ՀՀ ԱԺ պատգամավորներն այցելել են Ակնալիճ գյուղում գտնվող եզդիական սրբատեղի

ՀՀ ԱԺ պատգամավորներն օգոստոսի 3-ին այցելել են Արմավիրի մարզի Ակնալիճ գյուղում գտնվող եզդիական սրբատեղի եւ հարգանքի տուրք մատուցել 2014 թվականի օգոստոսի 3-ին «Իսլամական պետության» կողմից Իրաքի Հանրապետության Շանգալ եզդիաբնակ նահանգում իրականացված ոճրագործության շուրջ 12 հազար անմեղ եզդի զոհերի հիշատակին:

 Ինչպես «Արմենպրես»-ին տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից, ներկաները ծաղիկներ են դրել հուշակոթողին, այնուհետեւ այցելել են եզդիական տաճար:

ՀՀ ԱԺ նախագահի տեղակալ Արփինե Հովհաննիսյանը լրագրողների հետ ճեպազրույցում նշել է, որ այն, ինչ տեղի է ունեցել Իրաքի հյուսիսում եզդիների նկատմամբ, ցեղասպանություն է: Խոսելով ՀՀ Ազգային ժողովի կողմից «ցեղասպանություն» եզրույթի ընդունման մասին՝ ՀՀ ԱԺ փոխնախագահն ասել է. «Յուրաքանչյուր պետություն հաշվի է առնում գործընթացի շրջանակում կոնկրետ քայլերի հաջորդականությունը եւ արտաքին քաղաքական օրակարգի առաջնահերթությունների շրջանակում հարցին քայլ առ քայլ գնալը, դա մեկ րոպեի կամ մեկ ժամվա գործընթաց չէ»:

ՀՀ ԱԺ պատգամավոր, եզդի համայնքի ներկայացուցիչ Ռուստամ Մախմուդյանը նշել է, որ ՀՀ խորհրդարանը սկզբունքորեն դեմ չէ եւ հակված է 2014 թվականի օգոստոսի 3-ին Իրաքում եզդիների նկատմամբ կատարված ցեղասպանության վերաբերյալ որեւէ ձեւաչափով փաստաթղթի ընդունմանը: