«Չե´ք անցկացնի»-ն՝ «Նոր Հայաստան»-ի մասին

«Չե´ք անցկացնի» նախաձեռնությունը ողջունում է «Նոր Հայաստան» փրկության ճակատի ստեղծումը: Այդ մասին Past.am-ի հետ զրույցում ասաց նախաձեռնության խորհրդի անդամ Հրայր Մանուկյանը:

«Մենք իրենց հետ համատեղ աշխատում և աշխատելու ենք, համատեղ կփորձենք կանխել ընտրակեղծիքները»,- ասաց Մանուկյանը: Արձագանքեցին, որ Ժիրայր Սեֆիլյանն ասել է, որ նպատակը միասնական ճակատ կազմելն է, ապա հարցրինք, թե հնարավոր տեսնում են, որ «Չե´ք անցկացնի»-ն և «Նոր Հայաստանը» հանդես գան միասնական ճակատով: Ի պատասխան Հրայր Մանուկյանը նշեց, որ ոչինչ պետք չէ բացառել, ապա կարծիք հայտնեց, որ դա զուտ մարտավարական և ռեսուրսների գնահատման հարց է:

«Հարցն այն է, թե որ պահին պետք է միասնական հանդես գալ, որ պահին առանձին-առանձին, երկու կողմերից «խփել» իշխանությանը»,- մեկնաբանեց խորհրդի անդամը:

Անդրադառնալով արտահերթ նախագահական և խորհրդրարանական ընտրություններ անցկացնելու «Նոր Հայաստանի» պահանջներին՝ Հրայր Մանուկյանը շեշտեց, որ այս պահին ռեսուրսների և հնարավորությունների գնահատման տեսակետից իրենք հասկանում են, որ «ոչ»-ի հաղթանակը միաժամանակ ենթադրում է նաև իշխանության թուլացում և հեռացում: Ելնելով դրանից՝ մեր զրուցակցի կարծիքով «Չե´ք անցկացնին» «Նոր Հայաստանի» հետ սկզբունքային տարբերություններ չունի:

Պատասխանելով մեր հարցին, թե նախաձեռնության հոկտեմբերի 30-ի հանրավաքին արդյոք կմասնակցի նաև Ժիրայր Սեֆիլյանը կամ «Ժառանգության» որևէ ներկայացուցիչ, հաշվի առնելով, որ վերջիններս հանդես են գալու առանձին ճակատով, Հրայր Մանուկյանն ասաց.

«Այս պահին նրանց հետ չենք հստակեցրել վերջնական կազմը, իսկ նախնական համաձայնություն եղել է»:

Լիլիթ Լալայան