Հայաստանը սպառազինությունը ստանում է Ռուսաստանից, իսկ արժեքներն ու փորձառությունը՝ ՆԱՏՕ-ից. Ռիչարդ Կիրակոսյան

Տարածաշրջանային հետազոտությունների կենտրոնի ղեկավար Ռիչարդ Կիրակոսյանը ՆԱՏՕ-Հայաստան համագործակցության երեք կարևոր գործոն է առանձնացնում: «ՆԱՏՕ-ն Վարշավայից Բրյուսել՝ մարդկային անվտանգության և  անվտանգության ոլորտի բարեփոխումները Հայաստանում» խորագրով միջազգային համաժողովի ժամանակ Ռիչարդ Կիրակոսյանն ընդգծեց, որ համագործակցության առաջին կարևոր գործոնը փորձի փոխանակումն է: «Նախ՝ երբ նայում ենք Հայաստան-ՆԱՏՕ հարաբերություններին՝ փորձառության փոխանակումն է, Հայաստանի ունակությունը՝ պատրաստվել գալիք սպառնալիքներին ու մարտահրավերներին։ Կարևոր է նաև հայկական զինված ուժերի արդիականացումը և պրոֆեսիոնալիզացիան։ Ի տարբերություն իր հարևանների՝ Հայաստանն առաջարկում է ավելի կանխատեսելի, կայուն և պրոֆեսիոնալ զինուժ»,- «Արմենպրես»-ի փոխանցմամբ՝ նշեց նա։

Հայաստան-ՆԱՏՕ հարաբերությունների երկրորդ կարևոր գործոնը, ըստ Կիրակոսյանի՝ վերաբերում է նոր հնարավորություններին: Նրա խոսքով՝ Հայաստանի առջև բացվող առաջին հնարավորությունը քաղաքացիական վերահսկողության կարևորությունն է, որը, մասնավորապես, կարևոր է Հայաստանի համար հիմա, քանի որ երկիրն անցնում է խորհրդարանական կառավարման համակարգի։

«Ի տարբերություն հետխորհրդային շատ պետությունների՝ Հայաստանը տպավորիչ և կայուն հարաբերություններ ունի քաղաքականության և զինուժի միջև, զինուժը չի խառնվում քաղաքականությանը։ Այս իմաստով մեծ առավելություններ ունենք մեր հարևանների նկատմամբ։ Երկրորդ կարևորությունն ինստիտուցիոնալ պատասխանատվությունները զարգացնելու հնարավորությունն է: Եվ վերջապես, նոր հնարավորություններ են բացվում Հայաստանի առջև, ինչը թույլ է տալիս նվազեցնել մեկ գործընկերոջից գերկախվածության մեջ լինելու ռիսկերը»,- ասաց փորձագետը։

Հայաստան-ՆԱՏՕ հարաբերությունների երրորդ և վերջին կարևոր գործոնն այն է, թե ինչպես է Հայաստանը զարգանում. «Հայաստանն անվտանգության սպառող չէ, այլ դարձել է նպաստ բերող տարածաշրջանային և համաշխարհային անվտանգությանը։ Դրա մասին են վկայում տարբեր երկրներում տեղակայված մեր խաղաղապահ ուժերը։ Հայաստանը՝ որպես ՆԱՏՕ-ի վստահելի գործընկեր, նշանակալի հնարավորություններ է ընձեռում ՆԱՏՕ-ի մանդատն ու առաքելությունն ամրացնելու հարցում։ Այս իմաստով՝ մենք պետք է խորացնենք գիտելիքները ՆԱՏՕ-Հայաստան հարաբերությունների մասին, և իրատեսական ակնկալիքներ ունենանք ՆԱՏՕ-ից։ Առաջին հերթին՝ մենք ՆԱՏՕ-ի գործընկերն ենք, ոչ թե՝ անդամը»,- ընդգծեց Ռիչարդ Կիրակոսյանը։

Նա հավելեց, որ Հայաստան-ՆԱՏՕ հարաբերությունների խորացումը Հայաստանի կողմից հակառուսական ջանքեր չեն: Նա նշեց, որ Հայաստանը Եվրասիական տնտեսական միության, ՀԱՊԿ անդամ հանդիսանալով՝ եզակի օրինակ է, որ ՆԱՏՕ-Ռուսաստան մրցակցությունը չի կարող Հայաստանը մեկուսացված դարձնել: «Մենք մեր սպառազինությունը ստանում ենք Ռուսաստանից, իսկ արժեքներն ու փորձառությունը՝ ՆԱՏՕ-ից, մենք երկուսի կարիքն էլ ունենք»,- եզրափակեց փորձագետը։