Հայկական տաղավարը գրավել է Պեկինի միջազգային բարեգործական տոնավաճառի այցելուներին

Չինաստանի արտաքին գործերի նախարարության հովանու ներքո Պեկինում հոկտեմբերի 11-ին անցկացվել է «Սերը սահման չի ճանաչում» խորագրով ամենամյա միջազգային բարեգործական տոնավաճառ, որին առանձին տաղավարով մասնակցել է նաև Հայաստանը: Ինչպես տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, միջոցառմանը ներկա են եղել Չի նաստանի արտաքին գործերի նախարար Վան Յին, բարձրաստիճան պաշտոնյաներ, Պեկինում հավատարմագրված շուրջ 100 դիվանագիտական ներկայացուցչությունների և միջազգային կազմակերպությունների ղեկավարներ, դիվանագետներ:

Բացման արարողությունից հետո նախարար Վան Յին այցելել է մի քանի երկրների` այդ թվում հայկական տաղավար: Չինաստանում ՀՀ դեսպան Արմեն Սարգսյանն արտաքին գործերի նախարարին է ներկայացրել այնտեղ ցուցադրված ապրանքատեսականին, այդ թվում հայկական կոնյակը, գինին, ազգային տարատեսակ ուտեստները, հուշանվերները, Հայաստանի մասին պատմող գրքերն ու տպագիր նյութերը, որոնց վաճառքից գոյացած ամբողջ հասույթը փոխանցվելու է տոնավաճառի հիմնադրամին:

Նախարար Վան Յին Չինաստանի կառավարության անունից իր խորին շնորհակալությունն է հայտնել բարեգործական ամենամյա այս նախաձեռնությանը ՀՀ դեսպանության` արդեն ավանդույթ դարձած ակտիվ մասնակցության համար:

Բարեգործական տոնավաճառի այս տարվա հասույթն ուղղվելու է Չինաստանի Յուննան նահանգի գյուղական շրջանների դպրոցների ուսուցիչների սոցիալական վիճակը բարելավելու գործին:

Հոկտեմբերի 7-11-ը Պեկինում տեղի է ունեցել Չինաստանի կերպարվեստի միջազգային ցուցահանդես-տոնավաճառը, ուր ներկայացված են եղել Չինաստանի և տարբեր երկրների արվեստագետների ստեղծագործություններ: Մշակութային կազմակերպությունների և նկարիչների միությունների հետ մեկտեղ ցուցահանդեսի կազմակերպիչներն առանձին տաղավարներ են տրամադրել նաև Պեկինում հավատարմագրված մի քանի երկրների դիվանագիտական ներկայացուցչություններին, այդ թվում՝ Չինաստանում ՀՀ դեսպանությանը: Վերջինիս աջակցությամբ այստեղ ցուցադրվել են հայաստանցի գեղանկարիչ Ալեքսանդր ԴերոÕ �անի քսանից ավելի կտավներ: Հատկանշական է, որ այցելելով Չինաստանի տարբեր քաղաքներ և ոգեշնչվելով տեղի հարուստ մշակույթով ու բնապատկերներով՝  հեղինակին հաջողվել էր ստեղծել հայկական կերպարվեստի հարուստ ավանդույթներով ու հայկական բնապատկերներով համադրված չինական մոտիվներով ստեղծագործությունների շարք: Տաղավարում ներկայացվել են նաև Հայաստանի մասին պատմող գրականություն, Հայաստանի զբոսաշրջային ոլորտը գովազդող նյութեր, հուշանվերներ:

Հայկական տաղավարի ներկայացման արարողությանը մասնակցել է Չինաստանում ՀՀ դեսպան Արմեն Սարգսյանը, ով ցուցահանդեսի կազմակերպիչներին, չին արվեստագետներին ու այցելուներին, ինչպես նաև չինական լրատվամիջոցների ներկայացուցիչներին համառոտ ներկայացրել է հայկական կերպարվեստը, մշակույթը և պատմությունը, հայ-չինական մշակութային կապերը, ինչպես նաև հայ-չինական պատմական առնչությունները: Դեսպանը խոսել է նաև երկու ժողովուրդների միջև բարեկամական հարաբերությունների, դրանց ամրապնդման ու զարգացման մասին՝ կարևորելով մշակութային շփումներն ու փոխանա կումները:

Հայկական տաղավարն արժանացել է այցելուների և կազմակերպիչների բարձր գնահատականին: