Ռուսական շոու բիզնես մուտք գործելու առաջին հաջող քայլերն արված են. Արամե

ЛАЙФ 9 Февраль, 2017 13:18

Արամեն շուտով իր երկրպագուներին եւս մեկ աշխատանք կնվիրի: Վերջին օրերին նա նկարահանել է իր նոր տեսահոլովակը, որի պրեմիերան կկայանա շատ շուտով:

Թեեւ երգիչն այս օրերին զբաղված է եվրոպական երկրներում համերգային շրջագայություններով, սակայն մեծ զբաղվածության արդյունքում անգամ հասցրել է փոքրիկ զրույց ունենալ Life.panorama.am-ի հետ:

«Նոր երգս լիրիկ ոճում է, որի երաժշտության հեղինակը ես եմ, իսկ խոսքերը գրել է Աննա Հովերը: «Я Кричу» երգը պատմում է մի սիրո պատմության մասին, որը շատերին ծանոթ կլինի. երգի բովանդակության հիմքում ընկած է այն գաղափարը, որ կան սխալներ, որոնք շտկելի չեն: Պետք է հիշել, որ կյանքում կան քայլեր ու խաչմերուկներ, որոնք սխալ անցնելու դեպքում ուղղել հնարավոր չէ, ուստի յուրաքանչյուր քայլ անելիս, պետք է շատ լուրջ մտածել»,- պատմեց Արամեն:

Այս երգն Արամեի արդեն երկրորդ աշխատանքն է, որ ռուսերենով է ներկայացնում, երգիչը մտադրություն ունի լուրջ ու հաստատուն քայելով մտնել ռուսական շոու բիեզնես.

«Չեմ թաքցնում, որ ցանկություն ունեմ մուտք գործել ռուսական շոու բիզնես. Այս առումով առաջին հաջող քայլերն արված են: Իմ տեսահոլովակներն արդեն իսկ ցուցադրվում են ռուսական տարբեր ալիքներով. Իհարկե, ոչ բոլոր հեռուստալիքներով, բայց դա, կարծում եմ, ժամանակի հարց է: Այս տեսահոլովակը նույնպես կփորձենք ներկայացնել առաջինը RU TV-ով»,- նշեց սիրված երգիչը:

Խոսելով նոր տեսահոլովակի մանրամասներից՝ Արամեն նկատեց.

«Համագործակցել եմ ռուս ռեժիսոր Պավել Գլազկովի հետ: Ես փորձել եմ չմիջամտել ու թողնել, որ ռեժիսորն ինքն իր մտքերով կառուցի տեսահոլովակը: Քանի որ նա ազգությամբ ռուս է, փորձել է իր ձեւով մոտենալ եւ իրականացնել այս սիրո պատմությունը»:

Մարտի 10-ին Կրեմլում կկայանա Արամեի սպասված մենահամերգը: Երգչի խոսքով՝ այդ օրը հանդիսատեսին մեծ անակնկալներ են սպասվում.

«Ինձ ու հանդիսատեսին շատ ուրախ օր է սպասվում: Այդ օրը ամեն ինչ կանեմ, որպեսզի ուրախացնեմ ու նաեւ հուզեմ ներկաներին: Կլինեն նոր երգեր, զուգերգներ ինչպես հին, այնպես էլ դեռեւս չլսված: Ի դեպ՝ այդ օրն ինձ հետ բեմում կլինեն Հայաստանի եւ Ռուսաստանի երգչուհիներից մի քանիսը, քանի որ համերգը նվիրել եմ կանանց մեկամսյակին»,- հավելեց Արամեն:

Վերջում, հետաքրքրեվելով, թե մեծ զբաղվածություն ունենալով ինչպե՞ս է հասցնում ժամանակ տրամադրել ընտանիքին ու ի՞նչ զգացողություններ ունի հիմա, երբ շուտով հայրիկ է դառնալու, պատասխանեց.

«Աշխատանքն իր հերթին, սակայն ընտանիքն ինձ համար առանձին ու շատ կարեւոր տեղում է: Իհարկե, երբեմն ժամանակս չի բավականացնում, որ լիարժեք տրամադրվեմ ընտանիքիս, բայց ամեն ինչ անում եմ: Ինչ վերաբերվում է հայրիկ դառնալուն՝ միայն կասեմ՝ Փառք Աստծուն, ես շատ ուրախ եմ»: