Springer-ն իր 400 միլիոն օգտատերի շրջանում կտարածի հայ գիտնականների հոդվածները

Միջազգային հրատարակչական Springer («Շպրինգեր») ընկերությունը նպատակ ունի հայ գիտնականների հոդվածները տարածել իր 400 միլիոնից ավել օգտատերի շրջանում: «Արմենպրես»-ի հետ զրույցում այս մասին նշեց ընկերության Միջին Արևելքի և Կենտրոնական Ասիայի տա րածքում լիցենզիոն հարցերով մենեջեր Թաֆիր Աթան (Thafeer Atta):

«Springer հրատարակչական ընկերությունը մասնագիտացած է բնական գիտությունների, տեխնոլոգիաների և բժշկության ոլորտի գիտական հետազոտությունների և գիտական պարբերականների հրապարակման մեջ: Մեր ծառայություններից օգտվում են համալսարաններ, հետազոտական ինստիտուտներ կամ առանձին կենտրոններ, որոնք ունեն հետազոտական բաժիններ. այդ կերպ մեր հրատարակած գրքերը և ամսագրերը  հասանելի են դառնում ակադեմիական հանրությանը: Այդպես գիտական համայնքը կարող է հետևել վերջին հետազոտություններին և դրանք օգտագործել իր աշխատանքներում: Հինգ տարի է` սերտորեն աÕ �խատում ենք հայկական գիտական համայնքի հետ և ուսումնասիրել ենք տեղի կարիքները: Ուստի մենք ողջունեցինք հայկական գիտական ամսագրերը հրատարակելու գաղափարը` դրանք համաշխարհային գիտական համայնքում ավելի տեսանելի դարձնելու նպատակով»,-մեզ հետ զրույցում նշեց նա:

Թաֆիր Աթայի խոսքով` այս կերպ հայ գիտնականները նաև անկախ գործելու հնարավորություն կստանան` ի տարբերություն նրանց, ովքեր ֆինանսավորում են ստանում  կառավարությունից:

«Խորհրդային Միության տարիներին հայ գիտնականներն իրենց հետազոտությունները տպագրում էին ռուսերենով, հետագայում` հայերենով: Մենք օգնելու ենք նրանց իրենց աշխատանքները հրատարակել նաև անգլերենով: Այդ կերպ նրանց գործերը սահմանափակված չեն լինի միայն ռուսախոս կամ հայախոս ընթերցողի համար: Այդ կերպ հայ գիտնականների հետազոտությունները հասանելի կլինեն համաշխարհային գիտական հանրությանը, քանի որ արդեն որերորդ տարին է` գիտական լեզուն համարվում է անգլերենը»,-շեշտեց նա:

Հարցին, թե երբ հնարավոր կլինի հայ գիտնականների աշխատանքները տեսնել անգլերեն, Springer-ի ներկայացուցիչը պատասխանեց, որ ամեն ինչի համար ժամանակ է հարկավոր:

«Մեր առջև դրված նպատակներին հասնելու համար կազմվել է ճանապարհային քարտեզ, որը քննարկվել է Springer-ի իմ գործընկերների, իմ կողմից, ինչպես նաև` ձեր հայրենակիցների` «Հայաստանի էլեկտրոնային գրադարանների կոնսորցիում» ընկերության, Ազգային գրադարանի հետ, ովքեր տքնաջան աշխատում են մեր ընդհանուր նպատակներին հասնելու համար: Յուրաքանչյուր ամսագիր մշակվելու և համապատասխանեցվելու է մեր չափանիշներին: Ներկայում մենք քննարկումներ ենք անցկացնում ինժեներիայի և քիմիայի ֆակուլտետների հետ այդ ոլորտներին առնչվող գիտական նյութերի տպագրման համաÖ €, ապագայում ակնկալվում է համագործակցություն ֆիզիկայի ոլորտում: Որքան շուտ սկսենք աշխատանքները, այքան շուտ կհասնենք մեր նպատակներին»,-հավելեց նա:

Հայաստանում ընկերությունը համագործակցում է Գիտության պետական կոմիտեի, Ազգային գրադարանի և «Հայաստանի էլեկտրոնային գրադարանների կոնսորցիում»-ի հետ: Հայ գործնկերների հետ Springer-ը Հայաստանում երկօրյա դասընթաց իրականացրեց, որի նպատակն էր օգնել հայաստանյան գիտնականներին իրենց աշխատանքները պատշաճ կերպով հրատարակել անգլերենով:

Բանասիրական գիտությունների թեկնածու, Հայաստանի էլեկտրոնային գրադարանների կոնսորցիումի նախագահ Աննա Չուլյանն նշեց, որ մեր հասարակությունում շատ լավ գիտնականներ կան, որոնք բավականին լուրջ գիտական արտադրանք են տալիս:

«Ցավոք, այն հասանելի չէ նախևառաջ լեզվի տեսանկյունից, քանի որ հրատարակվում է ոչ անգլերենով: Այսօր գիտության լեզուն անգլերենն է, և եթե մենք ցանկանում ենք բարձր վարկանիշ ունեցող ամսագրերում հրատարակվելու հնարավորություն ունենալ, ապա պետք է անգլերենն օգտագործենք: Ակադեմիայի մեխանիկայի, ֆիզիկայի, քիմիայի ամսագրերն այսօր ամենաբարձր որակն ունեն, դրված են ակադեմիայի գրադարանի կայքում` էլեկտրոնային են, բայց խնդիրն այն է, որ դրանք ռուսերեն են: Springer-ն այդ ամսագրերն առաջխաղացնելու ցանկություն ունի»,-նշեց նա:

1842 թվականին Յուլիուս Շպրինգերը Բեռլինում բացեց գրքի խանութ: Հետագայում հիմնադրվեց նաև հրատարակչություն: 1917 թվականին ընկերությունը հրատարակեց Էյնշտեյնի աշխատանքներից մեկը, 1920-ին սկսեց հրատարակել Mathematische Annalen ամսագիրը, որի խմբագիրներից էր ինքը` Էյնշտեյնը: 1964-ին ընկերությունը ներկայացուցչություն բացեց Նյու Յորքում: