Անբացատրելի զգացմունքներ են, երբ հասկանում ես, որ քո սպասվածից ավելի լավ բան ես արել. Արամեն՝ մոսկովյան իր մենահամերգի մասին (լուսանկարներ)

Օրեր առաջ՝ մարտի 10-ին, Մոսկվայում կայացավ Արամեի սպասված մենահամերգը՝ նվիրված իր բեմական գործունեության 10-ամյակին: Ի դեպ՝ Արամեն նպատակ ունի  առաջիկայում մենահամերգով հանդես գալ նաեւ Երեւանում:

 

Life.panorama.am-ի հետ զրույցում երգիչը պատմել է իր կյանքում կարեւոր իրադարձության մանրամասների մասին, ինչպես նաեւ մենահամերգից արված բացառիկ  ֆոտոշարք է տրամադրել.

«Անբացատրելի զգացմունքներ են, երբ հասկանում ես, որ քո սպասվածից ավելի լավ բան ես արել: Սա ոչ միայն իմ, այլեւ իմ ողջ թիմի աշխատանքն է ու հաղթանակը: Ուարխ եմ, որ այդ կարեւոր օրը այլեւս նշանավորված է իմ գործունեության մեջ որպես մեծ հաջողություն»,- նշեց Արամեն:

 

 

Երգչի սպասված մենահամերգին իրենց ներկայությամբ ու կատարումներով շնորհավորել են հայկական եւ ռուսական շոու բիզնեսի մի շարք հյուրեր՝ Սիլվա Հակոբյանը, Քրիստինե Պեպելյանը, Սոնան, Մոնիկա Նազարյանը, Անժելիկա Ագուրբաշը, Դիանա Գուրցկայան եւ Մարգարիտա Պոզոյանը: Հայտնի հյուրերը կանայք էին, քանի որ մենահամերգը նվիրված էր մայրության եւ գեղեցկության տոնին.

«Իմ սիրելի ընկերնեն այդ օրը իմ կողքին էին, ովքեր հանդես եկան իրենց գեղեցիկ կատարումներով: Այդ օրը հնչեցին նաեւ զուգերգեր, որոնք կրկին շատ ջերմորեն ընդունվեցին հանդիսատեսի կողմից: Բեմում ինձ հետ էր նաեւ Կարեն-Սեւակ բենդը եւ «Կիլիկիա Հայորդիք Վեգաս» պարային խումբը»,- պատմեց երգիչը:

 

 

Ի դեպ՝ մենահամերգին Արամեի կինը ոչ միայն նրա կողքին էր ետնաբեմում, այլեւ բեմում: Աննա Թովմասյանն ու ամուսինը ներկայացրել են իրենց զուգերգը, նրանց ելույթն էլ ավելի հուզիչ է եղել, քանի որ Աննան շուտով բալիկ կունենա, իսկ ակամա բեմում երեքով լինելը էլ ավելի հաճելի տրամադրություն է հաղորդել.

 

«Իհարկե, չեմ ուզում հուզմունքը կապել այդ փաստի հետ, բայց ամեն դեպքում պետք է խոստովանեմ, որ այդ պահին հուզմունքը պիկի վրա էր»,- ժպիտով նկատեց ապագա հայրիկը:

 

 

Մեզ հետ զրույցում Արամեն նշեց նաեւ, որ հաճելիորեն զարմացած է եղել, երբ հանդիատեսի շարքում ռուսների է նկատել.

«Շատ զարմացած էի, երբ դահլիճում տեսա շատ ռուսների, նրանք պահանջում էին, որ խոսեմ ռուսերեն, ես էլ՝ չմերժեցի: Հուսամ՝ սա սկիզբ է ռուսական հանդիսատեսին նվաճելու ճանապարհին»,- նկատեց նա:

Արամեի մոսկովյան մենահամերգի կազմակերպիչն էր «Euromusic Entertainment»-ը, բեմադրող ռեժիսորը՝ Սյոմա Կոդաբաշյանը: Ի դեպ՝ Արամեի մենահամերգի տեսագրությունը շուտով կցուցադրվի «Արմենիա» հեռուստաընկերությամբ, ինչպես նաեւ այն հասանելի կլինի DVD տարբերակով: