«Կցանկանայի հենց տիեզերքում գտնվելով լուսանկարել այդ ողջ գեղեցկությունը». դերասանուհի Արաքս Կետիկյանը՝ լուսանկարչությամբ զբաղվելու մասին

NEWS.am STYLE-ը գրում է.

Այսօր՝ օգոստոսի 19-ին, աշխարհում տոնում են Լուսանկարի միջազգային օրը:Լուսանկարներ, որոնք պատկերում են բնությունը, անշունչ իրերը, մարդկանց եւ շոու-բիզնեսի աստղերին: Մինչ շատ հայտնիներ սպասում են ունենալ նոր ու տարբերվող ֆոտոշարքեր, հայկական հեռուստասերիալներից հայտնի դերասանուհի Արաքս Կետիկյանն ընդհակառակը՝ թողել է կապույտ էկրանները՝ իրեն ավելի հոգեհարազատ գործով՝ լուսանկարչությամբ զբաղվելու համար: Մոտ մեկ տարի է, ինչ Արաքսը լուսանկարում է փոքրիկներին եւ ապագա մայրիկներին, ինչպես նաեւ համագործակցում է հայտնի բրենդների հետ:

NEWS.am STYLE-ը զրուցել է Արաքսի հետ լուսանկարչության եւ իր երազած լուսանկարների մասին.

«Այս պահին ինձ ավելի հաճելի է էկրանի հակառակ կողմում լինելը, ինչը հետագայում, երբ որոշեմ նորից նկարահանվել, ինձ շատ պետք կգա»,-համոզված է Արաքսը:

«Քանի որ հիմա քույրիկիս հետ աշխատում ենք մեր ընտանեկան ֆոտոստուդիայում, լուսանկարներ անելիս չեմ կարող միայն իմ ցանկությունը թելադրել: Լուսանկարում ենք բրենդային իրեր, երեխաների, ապագա մայրիկների, եւ դա միասնական աշխատանք է: Ինչ խոսք՝ լուսանկարի մշակումը սիրում եմ ինքս կատարել, քանի որ այդ հարցում ես շատ խստապահանջ եմ եւ ցանկանում եմ նոր ձեռագիր ստեղծել լուսանկարչության ոլորտում: Շատ ուրախ եմ, որ կարճ ժամանակահատվածում դա ընդունվեց եւ սիրվեց շատերի կողմից»,-ասում է Արաքսը՝ խոսելով նաեւ իր երազած կադրերի մասին.

«Մեծ երազանք ունեմ լինել օվկիանոսների, ծովերի հատակում եւ հավերժացնել մեզ համար անբացատրելի եւ անհայտ բնության հրաշքները: Չէ՞ որ ջրի հատակում կան մեծ գաղտնիքներ, որոնք դեռ չեն բացահայտվել եւ լուսաբանվել: Լուսանկարչության հետ կապված մյուս երազանքս, կարծում եմ, անհնար մի բան է :) Մանկուց հիացել եմ տիեզերքի գույները տեսնելով, եւ կցանկանայի հենց տիեզերքում գտնվելով լուսանկարել այդ ողջ գեղեցկությունը, հրաշք գույների միաձուլումը»:

Թեեւ Արաքսն արդեն բազմաթիվ պատվերներ է ստանում, իրեն լուսանկարիչ դեռեւս չի համարում.

«Կարծում եմ՝ լուսանկարչի կոչմանն արժանանալու համար պետք է ունենալ գոնե մեկ անմշակ լուսանկար, որը կլինի գլուխգործոց եւ կարճ ժանանակահատվածում կարժանանա  համամարդկային գնահատականի: Իսկ ես դեռ այդպիսի փորձ չեմ կատարել: Հուսով եմ՝ մի օր իմ աշխատանքային փորձի եւ տեսածի շնորհիվ կարժանանամ այդ պատվին»,-եզրափակեց դերասանուհի-լուսանկարչուհին:

Սյունե Առաքելյան