Մայիսին ավելի քան 8 միլիարդ դրամի առևտուր է եղել ավտոմեքենաների շուկայում

ЭКОНОМИКА 15 Июль, 2017 12:00

Ազգային վիճակագրությունը հրապարակել է այս տարվա մայիս ամսվա առևտրաշրջանառության ցուցանիշները, ըստ որի` մայիս ամսին այն կազմել է 208 միլիարդ 611 միլիոն դրամ, իսկ հունվար–մայիս ամիսներին այն կազմել է 894 միլիարդ 484 միլիոն դրամ, ինչը նախորդ տարվա նույն ժամանկահատվածի նկատմամբ աճել է 12,8 %–ով: Նշված ավելի քան 208 միլիարդ դրամից 108 միլիարդ 538 միլիոն դրամը մանրածախ առևտրից է գոյացել, 91 միլիարդ 898 միլիոն դրամը մեծածախ, իսկ 8 միլիարդ 174 միլիոն դրամն էլ ավտոմեքենաների առևտրից: Ընդ որում` այս թիվը մոտ 5%–ով պակաս է 2016 թ. նույն ժամանկահատվածի հետ համեմատած և 8%–ով էլ ավել է այս տարվա ապրիլ ամսին գրանցված ցուցանիշների համեմատությամբ:

Առհասարակ այս տարվա առաջին կեսում՝ հունվար–մայիս ամիսներին ավտոմեքենաների շուկայում իրականացված առևտուրը կազմել է 36 միլիարդ 212 միլիոն 300 հազար դրամ: Ի դեպ, սա էլ 26,6 %–ով ավել է նախորդ տարվա նույն ամիսներին գրանցված առևտրի արժեքից:

Մանրածախ առևտրի շրջանառությունը իրականացվել է հիմնականում խանութներում, սպառողական ապրանքների շուկաներում, գյուղատնտեսական արտադրանքի շուկաներում, կրպակներում և այլ առևտրի օբյեկտներում: Ըստ ուսումնասիրության՝ ամենից մեծ եկամուտ մայիս ամսվա համար ապահովել են խանութները, այն է՝ 88 միլիարդ 75 միլիոն դրամի չափով, իսկ ամենից քիչ՝ գյուղատնտեսական արտադրանքի շուկաները՝ մի փոքր ավելի 1,5 միլիարդ դրամից:

Ուսումնասիրությունից նաև տեղեկանում ենք, որ ապրանքային պաշարների ծավալները մանրածախ առևտրում և դրանց ապահովվածությունն օրերով հունիսի 1–ի դրությամբ կազմում է համապատասխանաբար՝ 157 միլիարդ 394 միլիոն 400 հազար դրամ և 28 օր: Ընդ որում հունիսը ապրանքների ապահովվածության ամենանվազագույն օրերն է ունեցել: Իսկ մինչ այդ այս թիվն ավելի մեծ է եղել: Առհասարակ այն հունվարին կազմել է 51, փետվարին՝ 42 և աստիճանաբար նվազելով՝ հունիսին կազմել 28:

2017 թ. մայիսին Հայաստանում իրականացված ծառայությունների ծավալները կազմել են 115 միլիարդ 657 միլիոն 100 հազար դրամ, որի առյուծի բաժինը գոյացել է ֆինանսական և ապահովագրական գործունեությունից՝ կազմելով 24 միլիարդ 685 միլիոն 700 հազար դրամ: Ամենից քիչ եկամուտներ են գոյացել անշարժ գույքի հետ կապված գործունեությունից, այն է՝ 3 միլիարդ 925 միլիոն 700 հազար դրամ:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ