Զոհված զինծառայողների ընտանիքներին գումարի փոխարեն բնակարան կամ դրա գնման վկայագիր կտրվի. «Փաստ»

«Փաստ» օրաթերթը գրում է.

ՀՀ պաշտպանության նախարարության կողմից մշակվել է նախագծերի մի փաթեթ, որը կհստակեցնի հաշմանդամության զինվորական կենսաթոշակ ստացող նախկին զինծառայողների և զոհված (մահացած) զինծառայողների ընտանիքների բնակարանային ապահովության գործող ընթացակարգերը, ինչպես նաև բնակարանային ապահովության գործընթացն առավել թափանցիկ և հասցեական կդարձնի:

Մասնավորապես, եթե նախկինում վերոնշյալ ընտանիքների բնակարանային ապահովվածությունն իրականացվում էր անհատույց պետական ֆինանսական աջակցության տրամադրման միջոցով, ապա այս նոր փաթեթով նրանց կտրվի սեփականության իրավունքով անհատույց բնակարան կամ բնակարանի գնման վկայագրով անհատույց պետական ֆինանսական աջակցություն:

Ըստ նախագծի՝ ՀՀ տարածքում բազմաբնակարան բնակելի շենքերի բնակարանների ձևավորված շուկայական միջինացված գնի մասին տվյալները տրամադրվում է Անշարժ գույքի կադաստրի պետական կոմիտեի կողմից, իսկ բնակարան ձեռք բերելու նպատակով անհատույց պետական ֆինանսական աջակցության չափը հաշվարկվում է` ելնելով աջակցություն տրամադրելու պահին նախորդող եռամսյակի դրությամբ տվյալ տարածաշրջանում բնակարանի ձևավորված շուկայական միջին գնից:

Եվ ստացվում էր, որ այս կարգի կիրարկման ժամանակ գյուղական վայրերի համար արհեստականորեն բարձրացվում են տրամադրվող գումարների չափերը, ընդ որում` որոշ մարզերում նույնիսկ կրկնակի և ավելի անգամ գերազանցում են մարզկենտրոնի համար վճարվող գումարներին:

Օրինակ, Անշարժ գույքի կադաստրի պետական կոմիտեի կողմից 2017 թ. 1–ին եռամսյակի համար տրամադրած տեղեկատվության համաձայն` Կոտայքի մարզկենտրոն Հրազդան քաղաքի բազմաբնակարան բնակելի շենքերի բնակարանների միջին գինը 1 սենյակի համար կազմել է 2 միլիոն 849 հազար դրամ, մինչդեռ տվյալ մարզի գյուղական համայնքներում որոշմամբ սահմանված կարգով 1 սենյակի հաշվարկված գինը կազմել է 6 միլիոն 34 հազար դրամ, ինչն ավելի քան երկու անգամ բարձր է մարզկենտրոնի գներից: Կոտայքի մարզում գյուղական վայրերի բնակարանների գների արհեստական բարձրացմանը նպաստում են Ծաղկաձոր քաղաքի բազմաբնակարան բնակելի շենքերի բնակարանների շուկայական միջինացված գները, որոնք ավելի բարձր են, քան Երևան քաղաքում: Երևանում 1 սենյականոց բնակարանի գինը կազմում է 12 միլիոն 760 հազար դրամ, իսկ Ծաղկաձորում` 13 միլիոն 158 հազար: Նույնատիպ խնդիր առկա է նաև Գեղարքունիքի, Լոռվա, Արագածոտնի, Արարատի, Արմավիրի, Շիրակի, Սյունիքի և Տավուշի մարզերում:

Որոշմամբ սահմանված կարգով անհատույց պետական ֆինանսական աջակցություն ստանալուց հետո շահառուների մի ստվար զանգվածը սեփականության իրավունքով բնակարաններ չեն ձեռք բերում, իսկ աջակցության գումարները ծախսելով այլ կարիքների համար նրանց բնակարանային խնդիրները փաստացի մնում են չլուծված:

Որոշման նախագծի համաձայն՝ հաշմանդամություն ունեցող նախկին զինծառայողների և զոհված զինծառայողների ընտանիքների բնակարանային ապահովությունն իրականացվելու է` Երևան քաղաքում` սեփականության իրավունքով անհատույց բնակարան տրամադրելու, իսկ այլ քաղաքային և գյուղական համայնքներում՝ նաև բնակարանի գնման վկայագրով անհատույց պետական ֆինանսական աջակցություն տրամադրելու միջոցով: Միաժամանակ կսահմանվեն ըստ շահառուների կարգավիճակի բնակարանային ապահովման առաջնահերթությունները, կհստակեցվեն աջակցության տրամադրման չափերը` ըստ քաղաքների և գյուղերի:

 Շարունակությունը` «Փաստ» օրաթերթի այսօրվա համարում: