Գեղարքունիքի երկրագիտական թանգարանում կազմակերպվեցին Սուրբ Հարության տոնին նվիրված ցուցահանդես եւ ցերեկույթ

 Սուրբ Հարության տոնին ընդառաջ Գավառ քաղաքի Գեղարքունիքի երկրագիտական թանգարանում կազմակերպվեց ցուցահանդես եւ գրական-երաժշտական ցերեկույթ:

«Արմենպրես»-ի տեղեկացմամբ` ցուցահանդեսում ներկայացված էին Գավառի մանկատան կիրառական արվեստի խմբակի դաստիարակ, ձեռագործ աշխատանքների վարպետ, ֆլորիստ-դիզայներ, հրուշակագործության հմուտ ստեղծագործող Անահիտ Ճաթեյանի ձեռագործ աշխատանքները:«Շնորհաշատ մասնագետ Անահիտ Ճաթեյանը ցուցահանդեսին ներկայացրել է թաղիքապատ հավկիթներ, գոբելենագործ ու ասեղնագործ զատիկներ եւ տոնին բնորոշ տարբեր կոմպոզիցիաներ: Սրանց կողքին ցուցադրության են ներկայացվել նաեւ հայկական ֆիլմերի եւ հեքիաթների սիրված հերոներին պատկերող տիկնիկներ՝ ավանդական հագուկապով, տարազներով: Նաեւ ներկայացված են հայկական կենցաղն ու ավանդույթները պատկերող իրավիճակներ, կոմպոզիցիաներ՝ հաց թխելու ավանդույթը, խնոցի հարող կանայք, հարսանիք, հայկական մեծ գերդաստան, ասեղնագործ թաշկինակներ, գոբելեններ, ժանյակներ, ընկույզի վրա գործված հայկական զարդանախշեր: Անահիտն իր մտահղացումները պատկերելու համար օգտագործել է կենցաղային ամենահասարակ իրեր՝ ձավարեղեն, փայտե դետաsեր, խեցեղեն, բուրդ, բամբակ եւ այլն»,-պատմեց թանգարանի տնօրեն Բյուրեղիկ Հովեյանը:

«Ես սիրում եմ իմ ստեղծած Անահիտ տիկնիկի կերպարը: Հայտնի հեքիաթի հերոսուհու կերպարն ինձ հոգեհարազատ է, Անահիտն եմ, եւ անպայման ուզեցել եմ, որ Անահիտ տիկնիկը լինի: Մենք մեր պատմությունից եւ գրականությունից մեծ ժառանգություն ունենք, ինչու՞ այսօր չօգտվենք մեր անցյալի ժառանգությունից, հագուկապից, նրանց ստեղծած հետաքրքիր, գեղեցիկ զարդերից»,-ասաց ցուցահանդեսի հեղինակը:

Թանգարանի տնօրեն Բյուրեղիկ Հովեյանը հյուրերին ներկայացրեց ցուցադրված նմուշները` տալով դրանց նկարագրություններն ու ստեղծման պատմությունները:

«Երկար տարիներ է, ինչ Անահիտ Ճաթեյանը համագործակցում է մեր թանգարանի հետ: Նա թանգարանին նվիրել է մի շարք կոմպոզիցիաներ, որոնք լրացնում են թանգարանի ցուցադրությունը: Նա երբեք չի բավարարվում իր ձեռք բերածով: Ամեն անգամ հետազոտում, հետաքրքրվում, պեղում, գտնում է այն զարդանախշերը, որոնք վաղուց մենք մոռացել ենք, եւ օգտագործում է իր կոմպոզիցիաներում, ստեղծագործություններում: Անահիտ Ճաթեյանի աշխատանքների ցուցադրությունը թանգարանի ցուցասրահում կշարունակվի մի քանի օր»,-նշեց թանգարանի տնօրենը:

Միջոցառման երկրորդ մասն անցկացվեց թանգարանի «Աղքատի տուն» սրահում, որն այդ պահին լրիվ այլ կերպարի մեջ էր՝ տիպիկ հին հայկական օջախ, թոնրով, քուրսիով, պահարանով ու հնամաշ կահույքով, զատկական զարդարանքներով՝ ակլատիզով (Մեծ պասի խորհրդանիշ տիկնիկով), ածիկով եւ այլն: Իսկ ցերեկույթի մասնակից դպրոցականները` Գավառ քաղաքի Գեւորգ Մնացականյանի անվան N7 միջնակարգ դպրոցի աշակերտները բեմականացրին Սուրբ Հարության տոնի եւ Մեծ Պահքի ողջ խորհուրդը, շաբաթներից յուրաքանչյուրն իր խորհրդով՝ համադրված թեմային համապատասխան ազգագրական երգերով ու պարերով: