Հրաչուհի Ութմազյանը նորություն ունի

Tert.am Life–ը գրում է.

Երեկ կայացավ «Բրավո՛, վիրտուոզ» ֆիլմի պրեմիերան, որում իր դերակատարումն ունի նաև  հաղորդավարուհի Հրաչուհի Ութմազյանը։ Tert.am Life–ը Հրաչուհու հետ խոսել է դեբյուտային ֆիլմի մասին։ Պարզվում է՝ կինոյում խաղալու ցանկություն նա վաղուց ուներ, պարզապես սպասում էր հարմար առաջարկի։

2015 թվականին հաղորդավարուհին, ի վերջո, ստացել է իրեն հետաքրքրող առաջարկ։ «Կինոն ինձ համար շատ հետաքրքիր մի ասպարեզ էր։ Երևի, ոչ ոքի համար գաղտնիք չէ, որ սիրում եմ ինձ փորձել տարբեր ոլորտներում,– ասաց հաղորդավարուհին ու հավելեց, որ ֆիլմում մարմնավորում է ջութակահարուհու։ –Ես առաջին ջութակի դերն էի խաղում։ Ինձ շատ օգնեց այն փաստը, որ 9 տարի ջութակ եմ նվագել և տիրապետում էի նրբություններին»։

Հայտնի մարդկանցից շատերը չեն համաձայնում երկրորդական դերերի՝ անկախ նրանից տվյալ ոլորտում փորձառո՞ւ են, թե՞ ոչ՝ դա համարելով պատվի հարց։ Հրաչուհին նշեց, որ ինքը նման բարդույթներ չունի. թեև խաղացել է թատրոնում, կինոյում սա դեբյուտ էր։

«Դերերը փոքր չեն լինում։ Թեև հեռուստատեսային տարբեր նախագծերում դերակատարումներ ունեցել էի, իմ առաջին փորձն էր՝ խաղալ այսպիսի լուրջ ֆիլմում։ Այսպիսի պրոֆեսիոնալ անձնակազմի հետ աշխատելը մեծ պատասխանատվություն էր։ Ես այդքան համարձակ չեմ՝ համարելու, որ կկարողանայի առաջին անգամից հաջողել գլխավոր դերը։ Կարծում եմ՝ կարևորն այն է, որ դերը համապատասխանում է քեզ և հետաքրքիր լինի»,– ասաց Հրաչուհին։

Հրաչուհին ընդգծեց, որ աշխատանքային շատ լավ թիմ են ունեցել։ «Թե՛ հայկական «HK productions»–ի, թե՛ ֆրանսիական «Agat Films»–ի կողմից ֆանտաստիկ խումբ էր հավաքվել։ Յուրաքանչյուրն իր գործի վարպետն էր։ Նկարահանման հրապարակում այնքան հաճելի մթնոլորտ էր, որ անգամ առավոտյան ժամը 3–ից մինչև հաջորդ առավոտյան ժամը 8–ը տևած նկարահանումներն աննկատ էին անցնում։ Անձամբ ես չեմ հասկացել՝ ինչպես անցավ  ժամանակը, այնքան հոգատար ու լավ խումբ էր հավաքված»,– ասաց Հրաչուհին։

Խոսելով  արդյունքի մասին՝ հաղորդավարուհին նշեց, որ առաջին անգամ էր դիտում ֆիլմը։ «Կարծես թե, վատ չէր։ Դահլիճում ընկերներս էին նստած կողքիս, ասում էին՝ լավ է։ Ես սրտի տրոփյունով սպասում էի հորս արձագանքին, ով մյուս սրահում էր նստած։ Ուզում էի իր կարծիքն իմանալ, որովհետև ինքն իմ ամենաանաչառ քննադատն է։ Նա գոհ էր ինձանից։ Ինձ մոտեցավ նաև  Աննա Հեքեքյանը, ում կարծիքը ևս շատ կարևոր է ինձ համար։ Հետո արդեն սկսեցին շնորհավորել գործընկերներս՝ հստակ, անկեղծ դիտարկումներով։ Հասկացա, որ, երևի թե, լավ էր»,– եզրափակեց նա։

 

Նյութը՝ Ամալյա Հովհաննիսյանի