Թրամփ–Իսթեբլիշմենթ հակամարտությունը դեռ նոր է սկսվում

ԱՄՆ նախագահի էքս–թեկնածու Հիլարի Քլինթոնը որոշել է շարունակել քաղաքական գործունեությունը և որպես սկիզբ՝ հայտարարել է սեփական թիմ հավաքելու և ներկայիս նախագահ Դոնալդ Թրամփի քաղաքականության դեմ պայքարելու մասին: Առաջիկա ամսվա ընթացքում նա մտադիր է շրջել ամերիկյան քաղաքներով և հանդիպել մեկենասների հետ, որոնք, Քլինթոնի հետ միասին, միս ու արյուն կտան Onward together՝ «Միասին առաջ», նրա նոր շարժմանը: Նախկին պետքարտուղարին մոտ կանգնած աղբյուրների հավաստմամբ՝ Քլինթոնի թիմը շատ մեծ չի լինի և հիմնականում բաղկացած կլինի այն դեմոկրատներից, որոնք նախագահական քարոզարշավի ընթացքում արդեն իսկ տիկնոջ հետ աշխատելու փորձառություն են ունեցել:

Բայց որպեսզի շարժումն, այնուամենայնիվ, կայանա և թափ հավաքի ողջ երկրով մեկ, Քլինթոնը շփումներ կհաստատի նաև քաղաքացիական հասարակության, այսպես կոչված, բարեկամական խմբերի հետ՝ հանես գալով որպես միջնորդ նրանց և ոնորների միջև: Այսպիսով, Թրամփի վարչակազմին վատ օրեր են սպասվում, որովհետև, փորձագետների կարծիքով, Հիլարի Քլինթոնը փորձում է լեգիտիմացնել նոր վարչակազմի ներքին ու արտաքին քաղաքականության դեմ՝ իսթեբլիշմենթի իռացիոնալ ատելությունն ու սաբոտաժը, այդկերպ ճանապարհ հարթելով նաև վաղաժամ նախագահական ընտրությունների համար: Իսկ մինչ այդ՝ իսթեբլիշմենթը Թրամփին փորձում է հնարավոր բոլոր ձևերով և բոլոր հարցերում վերահսկել:

Իսկ քանի որ հարցերի հարցը շարունակում է նոր վարչակազմի՝ Մոսկվայի հետ ունեցած շփումները դիտարկվել, ԱՄՆ Կոգրեսը երկու օր առաջ հատուկ կոմիտե ստեղծեց, որը կզբաղվի Ռուսաստանի կողմից գաղտնի ազդեցության չեզոքացման, ԱՄՆ հավատարմագրված ռուս դիվանագետների, ընկերությունների վերահսկման հարցերով: Կարևոր է նշել, որ խնդրո առարկայի վերաբերյալ փաստացի երկկուսակցական կոնսենսուս է հաստատվել Կոնգրեսում, ինչը նշանակում է, որ Սպիտակ տունը նաև սեփական կուսակիցների, կամ իսթեբլիշմենթի հանրապետական հատվածի կողմից է շարունակվում անկանխատեսելի ու վտանգավոր մեկը համարվել:

Ինչպես կհակազդի այս ամենին Թրամփը, կամ՝ կարո՞ղ է արդյոք, այսպիսի հզոր ճնշմանն առհասարակ հակազել, ցույց կտա ապագան: Բայց ակնհայտ է, որ իրավիճակն ինչ–որ կերպ պիտի հանգուցալուծվի, որովհետև նման պայմաններում ուղղակի անհնար է աշխատել: Թրամփին մոտ կանգնած մարդիկ պնդում են, թե և՛ կյանքում, և՛ գործում ԱՄՆ նախագահը հավատարիմ է Ռոնալդ Ռեյգանի՝ խաղաղության և հարգանքի պարտադրման կանոնին:

Հետևաբար, նա դժվար թե կարողանա համակերպվել անգամ իր սմարթֆոնը ձեռքից վերցնելու կոչերին, իսկ իսթեբլիշմենթն էլ իր հերթին կփորձի ինքն իրեն Դոն Քիշոտ երևակայող միայնակ երազողին դարձյալ իր նյույորքյան բնակարանն ուղարկել…