Մեկ տարի է դիզայները դատարանի միջոցով չի կարողանում «Լիգա Փրես» ՍՊԸ–ից իր աշխատավարձը ստանալ. «Փաստ»

«Փաստ» օրաթերթը գրում է.

Այսօր, հուլիսի 27–ին՝ հինգշաբթի, Կենտրոն և Նորք–Մարաշ ընդհանուր իրավասության դատարանում տեղի կունենա Լուսինե Մնացականյանն ընդդեմ «Լիգա Փրես» ՍՊԸ–ի երրրորդ նիստը: Տեղեկացնենք, որ ընկերությունը տպագրում է «Լաքշրի» ամսագիրը, որի շրջանակներում էլ համագործակցության մասին պայմանավորվածություն են ձեռք բերել և փորձել են աշխատել:

Լուսինե Մնացականյանը դիմել է դատարան իր և ընկերության աշխատանքային հարաբերությունների փաստը հաստատելու և չվճարված աշխատավարձի գումարը բռնագանձելու պահանջով, որն ի դեպ, հատկապես տպագիր մամուլի դեպքում ապացուցելը բավականին հեշտ է: Նախադեպեր արդեն եղել են, երբ թղթակիցները տպագրված հոդվածի վերջում ստորագրված անուն ազգանունով կարողացել են ապացուցել փաստը: Այնպես որ ամսագրի պարագայում, պետք է որ դա ապացուցելն այնքան էլ դժվար չլինի:

Տեղեկացնենք, որ Լ. Մնացականյանը ընկերության հետ համագործակցել է որպես դիզայներ: 120 էջանոց գովազդային նյութեր պարունակող ֆեյշն ամսագրի դիզայնի համար նրան խոստացել են 100 հազար դրամ գումար վճարել: Ինքը համաձայնել է, սակայն գործն ավարտելուց հետո սկզբում ասել են, որ իր աշխատավարձը ամսագիրը տպագրելուց հետո կտա, բայց հետո կրկին չեն վճարել ու փորձել են այսօր` «գնա, վաղն արի» տարբերակով հոգնեցնել նախկին աշխատակցուհուն:

Լ. Մնացականյանը «Փաստին» տեղեկացրեց, որ իրնքը «Լիգա Փրես» ՍՊԸ Էռնեստ Մարկոսյանի հետ երբեք էլ չի հանդիպել: Աշխատանքային ու վճարման հարցերի մասին պայմանավորվել է ընկերության տնօրենի մորաքրոջ հետ, քանի որ նա է նման գործերով զբաղվում: Եբվ տեսնելով, որ նրանք իր աշխատավարձը չեն պատրաստվում վճարել, դիմել է դատարան գումարի բռնագանձման պահանջով:

«Ես որ սկզբում սկսեցի աշխատել, հետո իմացա, որ այդ ամսագրում այդ ոճով են աշխատում և աշխատավարձերը չեն վճարում, բայց զարմանում եմ, որ մինչև հիմա որևէ մեկը այս ընկերությանը դատի չի տվել: Բոլորը համակերպվել են այդ իրավիճակի հետ: Բայց ես իմ սկզբունքներն ունեմ և դրա համար եմ դատարան դիմել, բայց ցավն այն է, որ պատասխանող կողմը չի ներկայանում դատարան»,– ասաց դիզայները:

Ի դեպ, Լ. Մնացականյանը լրատվամիջոցներին ուղարկած իր նամակում գրել էր նաև, որ ամեն ինչ պետք է անել, որ վերջ դրվի՝ աշխատեցնել ու չվճարել սկզբունքին:

«Ի վերջո, հնարավոր չէ բարեկեցություն կառուցել որևէ երկրում, եթե չկա արժանապատիվ աշխատանքի ու վճարումների մեխանիզմ: Ցավոք, մեր ոլորտում նույնպես կան կազմակերպություններ, որտեղ աշխատողը ամսվա վերջում կարող է պարզել, որ աշխատավարձ չունի ստանալու… Ես մեդիա ոլորտում մի այդպիսի կազմակերպության հետ արդեն գրեթե 1 տարուց ավել դատական վեճի մեջ եմ, որ շքեղ կեցության մասին «Լաքշրի» ամսագիր է տպագրում, բայց աշխատողներին աշխատեցնելու, աշխատողներին աշխատավարձ չվճարելու տարիների փորձ ունի: Ի վերջո առողջ հասարակության մեջ պետք է բոլորը ճանաչեն նրանց, ովքեր որպես գործատու մուրացկանի հոգեկերտվածքի մեջ են, անկախ նրանից, թե ինչի մասին են իրենց իրավունք վերապահում գրել»:

Ու թեև դժվար է պատկերացնել, թե ինչ «լուք» ունի այդ ամսագիրը, բայց անկեղծ ասած զարմանալի է, որ նման ամսագրերը կարողանում են գոյատևել ու դեռ մի բան էլ դիմանալ մրցակցությանը: Չնայած եթե դա արվում է աշխատողներին աշխատավարձ չվճարելու հաշվին, ապա ժամանակն է, որ նրանցով ավելի լուրջ զբաղվեն պատկան կառույցները և բացահայտեն, թե մինչ օրս քանի աշխատակից է նրանց համար ձրի աշխատել ու չի վճարվել:

Շարունակությունը` «Փաստ» օրաթերթի այսօրվա համարում