնամությունը կվերանար: Քավորը սրբություն էր ոչ միայն ազգանդամ ընտանիքի, այլ նաև ողջ ազգատոհմի համար:

Մեր օրերում քավորի դերը ևս մեծ է, բայց ոչ այնքան, որքան հնում: Ամուսնացող զույգը կամ մկրտվողները քավոր են ընտրում հարազատ մեկին և այդպիսով ավելի ամրապնդում հարաբերությունները: Ձեր ուշադրությանն ենք ներկայացնում հայտնիների, ում կապում են քավոր-սանիկ հարաբերությունները:

Դերասաններ Սարգիս Գրիգորյանի և Վահագն Գալստյանի միջև ընկերական կապը անցած աշնանն ավելի ամրապնդվեց: Նրանք այժմ ոչ միայն լավ ընկերներ են, այլ նաև քավոր-սանիկ:

Վահագն Գալստյանի ընտանիքը նշել է, որ իրենք շատ են կարևորում կնքահոր դերը և ընտրել են այնպիսի մի մարդու, ով սրտացավ ու ջերմ կլինի իրենց ընտանիքի հետ: Սարգիսը Վահագնի և նրա երեխաների կնքահայրն է (Վահագնի կինը` Շուշանը վաղուց է մկրտված եղել): Վահագն ու Սարգիսը վաղեմի ընկերներ են: Նրանք միասին են սովորել:

2012թ-ի սեպտեմբերին տեղի ունեցավ երգչուհի Լուսինայի և նրա ընտրյալի` Գագիկ Առաքելյանի պսակադրությունը: Զույգի քավորն ու քավորակինն էին Լեւոն Քոչարյանն ու Սիրուշոն:

Լրատվամիջոցներից մեկի հարցին Լուսինայի հայրը` Ուկրաինայում Հայաստանի դեսպան Անդրանիկ Մանուկյանը պատասխանել էր, որ զարմանալի ոչինչ չկա, որ Լևոնն ու Սիրուշոն են զույգի քավորն ու քավորկինը, քանի որ նրանց կապում են ջերմ ընկերական հարաբերությունները:

Հումորիստ, ինչպես նաև երգիչ Արամ MP3-ին և Աննա Մարգարյանն ամուսնացել են դեռևս 2008 թվականին: Զույգի հարսանիքի քավորը եղել է հայտնի և սիրված հումորիստ Մկրտիչ Արզումանյանը` Մկոն:

Ծանրամարտի աշխարհի չեմպիոն Նազիկ Ավդալյանի և նրա ընտրյալի` Էրիկ Կարապետյանի պսակադրությունը տեղի ունեցավ ամռանը: Զույգի հարսանիքի քավորը եղել է ԲՀԿ կուսակցության առաջնորդ Գագիկ Ծառուկյանը:

Երգչուհի Անի Ամիրյան ու դերասան, պարող Ստեփան Ղամբարյանն ամուսնացել են 2011 թվականին: Զույգի քավորն ու քավորկինը Արամոն և Էմմա Պետրոսյանն էին: Քավորին ընտրել էր փեսան: Անին նշել է, որ Արամոն և Էմման այն մարդիկ են, ում հետ կուզենար ողջ կյանքի ընթացքում դառնալ բարեկամ: