Որպես տղամարդ եմ ասում՝ երեխան միակ երազանքն է, մնացած ամենը նպատակներ են. Դավիթ Հակոբյան

Life.panorama.am-ը գրում է.

Դերասան ամուսիններ Դավիթ Հակոբյանի և Նոնա Թելոյանի ընտանիքում այսօր եռակի տոն է: Երեկ նրանք նշում էին իրենց որդու մեկ ամյակը, նաև իրենց՝ ծնողներ լինելու առաջին տարեդարձը, դե իսկ այսօր տոնական տրամադրությունը շարունակելով՝ երջանիկ զույգն իրենց փոքրիկի հետ նշում է Երեխաների պաշտպանության միջազգային օրը:

Life.panorama.am-ի հետ զրույցում Դավիթ Հակոբյանը պատմել է մեկամյա Էդուրադի տարեդարձի, ընտանիքում տիրող մթնոլորտի և այսօրվա տոնական տրամադրության մասին:

«Արդեն մեկ տարի է, ինչ մեր ընտանիքի համար աշխարհը նոր ու բոլորովին ուրիշ գույներ ունի: Մենք օրհնված ենք, ինչի համար շնորհակալ ենք Աստծուն: Արդեն մեկ տարի է մեր առավոտները սկսում են որդուս ձայնով, իսկ դրա մասին միայն երազել կարելի է: Մենք արթնանում ենք լուսադեմին, բայց Էդուարդի ժպիտը մեզ բավարար է ողջ օրը բարձր տրամադրությամբ լինելու համար: Ես ու Նոնան համարում ենք, որ երեք ու այսօր եռակի տոն ունենք՝ Էդուարդի ծնունդը, մեր՝ ծնողներ դառնալու մեկ տարեկանը և Երեխաների պաշտպանության միջազգային օրը: Գիտեք, տղայիս մեծանալուն հետ մենք էլ ենք հոգեպես մեծանում, ավելի պատասխանատու դառնում, ավելի հստակ հասկանում, թե ինչ է պետք երեխայի դաստիարակության համար: Որպես տղամարդ եմ ասում՝ երեխան միակ երազանքն է, մնացած ամեն բան նպատակներ են: Եթե կյանքումդ կատարվում է միակ երազանքդ, ապա նպատակներդ ավելի հասանելի են դառնում: Երեխան ծնողի համար շատ ուժեղ ստիմուլ է, աննկարագրելի ուժ, որը ստիպում է էլ ավելի առաջ շարժվել ու մեծ բարձրունքների հասնել, և այդ ճանապարհին խնդիրները հաղթահարելի համարել»,- նշեց երջանիկ հայրիկը:

Դավիթի և Նոնայի ընտանիքում երեխայի դաստիարակության հարցում հատուկ մոտեցում կա. «Դաստիարակությունից առաջ մենք առաջին հերթին հետևում ենք մեր որդու առողջությանը թե ֆիզիկապես, թե հոգեպես: Մենք երբեք չենք հայտնվում այնտեղ, որտեղ թեկուզև մի երեխա թեթև մրսածություն ունի, նաև երբեք մեր որդուն չենք տանում որևէ միջոցառման, երբ ինքն է հիվանդ լինում, քանի որ այդպես կարող է վարակել մյուսներին: Սրանք մանր, բայց գաղափարային տեսանկյունից կարևոր հարցեր են, որը պետք է հասկանա յուրաքանչյուր ծնող, և իր երեխայից զատ՝ մտածի նաև մյուս երեխաների մասին: Ինչ վերաբերվում է հոգեպես առողջությանը, մենք օրինակ ենք ծառայում մեր որդուն: Մեր տանը առողջ մթնոլորտ է՝ սիրով ու հարգանքով լի: Մեր ընտանիքում համերաշխություն է տիրում, ինչը հաստատ մեծ նշանակություն կունենա Էդուարդի աշխարհընկալման ու որպես մարդ՝ ձևավորման վրա: Մենք սիրում ենք իրար ու սիրով մեծացնում մեր տղային: Կարևոր է նաև այն, որ այն սերը, որը մենք տալիս ենք մեր որդուն, կրկնապատկված ու եռապատկված ստանում ենք իրենից, ինչից թանկ բան աշխարհում չկա»,- ընդգծեց դերասան հայրիկը:

Խոսելով մեկամյա Էդուարդի մասին՝ Դավիթը պատմեց. «Մեր տղան ընդամենը մեկ տարեկան է, բայց արդեն շատ բան է հասկանում, մեկ-մեկ բաներ է անում, որից զարմանում եմ՝ կարծելով, որ դա ավելի մեծ տարիքի երեխաներին է բնորոշ: Տղաս երեկ գիտակցում էր, որ իր ծննդյան օրն էր, հաճույքով ընդունում էր բոլոր նվերները, ուրախանում ու իր դրական էներգիան փոխանցում բոլորին: Էդուարդը շատ է սիրում իրենից մեծ երեխաների և հատկապես աղջիկների: Հաճույքով արձագանքում է նրանց ու միշտ ժպտում»:

Հետաքրքրվելով, թե ծնողները ինչպե՞ս են կազմակերպել Էդուարդի առաջին տարեդարձը, Դավիթը պատմեց. «Ցերեկույթ էինք կազմակերպել, մեր կողքին էին մեր ընկերները, հարազատները, տատիկներն ու պապիկները, իսկ ծաղրածուն ու հանդիսավարը ամեն ինչ անում էին Էդուարդի տրամադրությունը բարձրացնելու համար: Ու թեև մեր տղան պոկեց ծաղրածուի մազերը, բայց նա շատ ջերմորեն շարունակեց տոնական օր նվիրել մեզ ու երեխաներին»:

Իսկ այսօր ծնողները Էդուարդի հետ շրջել են Երևանի կենտրոնով, մասնակցել երեխաների համար կազմակերպված տոնախմբություններին ու իրենց օրը լցրել տոնական օրվա ջերմությամբ:

Զրույցի վերջում Դավիթ Հակոբյանն իր շնորհավորանքը հղեց բոլոր փոքրիկներին. «Շնորհավորում եմ աշխարհի բոլոր փոքրիկների տոնը: Ուզում եմ, որ նրանք մեր իսկ կողմից միշտ պաշտպանված լինեն և ունենան առողջ ու անհոգ մանկություն»:

Հեղինակ՝ Անուշիկ Մելքոնյան