Ադրբեջանում պայթյունավտանգ իրադրություն է. ռուսաստանյան ԶԼՄ-ներ

 Ադրբեջանում արագորեն աճում է կրոնական արմատականների թիվը: Սիրիայում մարտական փորձ ձեռք բերած ծայրահեղականների նոր խմբաքանակների ժամանումն Անդրկովկաս կարող է ներսից պայթեցնել տարածաշրջանի կայունությունը եւ խնդիրներ առաջացնել Ռուսաստանի համար:

Այս մասին, գրում է ռուսաստանյան  Lenta.ru-ն` նշելով, որ սիրիական հակամարտության գոտում Ադրբեջանի քաղաքացիների թիվը հասնում է հազարի:

Կայքը հայտնում է, որ չնայած իսլամիստների ակտիվ մեկնումին Մերձավոր Արեւելք, չի կարելի ասել, թե Ադրբեջանում հանգստություն է հաստատվել: Հակառակը` այդ երկրում կրոնական ծայրահեղականության հետ կապված կացությունը շարունակում է վատանալ, իսկ իսլամիստական ընդհատակն օրեցօր ընդլայնվում եւ ամրապնդվում է:

Կայքը հայտնում է, որ ռուսաստանյան ԶԼՄ- ների գնահատականով` դրությունն Ադրբեջանում պայթյունավտանգ է:

«Մահմեդական Ադրբեջանը ռիսկ է անում բախվել ամբողջ պետությանը վնասող մասշտաբային խնդիրների հետ: Ադրբեջանում առավել անհանգիստ շրջանները եղել են ռուսաստանյան Դաղստանի հետ սահմանակից հյուսիսային շրջանները, որոնք բնակեցված են ոչ միայն ադրբեջանցիներով, այլ նաեւ ավարներով, լեզգիներով: 1990-ական թվականներին հենց այստեղ է ի հայտ եկել Թուրքիայից, արաբական երկրներից եկած, ինչպես նաեւ ռուսաստանյան «վահաբական» էմիսարների ազդեցությունը: Սակայն, վերջին երկու տասնամյակում սալաֆիների (իսլամի սունի ծայրահեղական հոսանք) խոշոր համայնքներ են ծագել եւ ամրացել Բաքվում եւ Սումգայիթում: 2000-ական թվականներին, մինչեւ իշխանությունների վարչական արգելքներ մտցնելը, Բաքվի սունի մզկիթներում հազարավոր մարդիկ էին մասնակցում ուրբաթօրյա աղոթքներին: Այդ համայնքներին, որոնցից ծագում են իսլամիստ-մարտիկների մեծ մասը, վերջին տարիներին միանում են նաեւ ավանդաբար շիա ընտանիքների անդամները (Ադրբեջանի բնակչության 85 տոկոսը կազմում են շիա մուսուլմանները):

Մյուս վտանգավոր միտումը, որը կարող է խաթարել Ադրբեջանում կայունությունը ներսից, բնակչության մեծամասնությունը կազմող շիաների եւ իսլամի սունի ուղղության կողմնակիցների միջեւ հարաբերությունների վատացումն է: Արտաքին գործոնները (Մերձավոր Արեւելքում փաստորեն կրոնական պատերազմ է գնում շիաների եւ սունիների միջեւ) եւ Ադրբեջանի ներսում երկու կրոնական ուղղությունների արմատական ներկայացուցիչների ռազմատենչ հռետորաբանությունն անում են իրենց գործը: Սիրիական հակամարտության արձագանքն Ադրբեջանում հնչում է ավելի ու ավելի հստակորեն», -գրում է lenta.ru-ն: