Ինչպե՞ս ազատվել սեռական բարդույթներից. խորհուրդներ մասնագետից

Սեռական բարդույթներ առաջանում են գրեթե բոլորի մոտ: Գուցե մեկ, գուցեեւ՝ մի քանի: Սակայն բոլոր բարդույթներն էլ կարելի է հաղթահարել: Իսկ ինչպես՝ կպատմի սեքսոպաթոլոգ Վարդուհի Ալավերդյանը:

«Տարատեսակ էրոտիկ բնույթի արտադրանքի առկայությունը (ֆիլմեր, ամսագրեր, սեքս-խաղալիքներ) շատ կանանց եւ տղամարդկանց մոտ անվստահություն են առաջացնում: Մարդը սկսում է իրեն ոչ գրավիչ զգալ ինտիմ իմաստով: Որքան հաստատուն քայլերով է առաջ ընթանում սեռական հեղափոխությունը, այնքան անվստահ են դառնում մարդիկ:

Էրոտիկ եւ պոռնոգրաֆիկ բնույթի արտադրանքի առատության, կինոյի եւ էստրադայի աստղերի սեռական կյանքի քննարկումների արդյունքում պարզ մարդիկ սկսում են կարծել, թե չեն համապատասխանում ինչ-որ համընդհանուր կատարյալ կերպարի:

Հոգեբաններն ու սեքսոլոգները բացահայտել են բազմաթիվ բարդույթներ եւ դրանց համար գեղեցիկ անվանումներ մտածել, օրինակ՝ «Վեներայի բարդույթ», «Տրիստանի եւ Իզոլդայի բարդույթ» եւ այլն: Միայն դրանց նկարագրությունը մի քանի էջ կզբաղեցնի: Իսկ դրանց հարցում կողմնորոշվելը սովորական մարդու համար առավել բարդ է: Սեքսում ամենատարածված խնդիրը դրանով զբաղվելու ցանկության բացակայությունն է: Ընդհանրապես կամ որոշակի պայմաններում: Եվ այդ խնդիրները կապված են բարդույթների հետ:

Եթե չեք ցանկանում սեքսով զբաղվել ցերեկը կամ վառված լույսի ներքո, ուրեմն, ամենայն հավանականությամբ, կասկածում եք սեռական զուգընկերոջ համար ձեր գրավչության հարցում, մտահոգվում եք ձեր կազմվածքի ինչ-ինչ թերությունների համար: Նման անհանգստությունը սպանում է կիրքը: Հավատացեք, սեռական գրավչությունը պարտադիր կատարյալ ուղիղ փորը եւ բարետես ոտքերը չեն: Արտաքինի եւ կազմվածքի թերություններ ունեն բոլորը, նույնիսկ՝ սուպերմոդելները. ժամանակակից ֆոտո- եւ վիդեոտեխնիկայի շնորհիվ այդ մասին արդեն ամբողջ աշխարհը գիտի: Եթե դուք տղամարդու հետ հայտնվել եք անկողնում, ուրեմն նա հենց ձեզ է ցանկանում, իսկ ձեր կազմվածքի թերությունները նրան չեն մտահոգում: Պետք չէ կենտրոնանալ 90x60x90 չափանիշների մասին: Բավական է հիշել Վերածննդի շրջանի կտավների կանանց եւ անմիջապես պարզ կդառնա. ժամանակի ընթացքում կատարելության հասարակական պատկերացումները փոխվում են, եւ դուք ամենեւին չպետք է համապատասխանեք դրանց:

Ինչպե՞ս ազատվել այդ բարդույթից: Լավագույն տարբերակը մոմերն են կամ խամրած լույսը: Նախ մեկ մոմ վառեք, հետո՝ մի քանի: Ժամանակի ընթացքում անցեք սեղանի լուսամփոփի լույսի ներքո սեռական հարաբերությունների: Շատ տղամարդիկ հավաստում են, որ կանայք կրակի լույսի ներքո դառնում են արտասովոր գրավիչ եւ սեքսուալ: Հնարավոր է՝ գաղտնիքը նրանում է, որ արթնանում են նախնադարյան մարդկանց բնազդները, որոնք պահպանում է մեր գենետիկ հիշողությունը: Քարայր, խարույկ, կին. այս ամենը տղամարդու գիտակցության մեջ շաղկապվում է: Ուրեմն մի կողմ նետեք ամեն ինչ եւ կրակ վառեք ձեր տանն ու ձեր տղամարդու սրտում:

«Սիրելիս, գլուխս ցավում է…» շարքից մեկ այլ բարդույթ:

Տղամարդիկ բազմաթիվ անեկդոտներ են հորինել այդ գլխացավի մասին, որը կանանց համար սեքսից հրաժարվելու պատճառ է դառնում: Եվ խնդիրն այն չէ, որ կինը ձեւացնում է: Գլուխն իսկապես կարող է ցավել: Այդ կարող է լինել հոգնածության արտահայտություն, վախին կամ աշխատավայրում սթրեսին արձագանք, ճնշման կամ տրամադրության տատանումներ եւ այլն… Բայց տղամարդն արդեն մի քանի օր սեռական սովահարության է մատնված, եւ կինը, հասկանալով, թե դա ինչով կարող է ավարտվել, դժկամությամբ հանում է հագուստը: Այդ դեպքում կարո՞ղ է կնոջ հաճույքի մասին խոսք լինել: Իհարկե՝ ոչ:

Այդ խնդրից ազատվելու համար հարկավոր է աշխատել: Անհրաժեշտ է սովորել խնդիրները թողնել ննջասենյակից, իսկ ավելի լավ է՝ բնակարանից դուրս: Կարող եք պատկերացնել, թե ինչպես եք հագուստի հետ միասին թոթափում խնդիրները, վախերն եւ չարությունը: Մի անհանգստացեք կոտրված համակարգչի մասին եւ մի զայրացեք ղեկավարի վրա, մոռացեք հարեւանուհուց վիրավորվելու մասին: Այս ամենը կապոց սարքեք, ինչպես հագուստը, եւ դուրս նետեք ննջասենյակի դռնից:

Սեքսը կյանքի անքակտելի մասն է, եւ ոչ թե կարմրելու պատճառ: Ընդ որում՝ կարմրել նրա առջեւ, ում հետ սեքսով եք զբաղվում: Հիշեք այդ մասին եւ մի կողմ նետեք ձեր բոլոր բարդույթները»: