Հայաստանն «Աստանա Էքսպո 2017» ցուցահանդեսին կներկայանա «Մետաքսի ճանապարհ» հավաքական տաղավարում

ОБЩЕСТВО 9 Июнь, 2017 17:36

Հայաստանն «Աստանա Էքսպո 2017» միջազգային մասնագիտացված ցուցահանդեսին կներկայանա «Մետաքսի ճանապարհ» կոչվող հավաքական տաղավարում:

ՀՀ Նախագահ Սերժ Սարգսյանը մեկնել է Ղազախստան՝ մասնակցելու «Աստանա Էքսպո 2017» միջազգային մասնագիտացված ցուցահանդեսի բացման պաշտոնական արարողությանը:

«Արմենպրես»-ի հաղորդմամբ՝ հայկական տաղավարը գտնվում է հսկա ցուցահանդեսային համալիրի 411-րդ հատվածում՝ «Մետաքսի ճանապարհ» խորագրի ներքո: Աստանայի ցուցահանդեսն առաջինն է, որ անցկացվում է ԱՊՀ մասնակից-պետություններից մեկում: Ցուցահանդեսը կտևի 3 ամիս` հունիսի 10-ից սեպտեմբերի 10-ը: Իրենց մասնակցությունն են հաստատել 115 պետություն և 18 միջազգային կազմակերպություն:

Կազմակերպիչները հուսով են, որ մասնակից երկրները կներկայացնեն էներգախնայողության համաշխարհային լավագույն տեխնոլոգիաները, էներգիայի այլընտրանքային աղբյուրների օգտագործման բնագավառում առկա նորագույն մշակումները: Սպասվում է զբոսաշրջիկների մեծ հոսք: Ցուցահանդեսին առանձնահատուկ հետաքրքրություն կհաղորդեն ծրագրված մշակութային, ժամանցային բազմազան միջոցառումները և մասնակից երկրների Ազգային օրվան նվիրված տոնակատարությունները:

ЕXPO-2017 միջազգային մասնագիտացված ցուցահանդեսը, որի նախաձեռնողն է Ղազախստանի նախագահ Նուրսուլթան Նազարբաևը, Ղազախստանի իշխանության կողմից հռչակվել է որպես երկրի «առանցքային նախագծերից մեկը»: 2011թ. Ղազախստանը պաշտոնապես դիմել է ցուցահանդեսի անցկացման հայտով, իսկ 2012թ. ցուցահանդեսի համար ներկայացվել է էներգիայի այլընտրանքային աղբյուրներին և «կանաչ» տեխնոլոգիաներին նվիրված «Ապագայի էներգիա» խորագիրը (թեման):

2012թ. նոյեմբերի 22-ին տեղի ունեցած գաղտնի քվեարկությամբ Ցուցահանդեսների միջազգային բյուրոյի 161 անդամ պետություններից 103-ը պաշտպանել է Աստանայի թեկնածությունը:

Ցուցահանդեսի համալիրի շինարարությունը մեկնարկել է 2014թ. ապրիլին: Ցուցահանդեսը զբաղեցնում է 174 հա տարածք: Չորս համահավասար բլոկներում (C 1, C 2, C 3, C 4) տեղադրված ազգային տաղավարները դասավորված են կիսաշրջանաձև՝ Նուր-Ալեմ կոչվող կենտրոնական գնդաձև կառույցից միևնույն հեռավորության վրա: Կառուցվել են նաև մի քանի հազար բնակարան, խոշոր շինություններ' թեմատիկ, կորպորատիվ տաղավարների, առևտրի, ժամանցի, սպասարկման օբյեկտների համար:

Ընդ որում, արդեն հայտնի է, որ Ցուցահանդեսի փակումից հետո հիմնական շինությունները կտրամադրվեն Աստանայի միջազգային ֆինանսական նորաստեղծ կենտրոնին (որը կունենա հատուկ իրավական կարգավիճակ), ինչպես նաև ՄԱԿ-ի հովանու ներքո ստեղծվող Կանաչ էներգետիկայի միջազգային կենտրոնին, IT - ստարտափերին, Job World կրթական կենտրոնին և այլն: Ցուցահանդեսի առթիվ բուն Աստանայում կառուցվել է մոտ երեք տասնյակ հյուրանոց, վերանորոգվել գործողները, գործարկվել երկաթուղային նոր կայարանը և Աստանայի միջազգային օդանավակայանի նոր մասնաշենքը: Ցուցահանդեսի այցելուների անվտանգության ապահովման համար տեղադրված է 2000-ից ավելի տեսադիտարկման խցիկ, ներգրավված է 9 հազար ոստիկան: