ԱԳԼՃԿ–ները եթե չենթարկվեն, ապա կփակվեն

Գազալցակայաններում գազաբալոնների պայթյունների պատճառներին «Փաստ» օրաթերթն անդրադարձել է իր ապրիլի 28–ի համարում: Եվ բարեբախտաբար օրեր անց, կառավարության մայիսի 5–ի նիստի ժամանակ վարչապետ Կարեն Կարապետյանն անդրադառնալով հարցին, խիստ անբավարար գնահատեց հանրապետությունում գործող գազալցակայանների աշխատանքը: Իր խոսքում վարչապետը նշեց նաև, որ վերջին շրջանում գազալցակայաններում տեղի ունեցած պայթյունների պատճառը ոլորտի թերի վերահսկողությունն է եղել, ինչն էլ փաստացի հանգեցրել է աղետալի հետևանքների: Նա նաև ասաց, որ կառավարության համար խիստ մտահոգիչ է նաև այն, որ գազալցակայանում մինչ օրս չկա գազի մթնոլորտային ճնշման թույլատրելի չափը խախտման կանխարգելման գործուն համակարգ:

Վարչապետը ԱԻՆ և Տնտեսական զարգացման և ներդրումների նախարարություններին հանձնարարել է ամփոփել տեսչական ստուգումների արդյունքները, և առկա խնդիրները լուծելու համար մեկամսյա ժամկետում առաջարկություններ ներկայացնել: Շուկայի վերահսկողության պետական տեսչության պետ Լևոն Խալիկյանը Past.am-ի հետ զրույցում նշեց, որ գազալցակայաններում լիցքավորման ժամանակ կամ լիցքավորելուց հետո գազաբալոնը կարող է պայթել երկու հիմնական խնդրի դեպքում: Առաջին և հիմնական խնդիրն այն է, որ գազի բալոնը հիմնականում անհայտ ծագման է լինում և երկար տարիներ փորձարկում անցած չի լինում: Մյուս խնդիրը մի քանի ենթահարցերից է բաղկացած: «Ինչ վերաբերում է գազաբալոնների ոչ հուսալի լինելուն, այս խնդրի տակ բազում ենթակետեր կան՝ գազաբալոնի սխալ տեղադրելուց մինչև գազաբալոնները տեղադրողների անձնական և մասնագիտական որակավորման հետ կապված հարցեր:

Սակայն Տեսչությունն ամեն ինչ անելու է գազալցակայաններում ճնշման խնդրի կարգավորման լուծումները գտնելու համար»,– ասաց Լ.Խալիկյանը: Ինչ վերաբերում է գազալցակայաններում գազի ճնշման չափը վերահսկող համակարգերի բացակայությանը, տեսչության պետը հավաստիացրեց, որ մոտ ապագայում ամեն ինչ արվելու է, որ հանրապետության գազալցակայաններում 196 մթնոլորտային ճնշումից բարձր լիցքավորում չիրականացվի: Հարցին, թե ինչպես է վերահսկվելու, որպեսզի գազալցակայաններում հնարավոր չլինի նշվածից բարձր ճնշումով լիցքավորել բալոնները, Լ.Խալիկյանը պատասխանեց:

«Առաջարկելու ենք տեխնիկական լուծումներ, որպեսզի տեխնիկապես հնարավոր չլինի թույլատրելի չնշման չափը բարձրացնել: Եթե կազմակերպությունը խախտի նշված պահանջը, ապա վարչական տուգանքից բացի կկիրառենք նաև ավելի կոշտ քայլեր: Գազալցակայանների գործունեությունը կասեցնելու որոշումներ կկայացնենք, որը կարծում եմ ոչ ցանկալի որոշում կլինի տնտեսվարողների համար»: Շուկայի վերահսկողության պետական տեսչության պետը նշեց նաև, որ իրենց կողմից տրված կարգադրագիրը չկատարելու դեպքում վարչական տուգանքը կազմում է 300 հազար դրամ, բայց մտադիր են վերանայել և ավելի մեծացնել տուգանքի չափը: «Ոչինչ ավելի թանկ չէ, քան մարդու կյանքը, իսկ այս խնդիրն անմիջականորեն է առնչվում մարդու կյանքի ու առողջության հետ»,– հավելեց Լ. Խալիկյանը:

Նա նաև ասաց, որ խնդիրն ավելի շատ ոչ թե գերատեսչությունների լիազորությունների թերի կատարման արդյունք է, այլ օրենքների բացի հետևանք: Ինչ վերաբերում է տեսչությանն, ապա տարեսկզբին Տնտեսական զարգացման և ներդրումների նախարարության դահլիճում իրենք հանդիպել են ավտոգազալիցքավորման ճնշակայանների՝ ԱԳԼՃԿ–ներին և երկուստեք փորձել են քննարկել առկա խնդիրները: Ու թեև բոլորն էլ հակված են անվտանգության ապահովմանը մեծ ուշադրույթյուն դարձնել, սակայն շատ ԱԳԼՃԿ–ներում դժբախտ դեպքեր այնուամենայնիվ եղան:

«Ամենակարևորն այն էր, որ ԱԳԼՃԿ–ների սեփականատերերն ու տնօրենները բոլորն էլ ցանկանում են գործունեություն ծավալել օրենքի տառին համապատասխան, սակայն ստացվում է, որ մրցակցության հետևանքով տարբեր դժբախտ դեպքեր են տեղի ունենում: Բայց ես հավաստիացնում եմ, որ կարճ ժամանակ անց այս հարցը նույնպես կկարգավորենք»,– ասաց Լ. Խալիկյանը:

 

Արմինե Գրիգորյան