Հրեաները վերապահումով են մոտենում Թրամփի սիրուն

МЕЖДУНАРОДНОЕ 23 Май, 2017 16:04

Past.am-ը գրում է.

Մերձավորարևելյան տուրնեի շրջանակում՝ ԱՄՆ նախագահ Դոնալդ Թրամփի այցը Սաուդյան Արաբիայից Իսրայել, պատմական պիտի որակել, եթե հիշենք, որ սաուդիները Իսրայելի հետ չունեն դիվանագիտական հարաբերություններ և երկու երկրները փոխադարձաբար արգելել են միմյանց օդային տարածքը հատել նույնիսկ կոմերցիոն ինքնաթիռներին:

Թրամփի իսրայելյան բանակցությունների գլխավոր թեման, ըստ տեղի մամուլի, պաղեստինա–իսրայելյան խաղաղությունն է, Մերձավոր Արևելքում հաստատված դրությունը և հակաիրանական օրակարգը: Ու թեպետ ԱՄՆ նախագահը հենց օդակայանում հայտարարեց, որ ամբողջ սրտով է սիրում հրեա ժողովրդին, և Իսրայելում էլ, հունվարից սկսած, խանդավառ էին նրա ընտրությամբ, այդուհանդերձ, հաշվի առնելով մի շարք գործոններ, այստեղ սկսել են մտածել, որ Թրամփն օգտագործում է վարչապետ Նեթանյահուին՝ միաժամանակ բարեկամական ժեստեր անելով արաբների ուղղությամբ և տարվելով հարուստ բռնապետների տռուզ քսակով:

Կրակին յուղ է լցնում նաև այն փաստը, որ Սպիտակ տանը շատ էլ տեղեկացված չեն նախագահի իրական նպատակներից և հաճախ են իրարամերժ հայտարարություներ անում: Օրինակ՝ տուրնեից առաջ Սպիտակ տունը մի վիդեոհոլովակ էր հրապարակել, որում բառ անգամ չկար ԱՄՆ դեսպանատունը Երուսաղեմ տեղափոխելու՝ Թրամփի խոստման վերաբերյալ, բայց հստակ խոսվում էր պաղեստինյան պետության մասին: Կամ՝ հրապարակված էր Իսրայելի քարտեզը հին սահմաններով, առանց Սիրիայից վերցված Գոլանի բարձունքի, Հորդանանի արևմտյան ափի և այլն: Փաստ, որ ցնցել է հանրությանն ու վարչապետի կաբինետին, և նախարարներից ոմանք, չնայած պարտադրանքին, որոշել են չներկայանալ վարչապետի նստավայրում տրվող հանդիսավոր ընթրիքին՝ հայտարարելով, որ իրենք չեն հանդուրժի ինքն իրենից էլ գլուխ չհանող նախագահի ընթրիքին՝ իրենց վերապահված բուտաֆորիկ դերակատարումը: Արդարադատության նախարար Աելետ Շակետն էլ այնքան է զայրացել Սպիտակ տան հոլովակից, որ որոշել է անձամբ ճշտել՝ դա թյուրիմացությո՞ւն էր, թե՞՝ Օբամայի վարչակազմի ոչ բարեկամական քաղաքականության շարունակություն...

Ամեն դեպքում, Նեթանյահուն կաշվից դուրս է գալիս ինչ–որ բան գլուխ բերելու համար և, Թրամփի այցին ընդառաջ, արդեն իսկ որոշ զիջումների է գնացել Պաղեստինի հարցում՝ լուրջ դժգոհություն առաջացնելով հանրության շրջանում: Ամերիկյան կողմը գաղտնազերծել է դրա բովանդակությունը՝ նշելով, թե այժմ Իսրայելում աշխատանքի իրավունք ունեցող պաղեստինցիները կարող են ավելի հեշտորեն անցնել Արևմտյան ափ, կամ՝ ավելի հեշտությամբ աշխատանք գտնել Իսրայելում, որովհետև Ալլենբի կամրջի վրայի անցակետը կսկսի ավելի երկար աշխատել ու նման հնարավորություն տալ պաղեստինցիներին: Նրանց թույլատրված է նաև տներ կառուցել Հեբրոն քաղաքին հարակից շրջանում, որ վերահսկվում է Իսրայելի կողմից: Մի բան, որ Պաղեստինում բոլորովին էլ զիջում չեն համարում՝ համոզված պնդելով, թե խաղաղության հասնելու միակ ճանապարհն անկախ Պաղեստինի ճանաչումն է և Իսրայելի վերադարձն իր հին սահմաններին:

Այդ առումով որոշակիություն կլինի, թե ոչ՝ դժվար է ասել նույնիսկ պաշտպանության նախարար Ավիդգոր Լիբերմանի համար: Երեկ նա Ֆեյսբուքյան իր էջում գրեց, թե Թրամփի՝ Իսրայելի հանդեպ բարեկամական դիրքորոշումը մոտ 38 մլրդ դոլարի օգնությունն է՝ երկրի անվտանգության մակարդակը բարձրացնելու նպատակով, և դրան առայժմ այլընտրանք չկա: Այլ կերպ ասած՝ պայմանագիր կնքված է, ԱՄՆ–ն այդ գումարը կտրամադրի Իսրայելի, իսկ հետո կտեսնենք: Կկնքվի՞ խաղաղություն՝ լավ, չի՞ կնքվի, կապրենք, ինչպես ապրել ենք: Պարզապես՝ ավելի հզոր բանակով: Սա՛ է Լիբերմանի տրամաբանությունը, ինչին իսրայելական մամուլն այնքան էլ համաձայն չէ: Մաարիվն, օրինակ, նրան չկողմնորոշված նախագահ է որակել, Հաարեցը գրել է, թե այս տուրնեից միայն ԱՄՆ շահեց, իսկ ավելի շատ Իվանկա Թրամփը, որի Women Entrepresneurs հիմնադրամին սաուդի մեկենասները 100 մլն դոլար են տրամադրելու, Եդիոտ Ահրոնոտն էլ հեգնել է, թե՝ բայց ամուսինը՝ Ջարեդը, օրթոդոքս հրեա է, չէ՞, եթե անգամ Իվանկայի հրեա լինելուն ու Թրամփի սիրուն կասկածենք: Ստացվում է՝ շահել են հրեաները, ո՞րն է խնդիրը: Այց է, էլի՝ թող բարով–խերով ավարտվի, մարդուն ճանապարհենք Վատիկան, տեսնենք՝ Պա՞պն ինչ կասի:

Գոհար Սիմոնյան