Շաբոյանի սկանդալային հայտնագործությունը

 

 

Տնտեսական մրցակցության պաշտպանության պետական հանձնաժողովը (ՏՄՊՊՀ), իսկ ավելի կարճ ասած Արտակ Շաբոյանի «հիմնարկը», ինչպես և սպասվում էր, խիստ անհանգստացել է հայաստանյան շուկայում արձանագրված թանկացումներից և որոշել է ուսումնասիրել։ Հանձնաժողովի այս ուսումնասիրությունները բերել են հերթական սկանդալային բացահայտմանը։ Պարզվել է, որ ապրանքները Հայաստանում թանկանում են, քանի որ դրանք թանկացել են միջազգային շուկայում։ Իհարկե, եթե խոսենք միայն ներկրվող ապրանքների մասին, ապա գուցե և Շաբոյանին կարելի էր լիովին վստահել, բայց թանկացել են նաև տեղական ապրանքները, ընդ որում թանկացել են ավելի շատ շուկայի ու գնորդների համար և ոչ թե արտադրողների։

Ի դեպ սա էլ մի կողմ, ինչպես գիտենք, օրերս թանկացավ նաև բենզինը։ Դե բնականաբար Շաբոյանի պատասխանը մեկն է՝ միջազգային շուկա։ Այս դեպքում սակայն հարց է առաջանում, իսկ ինչու բենզինը չէր էժանանում կամ չէր էժանանում այն չափով, ինչ չափով միջազգային շուկայում ընդամենը մի քանի ամիս առաջ։ Թե ասենք հայկական շուկան արձագանքում է միայն միջազգային շուկաների թանկացումներին, իսկ էաժանացումների հարցում կույր է և խուլ։

Վերջապես գուցե պետք է հուշել Շաբոյանին, որ շուկայում թանկացումները կարող են պայմանավորված լինել, ասենք, մենաշնորհների առկայությունից, երբ ներկրողը ինքն է սահմանում ապրանքի գինը և չունի մրցակիցներ։ Չնայած, թերևս Շաբոյանին պետք չէ այդ մասին հուշել, քանի որ նա պետք է լավագույնս տեղյակ լինի այս նրբերանգներին, իհարկե, միայն տեղյակ լինելու համար, քանի որ խոստովանենք, ոչ Շաբոյանը, ոչ էլ նրա ղեկավարած գերատեսչությունը, ոչինչ չեն կարող անել հայտնի ներմուծողների դեմ։
Չնայած այս դեպքում էլ հարց է ծագում՝ պե՞տք է արդյոք ընդհանրապես Տնտեսական մրցակցության պաշտպանության պետական հանձնաժողովը։