ՊԵԿ–ը ոլորտը «մաքրելու» շրջանակներում հասավ «կարգոներին». «Փաստ»

«Փաստ» օրաթերթը գրում է.

Պարզվում է՝ մանր և միջին ձեռնարկատերերը երկար տարիներ Թուրքիայից, Չինաստանից, Արաբական Միացյալ Էմիրություններից ապրանք ներկրելիս օգտվել են այսպես կոչվող կարգոների ծառայություններից: Նրանք տարբեր երկրներում գնված ապրանքը տեղում վերցրել են, այն Հայաստան տեղափոխել ու «հանձնել» բիզնեսով զբաղվող մարդկանց:

Թե այդ բուրգի որ հատվածում ով է կանգնած եղել, այնքան էլ պարզ չէ, բայց որ այդ «կառույցների» միջոցով երկար տարիներ հնարավոր է եղել բավականին մեծ գումարներ աշխատել՝ փաստ է: Բնականաբար նշված եղանակով ապրանք ներկրելու ժամանակ կարգոներն էլ իրենց խաղի կանոններն են սահմանել, որը մի կողմից թույլ չի տվել, որ մանր բիզնեսով զբաղվողները ուսումնասիրեն ու հասկանան տեղափոխման գործընթացի մանրամասները, մյուս կողմից էլ կարողանան ինքնուրույն պաշտպանել իրենց օրինական շահերն ու իրավունքները:

Հիմա, երբ եկել է կարգոների գործունեությունը կանոնակարգելու ժամանակը, ձեռնարկատերերը սկսել են անհանգստանալ: Նրանք չեն պատկերացնում, թե հիմա ինչ եղանակով ու կարգով պետք է այլ երկրներում գնված ապրանքը ներկրեն Հայաստան: Այս օրերին ՊԵԿ–ը բոլոր տնտեսվարողներին մեկ առ մեկ բացատրում է առաջարկվող տարբերակի առավելությունները, բայց մյուս կողմից, մեզ հասած տեղեկությունների համաձայն, հին ձևերով աշխատող կարգոները որոշել են բոյկոտել, ապրանք չներկրել ու նոր աղմուկ–աղաղակ բարձրացնել:

«Փաստը» որոշեց սեփական լրագրողական ուսումնասիրությունն անել ու պարզել, թե իրականում կարգոներն ինչ սկզբունքներով, ինչ դրույքաչափերով և պայմաններով են ապրանքի ներկրումն իրականացնում:

Մեր զրուցակիցը, ով արդեն երկար տարիներ է կոշիկի առք ու վաճառքով է զբաղվում, ասաց, որ արդեն երեք տարի է կոշիկ չի ներկրում, քանի որ ներկրման պայմանները գնալով վատացել են: Դրա համար էլ հիմա տեղում կոշիկի փոքր արտադրություն է հիմնել և իր կարած կոշիկներն է վաճառում տոնավաճառում:

«Ես Չինաստանից կոշիկ էի ներկրում: Այն գրասենյակը, որը դեպի Չինաստան բիզնես–տուր էր կազմակերպում, ինքն էլ մեր գնած ապրանքները բերում էր Հայաստան, մաքսազերծում էր և մեզ տալիս: Սկզբում ապրանքի տեղափոխման ու մաքսազերծման հետ կապված բոլոր ծախսերը 1 կգ–ի դիմաց կազմում էր 2–2,20 դոլար: Հետո այդ գումարը կամաց–կամաց բարձրացրեցին մինչև 7 դոլար: Այդ ժամանակներից ես այլևս կոշիկ չեմ ներկրում: Իմ տեղեկություններով հիմա նորից իջեցվել է մինչև 5–6 դոլար, բայց կրկին ձեռնտու չէ, քանի որ մի կոշիկն իր տուփով բավականին քաշ է ունենում: Եղել են դեպքեր, որ մեկ տուփի քաշը 1,2 կգ է եղել, այսինքն, մոտ 8,5 դոլար ավելացել է կոշիկի գնին: Այդ պայմաններում ապրանք իրացնել հնարավոր չէր, ես էլ փոխեցի իմ բիզնեսի ռազմավարությունը»,– ասաց մեր զրուցակիցը:

Պարզելու համար, թե գործող կարգոները 1 կգ–ն ինչքան գումարով են ներկրում, զանգահարեցինք մի քանի բեռնափոխադրող ընկերություններ: Նրանցից մի քանիսն ասացին, որ պայմաններին հարկավոր է ծանոթանալ տեղում, քանի որ օն–լայն սկզբունքով նման տեղեկություն չեն տրամադրում: Մի մասն էլ ընդհանրապես հերքեցին, որ իրենք Թուրքիայից կամ Միացյալ Էմիրություններից ապրանք են ներկրում Հայաստան` պատճառաբանելով, որ իրենք աշխատում են գրանցած ընկերությունների հետ, իսկ անհատներին սպասարկելով չեն զբաղվում:

Անկեղծ ասած լավ է, որ ՊԵԿ–ը ոլորտը «մաքրելու» գործընթացի շրջանակներում փորձում է նաև կարգոների աշխատանքը կանոնակարգել, քանի որ նրանց կողմից 1 կգ ապրանք տեղափոխելու, մաքսազերծելու համար սահմանած 5,6,7 դոլար գումարը բավականին թանկացնում է ապրանքի արժեքը և դժվարություններ առաջացնում իրացման ժամանակ: Հուսանք, որ այս նոր բարեփոխումը կբարելավի բիզնեսի վիճակը, որն էլ իր հերթին շղթայական ռեակցիա կառաջացնի և կբարելավի վաճառականների պայմանները:

Շարունակությունը` «Փաստ» օրաթերթի այսօրվա համարում: