Ընդդիմադիր քաղաքական ուժերը չեն շտապում միանալ Զարուհի Փոստանջյանի համաժողովրդական ընդվզման նախաձեռնությանը

Ընդդիմադիր քաղաքական ուժերը չեն շտապում արձագանքել «Երկիր Ծիրանի» կուսակցության նախագահ, Երևանի ավագանու անդամ Զարուհի Փոստանջյանի համաժողովրդական ընդվզման նախաձեռնությանը: «Ժառանգությունից» ուղղակի չեն մեկնաբանում Փոստանջյանի նախաձեռնությունը, «Ազատ դեմոկրատներն» ու «Ելքը» «Երկիր Ծիրանիից» հստակ առաջարկի են սպասում, իսկ «Ժողովրդական հայրենիքը» կմիանա համաժողովրդական ընդվզմանը, եթե այն ինչ-որ հաջողությունների հասնի:

Զարուհի Փոստանջյանն ավելի վաղ հայտարարել է, որ կուսակցությունը մինչև այս տարվա վերջ համահայկական ընդվզման օր է նախապատրաստում: Նախաձեռնությունը ենթադրում է, որ նույն օրը, նույն ժամին քաղաքացիները պետք է դուրս գան փողոցներ և այդ կերպ իրենց բողոքի ձայնը հայտնեն և ներկայացնեն նոր իշխանության ձևավորման իրենց քաղաքական հայտը:

Զարուհի Փոստանջյանի նախկին կուսակցության՝ «Ժառանգության» փոխնախագահ Արմեն Մարտիրոսյանը Tert.am-ի հետ զրույցում ասաց, որ համաժողովրդական ընդվզմանը միանալու կամ չմիանալու խնդիրը կուսակցությունում չկա:

«Զարուհի Փոստանջյանն արդեն հայտարարել է, որ ինքը գործընկերներ չունի քաղաքական դաշտում: Միանալու խնդիր չկա, այնպես որ չեմ ցանկանում Զարուհի Փոստանջյանին մեկնաբանել»,- նշեց նա:

ԱԺ «Ելք» խմբակցության քարտուղար Գևորգ Գորգիսյանն ընդհանրապես նպատակահարմար չի համարում խոսել համաժողովրդական ընդվզման մասին. «Չեմ կարծում, որ արժե արձագանքել Զարուհի Փոստանջյանի նախաձեռնությանը»:

«Այսքան ժամանակ խմբակցությունում երբեք չի քննարկվել Զարուհի Փոստանջյանի որևէ հայտարարություն: Եթե նա մեզ ասելիք ունենա, պաշտոնապես կդիմի, պաշտոնապես ինչ-որ բան կպատասխանենք: Իսկ մինչ այդ որևէ կերպ չեմ պատրաստվում տիկին Փոստանջյանի որևէ գործողության կամ հայտարարության արձագանքել»,- հայտնեց Գևորգ Գորգիսյանը:

«Ազատ դեմոկրատներ» կուսակցության փոխնախագահ Անժելա Խաչատրյանը նշեց, որ կուսակցությունում առանձնապես չի քննարկվել այս նախաձեռնության միանալու հարցը, քանի որ պաշտոնապես առաջարկ չեն ստացել: Նրա խոսքով՝ Զարուհի Փոստանջյանի համաժողովրդական ընդվզմանը միայն մամուլից ծանոթացել, այդ պատճառով քննարկումներ չեն ծավալվել:

«Զարուհի Փոստանջյանը մեզ պաշտոնապես չի դիմել կամ նման առաջարկով հանդես չի եկել: Իր գործընթացին միանալու կամ աջակցելու համար, բնականաբար, մենք պետք է այդ գործընթացին միանալու առաջարկություն ունենանք: Եթե մեզ առաջարկ արվի, կքննարկենք և հայտարարությամբ հանդես կգանք»,- ասաց «Ազատ դեմոկրատներ» կուսակցության փոխնախագահը:

«Երկիր Ծիրանիի» նախաձեռնած համաժողովրդական ընդվզմանը միանալու մասին միայն հստակ նշեց «Ժողովրդավարական հայրենիք» կուսակցության նախագահ Պետրոս Մակեյանը: Նա հայտնեց, որ վերջին 20 տարում «Ժողովրդավարական հայրենիքը» մասնակից է եղել բոլոր քաղաքական ուժերի կողմից ժողովրդին ոտքի հանելու գործընթացներին:

«Տվյալ պարագայում Զարուհի Փոստանջյանի նախաձեռնությունը ևս ողջունում ենք: Եթե գործընթացը մտավ այնպիսի փուլ, որ տեղից շարժվեց, ապա մենք անպայման կաջակցենք»,- ասաց նա:

Նշենք, որ Պետրոս Մակեյանը նաև Ժիրայր Սեֆիլյանի հրապարակած ցուցակի այն անձանց թվում է, ովքեր պետք է ազգային դիմադրության ճակատ ձևավորեն: Հարցին, թե ընդդիմադիր ճակատը դեռևս չձևավորված երկու մասի չի՞ բաժանվում, Մակեյանը պատասխանեց, որ գործընթացներն իրար չեն խանգարում:

«Զարուհի Փոստանջյան կոնկրետ ժամկետներ է նշանակել, եթե իր մոտ հաջողվեց, ապա մենք կաջակցենք: Եթե չհաջողվեց, կարծում եմ՝ Զարուհի Փոստանջյանը պարտավոր է ինքը աջակցել «Ազգային դիմադրության ճակատին»,-նկատեց նա: