Աննա Դովլաթյանն ու Դավիթ Աղաջանյանը համատեղ բիզնեսներ են հիմնում

Երգչուհի, դերասանուհի Աննա Դովլաթյանը Life.panorama.am-ի հետ զրույցում պատմել է սիրելիին՝ դերասան Դավիթ Աղաջանյանին բիզնեսում օգնելու, որպես երգչուհի՝ առաջիկա ծրագրերի, ինչպես նաեւ «Կայարան» հեռուստասերիալում իր կերպարի զարգացումների մասին:

««DA Jewellery»-ի ստեղծման գաղափարը Դավիթինն էր: Սա իրենից ենթադրում է արծաթյա եւ բնական քարերից պատրաստված զարդեր եւ տղամարդկանց, եւ կանանց համար: Բիզնեսի հետ կապված հարցերում ես չեմ խառնվում, քանի որ Դավիթն անձամբ է լուծում դրանք, բայց փոխարենը իմ աջակցությունն եմ ցույց տալիս կանացի հավաքածուներում»,- նշեց Աննան ու շարունակեց.

«Ի սկզբանե Դավիթը ցանկացավ, որպեսզի կանացի մոդելներով ես զբաղվեմ: Նա շատ է հավանում իմ ճաշակն ու ամբողջովին վստահեց ինձ: Կարծում եմ՝ ճիշտ է, երբ նման պարագայում կանանց զարդերով զբաղվում է կինը, իսկ տղամարդկանց օրինակներով՝ տղամարդը: Այդպիսով կարելի է ստանալ պահանջարկ ունեցող իրեր, որոնք կունենան իրենց հասցեատերերը»:

Աննայի խոսքով՝ նորսկսնակ բիզնեսը դեռեւս համացանցում պաշտոնական էջի շրջանակներում է ընդլայնվում, բայց ծրագրերը շատ են.

«Դավիթը շատ ծրագրեր ունի: Առաջիկա նպատակներից մեկը խանութ-բուտիկ բացելն է, որը միայն այս բիզնեսի հաջողություն ունենալուց է կախված: Ամեն դեպքում՝ մենք ամեն ջանք ներդնում ենք, որպեսզի լավ արտադրանք ներկայացնենք»,- նշեց նա:

Հետաքրքրվելով, թե «DA Jewellery»-ի զարդերը ձեռք բերելը թա՞նկ հաճույք կլինի ցանկացողների համար, Աննան նկատեց.

«Մենք դեռ նոր-նոր ենք սկսել, գնային համակարգն էլ դեռեւս հստակեցված չէ: Միայն կնշեմ, որ օգտագործվում են միայն արծաթ ու բարձրակարգ քարեր, ընդ որոմ՝ քարերը բերվում են Եվրոպայից, կամ Դավիթն անձամբ է մեկնում՝ դրանք ընտրելու համար: Մենք ուզում ենք ստեղծել իրեր ոչ թե ինքնանպատակ դրանք վաճառելու համար, մենք մտածում ենք այնպիսի զարդերի մասին, որոնք անձամբ կցանկայինք կրել: Տեսականին կապված է նաեւ տրամադրության, եղանակի հետ, օրինակ՝ ամռանը կլինեն համապատասխանաբար ամառային գույներով զարդեր: Ի դեպ՝ մեզ մոտ կլինեն նաեւ պատվերների հնարավորություն, եթե մեր այցելուները սեփական գաղափարներ ունենան»:

Հետաքրքրվելով, թե արդյոք «DA Jewellery»-ի անվանումը կապված է Դավիթի եւ Աննայի անվան առաջին տառերի հետ, երգչուհին նկատեց.

«Սա Դավիթի գաղափարն էր ու ես կապ չունեմ: Ճիշտ է՝ Դավիթը սկզբում առաջարկեց, որ հետաքրքիր զուգադիպությամբ բիզնեսի անունը կկրի երկուսիս անվան առաջին տառերով, հատկապես որ նույն կերպ նաեւ մեր ազզգանունների առաջին տառերն են համընկնում, բայց ես հրաժարվեցի՝ ասելով, որ սա նրա աշխատանքն է, ես միայն կողքից եմ օգնում: Նա է իր ողջ ուժերը ներդրել ու նա է արժանի, որպեսզի իր բիզնեսը միայն իր անունը կրի»:

Ի դեպ՝ Աննան բավականին լավ նկարում է, իր զգեստների հեղինակն ինքն է ու այս պահին իր ու Դավիթի ծրագրերում կան նաեւ սեփական նորաձեւության սրահ հիմնելը:

Արդեն երկար ժամանակ է, ինչ Աննա Դովլաթյանը նոր երգով չի ներկայանում, բայց մեզ հետ զրույցում երգչուհին պատմեց, որ արդեն իսկ այդ առումով աշխատանքներ է տանում.

«Արդեն իսկ նոր երգ եմ գրել, մեծ հույս ունեմ, որ այս տարի կհասցնեմ այն տեսահոլովակով ներկայացնել: Նախկինում հիմնականում ներկայացել եմ անգլերեն երգերով, այս անգամ կլինի հայերեն երգ, որի խոսքերը գրել է Վարդան Սմբատյանը, գործիքավորումն էլ իրականացնելու է Տիգրան Ավետիսյանը»,- նշեց նա:

Աննա Դովլաթյանը շարունակում է նկարահանվել «Կայարան» հեռուստասերիալում: Հետաքրքրվելով, թե ի՞նչ զարգացումներ են սպասվում իր հերոսուհուն, պատասխանեց.

«Սերիալային աշխատանքում զարգացումներին դերասաններն էլ շատ տեղյակ չեն լինում: Ինձ համար էլ է անակնկալ, թե հերոսուհուս հետ ինչ կլինի, այնպես որ ես էլ, հեռուստադիտողի նման,  հետեւում եմ ընթացքին»: