Շատ եմ ուզում մայրանալ, կարծում եմ` դա ամեն կնոջ երազանքն է. Ելենա Վարդանյանը 33 տարեկան է

ЛАЙФ 22 Апрель, 2017 21:45

Կ. Ստանիսլավսկու անվան ռուսական դրամատիկական թատրոնի դերասանուհի Ելենա Վարդանյանն այսօր նշում է ծննդյան 33-ամյակը: Life.panorama.am-ին դերասանուհին պատմել է տոնական օրվա մանրամասների, ինչպես նաեւ ամենամեծ ցանկությունների մասին.

«Արդեն ավանդույթ է դարձել, որ կեսգիշերին տարեդարձս պետք է նշեմ ամուսնուս հետ: Այս տարի էլ նա ինձ շնորհավորեց, ապա զանգեցին ծնողներս ու քույրս եւ հղեցին իրենց բարեմաղթանքները: Դե իսկ այսօր արդեն հասցրեցի բեմում լինել, քանի որ մանկական ներկայացում ունեինք, եւ լսել նաեւ մեր փոքրիկ հանդիսատեսի շնորհավորանքները. Նրանք ու խաղընկերներս բացականչեցին շնոր-հա-վոր, ինչն ինձ համար շատ-շատ հուզիչ ու հաճելի էր: Տոնական տրամադրությունը շարունակվեց նաեւ ետնաբեմում` կոլեգաներիս հետ միասին համտեսեցինք տոնական տորթն ու գինի խմեցինք»,- պատմեց օրվա հերոսուհին:

Գերզբաղված լինելու պատճառով` Ելենան այսօր միայն մտերմիկ խնջույք կկազմակերպի.

«Վաղը եւ հաջորդ օրը ներկայացումներ ունենք, այս օրերին շատ զբաղված եմ, այդ իսկ պատճառով որոշեցինք, որ մեծ խնջույք չի լինի, փոխարենը` ամուսնուս, ծնողներիս ու քրոջս հետ տանը հաճելի երեկո կանցկացնենք»,- նշեց նա:

Ի դեպ` Ելենան հրաժարվեց բացահայտել ամուսնու անկնկալը.

«Նա ամեն տարի մի գեղեցիկ անակնկալ է մատուցում ինձ, եւ այս տարի էլ բացառություն չեղավ, միայն թե չեմ ուզում բացահայտել, թե ինչի մասին է խոսքը»,- ավելացրեց նա:

Ելենան նվերների հարցում նշանակություն է տալիս ոչ թե պարունակությանը, այլ մարդկանց.

«Ինձ համար շատ կարեւոր են այն շնորհավորանքները, որ այսօր լսում եմ: Մարդիկ զանգում են, հղում իրենց գեղեցիկ խոսքերը, էլ ի՞նչը դրանից թանկ ու առավել կարող է լինել»,- նկատեց նա:

Դերասանուհու ամենամեծ երազանքները կապված են մտերիմների հետ.

«Ուզում եմ, որ մտերիմներս առողջ ու երջանիկ լինեն: Ամենանվիրական երազանքներս նրանց հետ են կապված»,- հավելեց Ելենան, իսկ հարցին, թե չի ուզում արդյոք մայրանա, պատասխանեց.

«Իհարկե, շատ եմ ուզում մայրանալ, կարծում եմ` դա ամեն կնոջ երազանքն է: Չեմ ասում, թե պարտադիր ուզում եմ այս տարի դա ինձ հետ կատարվի, բայց նաեւ շատ ուրախ կլինեմ, որ Աստծո կամոք մայրանամ»:

Ի դեպ` զրույցի ընթացքում անդրադարձանք նաեւ 33-ամյա դերասանուհու երիտասարդության գաղտնիքին, ինչին ի պատասխան նկատեց.

«Նախ շնորհակալ եմ հաճոյախոսության համար: Կարծում եմ` այս հարցում մի քանի հանգամանքներ կան. Թերեւս մեծ նշանակություն ունի գեներս, քանի որ ծնողներս եւս իրենց տարիքի համեմատ ավելի երիտասարդ տեսք ունեն, հետո նաեւ սերն ու թեթեւ ապրելակերպը, ինչու ոչ` երեխաների հետ աշխատանքը եւս: Ես սիրում եմ կյանքը, եթե փորձում ես միշտ ուրախ լինել, ապա տեսքդ էլ անկախ տարիքից հիանալի է լինում»:

Իսկ վերջում հետաքրքրվեցինք, թե ինչն է դերասանուհին համարում իր ամենամեծ ձեռքբերումը.

«Ամենամեծ ձեռքբերումս իմ հայրական ընտանիքն է, հետո նաեւ իմ կազմած ընտանիքն ու մասնագիտությունս, որը ես չափազանց շատ եմ սիրում»,- ավարտեց դերաանուհին: