Ես սիրում եմ մեր երկիրը, ինձ այստեղ շատ լավ եմ զգում. Սեւակ Ամրոյան

ФОТО 16 Февраль, 2017 21:11

Այսօր երգիչ Սեւակ Ամրոյանն իր երկրպագուների դատին է հանձնել սփյուռքահայ երգիչ Գառնիկ Սարգիսյանի հետ համատեղ՝ «Արժանի» զուգերգը:

Life.panorama.am-ին Սեւակը պատմեց ոչ միայն նոր համագործակցության, այլեւ առաջիկա ծրագրերի մասին:

«Գառնիկ Սարգիսյանի հետ համագործակցելու առաջարկն իմն էր, նրա հետ շատ նման ենք մեր երաժշտական ճաշակով ու համատեղ զուգերգն էլ շատ հեշտ ստացվեց: Երգի հեղինակը Էդմոնդ Մակարյանն է, գործիքավորումն իրականցրել է ԴերՀովան: Երգի ընտրությունը եւս իմն էր, կարծում եմ, շատ գեղեցիկ ու խորիմաստ ստեղծագործություն է»,- նշեց Սեւակը:

Տեսահոլովակը մինիմալիստական լուծումներով է, առանձնահատուկ սցենար ու սյուժե չկա, իսկ դրա պատճառը, Սեւակի խոսքով, մեկն է.

«Ըստ իս՝ հայրենիքի մասին երգի տեսահոլովակը պետք է նկարահանվի հայրենիքում, բայց քանի որ երգը ձայնագրեցինք ԱՄՆ-ում ու տեսահոլովակն էլ այնտեղ պետք է նկարահանվեր, որոշեցինք, որ լավագույն լուծումը կլինի ձայնագրման ստուդիայում նկարահանվելը: Օպերատորը Նարբեհ Խոդավերդին է, մոնտաժն իրականացրեց Մարիամ Գեւորգյանը»,- հավելեց Սեւակը:

Անդրադառնալով առաջիկա ծրագրերին՝ անդադար շրջագայող երգիրչը նշեց.

«Այնպես է ստացվել, որ հյուրախաղերը բավականին շատ են վերջին շրջանում ու առաջիկայում եւս դրանց պակասը չի լինի: Մարտի վերջից սկսած՝ Ռուսաստանի Դաշնության տարբեր քաղաքներում համերգային շրջագայություն ունենք, որտեղ իրենց մասնակցությունը կունենան Սարոն, Սարգիս Ավետիսյանը, Գեւորգ Մարտիրոսյանը, «Ֆուլ հաուս»-ից մի քանի անդամներ եւ այլք: Բավականին մեծ ծրագիր է նախատեսվում, որը, հուսամ, հաջողությամբ կիրագործենք: Իսկ արդեն գարնան վերջին՝ մայիսին, կրկին կմեկնեմ ԱՄՆ՝ մասնակցելու խմբակային համերգների»:

Մեր նկատառմանը, թե հնարավո՞ր է արդյոք, որ Սեւակ Ամրոյանի հաճախակի ԱՄՆ մեկնումները մի օր նրան վերջնականապես այնտեղ հաստատվելու միտք տան, ինչպես եղել է մեր շատ երգիչ-երգչուհիների պարագայում, պատասխանեց.

«Իհարկե, հայտնի ասույթը հիշելով կասեմ՝ երբեք մի ասա, երբեք, բայց այնուամենայնիվ, գոնե առաջիկա տարիներին հազիվ թե նման միքտ ունենամ: Ես սիրում եմ մեր երկիրը, ապրում եմ Երեւանում ու ինձ այստեղ շատ լավ եմ զգում. Չեմ ուզում հայրենիքիցս հեռու ապրել»:

Ի դեպ՝ փետրվարի 14-ին Սեւակ Ամրոյանն ու Սոնա Ռուբենյանը դերասան, երգիչ Հայկ Պետրոսյանի մոնոներկայացմանը մասնակցեցին: Սեւակի խոսքով՝ հաջող երեկո են ունեցել, որը որոշ փոփոխություններով կկրկնեն մարտի 8-ին: