«Այս մրցույթն ունի մեծ թվով գեյ երկրպագուներ, ովքեր սիրում են բեմում տեսնել իսկական դիվաների». Սերգեյ Գրիգորյան

ЛАЙФ 13 Май, 2017 21:03

Երգիչ Սերգեյ Գրիգորյանը «Եվրատեսիլ» մրցույթը դիտելիս` առաջին հերթին անհանգստանում է իր խաղադրույքների համար: Պարզվում է` նա գրեթե ամեն տարի ուսումնասիրում է մրցույթում մասնակցող երկրների ներկայացուցիչներին, իրենց ելույթները եւ նրանց զբաղեցրած հորիզոնականների հետ կապված շատ հաճախ ճիշտ կանխատեսումներ անում: Ավելին` երգիչն իր ընկերների հետ միասին խաղադրույքներ է անում եւ գումար վաստակում: Ինչ խոսք, սա Սերգեյի համար գումար վաստակելու միջոց չէ, այլ պարզապես հաճելի զգացողություններ ու ազարտ:

Սերգեյը հրաժարվեց Life.panorama.am-ի հետ զրույցում ասել, թե այս տարի որ երկրների ներկայացուցիչների օգտին է խաղադրույք անելու, բայց խոստովանեց` վերջին տարիների ընթացքում ամենամեծ գումարը 280 եվրո է եղել.

«Պետք է ասեմ, որ այս ընթացքում շատ քիչ դեպքերում եմ սխալվել, մեծամասամբ ճիշտ ընտրություն եմ անում: Արդյունքում, ընկերներս ինձ են վստահում, ես էլ` նրանց: Ես կանխատեսումն եմ անում, նրանք` խաղադրույքը: Իրականում, քիչ եմ սխալվում իմ կանխատեսումներում, քանի որ ծանոթ եմ եվրոպացիների նախասիրություններին, երաժշտական ճաշակին, նրանց ակումբային կյանքին, ի վերջո` չմոռանանք, որ այս մրցույթն ունի մեծ թվով գեյ երկրպագուներ, ովքեր սիրում են բեմում տեսնել իսկական դիվաների: Այս ամենին զուգահեռ, իմ մասնագիտական գիտելիքները եւս ծառայեցնում եմ կանխատեսումներ անելիս»,- նշեց մեր զրուցակիցը:

Հետաքրքրվելով, թե Սերգեյ Գրիգորյանի կանխատեսմամբ մեր երկիրն այս տարի ո՞ր հորիզոնականը կգրավի, երգիչը պատասխանեց. «Արծվիկին մաղթում եմ հաջողություն: Նրան ծանոթ չեմ, լսել եմ միայն նրա մի երգը Մարգարիտա Պոզոյանի հետ: Ինչ վերաբերում է «Fly with me» երգին, կիսաեզրափակչի օրը նա շատ լավ ներկայացրեց այն, իր առջեւ դրված խնդիրը հրաշալի կատարեց: Երգի առումով, ասեմ, որ ճաշակին ընկեր չկա, ինքս չեմ լսում այս երգը, այն լսել եմ առաջին օրը, երբ ներկայացվեց եւ կիսաեզրափակչին, կլսեմ նաեւ այսօր` եզրափակչին հետեւելիս: Ծանոթ լինելով եվրոպական ճաշակին` կարծում եմ, այս երգն այնքան էլ չի համապատասխանում նրանց նախասիրություններին, նրանք ավելի ինստրումենտալ, ավելի մեղեդային, հասարակ ու թեթեւ երգեր են սիրում»:

Երգիչն անիմաստ է համարում մեր երկրում «Եվրատեսիլ» երգի միջազգային մրցույթին նման մեծ կարեւորություն տալը. «Այս մրցույթը այսպես կարեւորելն ուղղակի անիմաստ է, որովհետեւ, հաճախ շրջելով եվրոպական երկրներում, վստահեցնում եմ` այն այդքան չեն կարեւորում եւ ոչ մի երկրում, որքան մեզ մոտ, բացառությամբ Շվեդիայի, որտեղ լուրջ են մոտենում այս մրցույթին, բայց նրանց նման մոտեցումն արդարացված է, քանի որ ինչպես ամեն տարի է երեւում, նրանք ներկայացնում են բավականին հետաքրքիր ու որակով մասնակիցների, որոնք նրանց մրցանակներ բերում են: Մեզ մոտ մարդիկ հաճախ հիվանդագին կերպով են ընդունում այս մրցույթի հետ կապված ամեն բան: Կարծում եմ` այս մրցույթն այսքան կարեւորվում է մեզանում նրա համար, քանի որ այն համարվում է եւս մեկ լծակ, գումար վաստակելու եւ միգուցե չծախսելու այնքան, որքան ասվում է: Ինքս այս մրցույթին շատ թեթեւ եւ երբեմն անգամ հումորով եմ մոտենում, այս մրցույթը վաղուց դուրս է եկել իր նախնական ձեւաչափից, այն շատ քաղաքականացված է, որը ապացուցեց հենց այս տարվա Ռուսաստանի մասնակցության խնդիրները: Հետեւաբար, այս մրցույթն ինձ մոտ լրջություն չի առաջացնում, բայց լավ երգերը չեմ կարող անտեսել»,- նշեց երգիչը:

Ի դեպ` Սերգեյի խոսքով` ամեն տարի «Եվրատեսիլ» են մասնակցում տարբեր երկրներից իր ընկերները. «Քանի որ շատ եմ շրջագայում եվրոպական երկրներում, մասնակցում եմ շատ միջազգային մրցությների, ուստի բազմաթիվ ընկերներ ունեմ, որոնք իրենց երկրներում առաջատար են ու մասնակցում են այս մրցույթին: Այս տարի էլ Խորվաթիայի եւ Բելոռուսի ներկայացուցիչներն իմ ծանոթներն են, այնպես որ «Եվրատեսիլին» հետեւում եմ մի քանի պատճառներից ելնելով»,- նկատեց նա:

Հեղինակ` Անուշիկ Մելքոնյան