Պետրոսյանը կենդանի լեգենդ է, ով ոչնչացնում է մրցակիցներին. Ալեքսանդր Պովետկինը՝ հայազգի մարզիկի մասին

Ռուսաստանում անհամբերությամբ են սպասում քիք-բռնցքամարտի W5 Grand Prix Kitek 2017 մրցաշարի կենտրոնական՝ չեմպիոնական մենամարտին, որում կհանդիպեն միջին քաշայիններ Արտյոմ Պաշպորինը և Իտալիան ներկայացնող լեգենդար Ջորջիո (Գևորգ) Պետրոսյանը: Մենամարտը տեղի կունենա Մոսկվայում փետրվարի 18-ին՝ «Դինամո» մարզահամալիրում: Ծնունդով Բոգորոդսկից Պաշպորինը հանդիսանում է W5-ի վարկածով աշխարհի չեմպիոնը: Նրան հաջողվել է հաղթել այնպիսի ճանաչված մարզիկների, ինչպիսիք են Կոսմո Ալեշանդրեն և Քրիս Նգիմբին: Մասնագետների կարծիքով՝ Պաշպորինը մեծ ռիսկի է գնում, հանդիպելով Պետրոսյանի հետ: Մասնավորապես, շատերը կարծում են, որ Պաշպորինը դեռևս պատրաստ չէ դիմակայելու նման հզոր մրցակիցների, հետևաբար հայազգի մարզիկը շատ արագ նոկաուտի կենթարկի նրան: Բուքմեյքերական ընկերությունները ևս այս դիմակայությունում բացահայտ ֆավորիտ են համարում Ջորջիո Պետրոսյանին: 2013 թվականին Հոլանդիան ներկայացնող Էնդի Ռիսթիից կրած սենսացիոն պարտությունից հետո, Պետրոսյանը ժամանակավորապես հեռացել էր մեծ սպորտից: Սակայն մեկ տարի անց ռինգ վերադառնալով, հայազգի լեգենդը փայլուն մենամարտերի շարք է անցկացնում: Մասնավորապես՝ նա արդեն 7 մենամարտ է անցկացրել և տարել նույնքան հաղթանակ: Մարզասերների շրջանում հատկապես տպավորվել է Պետրոսյանի՝ Թուրքիայի ներկայացուցիչ Էրքան Վարոլի նկատմամբ տարած հաղթանակը:

Առաջիկա մենամարտի մասին կարծիք է հայտնել ռուսաստանցի հայտնի բռնցքամարտիկ, գերծանր քաշային Ալեքսանդր Պովետկինը: «Պետրոսյանը կենդանի լեգենդ է: Միայն նրա հետ հանդիպելը մեծ պատիվ է ցանկացած մարզիկի համար: Բնականաբար, Ջորջիոն անվիճելի ֆավորիտ է: Նա խելացի մարզիկ է և տակտիկական առումով հաղթելը շատ դժվար է: Իր կարիերայի ընթացքում հայազգի մարզիկն ընդամենը մեկ պարտություն է կրել, որը կարծում եմ ինչ-որ տեղ պատահականության հետևանք էր: Պետրոսյանը հիանալի է զգում տարածությունը և հազվադեպ է բաց մարտ վարում: Այդ մենամարտում, նա, հավանաբար, թերագնահատեց մրցակցին, և անցնելով ուժային պայքարի՝ հարված բաց թողեց, որը ճակատագրական էր: Մյուս բոլոր դեպքերում Ջորջիոն ուղղակի ոչնչացրել է մրցակիցներին: Բոլորս Արտյոմի կողքին ենք և նրան քաջալերելով պետք է նպաստենք, որ կարևորագույն այս դիմակայությունում արժանի դիմադրություն ցույց տանք Պետրոսյանին: Սպորտում հաղթում է նա, ով տվյալ պահին ավելի լավ մարզավիճակում է գտնվում: Չեմ կասկածում, որ Պաշպորինը լավ է նախապատրաստվել և ամեն ինչ կանի Ռուսաստանի դրոշը բարձր պահելու համար: Մենք հավատում ենք Արտյոմին»,- հայտարարել է Պովետկինը:

32-ամյա Պետրոսյանը ծնվել է Երևանում: 14 տարեկանում ընտանիքի հետ մշտական բնակություն է հաստատել Իտալիայում: Պրոֆեսիոնալ կարիերայում Պետրոսյանն անց է կացրել 84 մենամարտ և տարել 83 հաղթանակ, որոնցից 35-ը նոկաուտով: Սա կարելի է ֆանտաստիկ ցուցանիշ անվանել: Նա հանդիսանում է անկախ քաշային կարգում աշխարհի լավագույն քիք-բռմցքամարտիկը: Իտալիայում նրան անվանում են Դոկտոր Պետրոսյան: Ի դեպ, քիք-բռնցքամարտով է զբաղվում նաև Գևորգի կրտսեր եղբայրը՝ Արմենը: Վերջինիս հաջողվել է հաղթել ճանաչված քիք-բռնցքամարտիկներ Վեյսել Կոլոսին, Ջաբար Ասկերովին, Լերոյ Կաստներին: Այդուհանդերձ, Արմեն Պետրոսյանը լինելով տաղանդավոր մարզիկ, աչքի է ընկնում նաև ոչ այնքան կայուն ելույթներով: Նա անցկացնելով 84 մենամարտ՝ տարել է 67 հաղթանակ և կրել 16 պարտություն: 67 մենամարտերից 25-ում Արմեն Պետրոսյանը հաղթանակի է հասել նոկաուտով: