Լյուսին Սոսի հետ այժմյան հարաբերությունների և կրկին խաղալու մասին

Դերասան Սոս Ջանիբեկյանն ու մոդել Լյուսի Հայրապետյանը այս տարի կրկին կներկայանան համատեղ ներկայացմամբ: Երկարատև դադարից հետո նորից բեմադրվելու է «Կենտ զույգը» ներկայացումը: Ըստ մարմնավորած կերպարների՝ նախկին զույգը սիրախաղ ունի: Tert.am Life-ը Լյուսիի հետ խոսել է Սոսի հետ անձնական հարաբերությունները խզելուց հետո կրկին միասին խաղալու բարդության և ներկայիս հարաբերությունների մասին:

 -Լյուսի, տևական դադարից հետո նորից խաղալու եք «Կենտ զույգը» ներկայացումը: Քո ու Սոսի բաժանումից հետո մեր հարցազրույցի ժամանակ նշեցիր, որ մի անգամ հազիվ ես քեզ զսպել, որպեսզի բեմում չհամբուրես նրան:  Հիմա կրկին ստեղծվում է ձեզ միավորող միջավայր: Ինչ-որ թրթիռ կա՞ քո մեջ:

 -Ամեն անգամ, որոշում եմ չխոսել Սոսի մասին, բայց էլի Սոս... :) Դա ցանկություն չէր, ուղղակի տեսարանը շատ մոտ էր, ստեղծվեց մի պահ, որ մոռացնել տվեց, որ այլևս միասին չենք, ու հազիվ ինձ զսպեցի, որ չհամբուրեմ նրան բեմում։ Երբ 1 տարի միասին եք լինում ու այդքան մոտ, համբույրն անկախ քեզանից կարող է ստացվել։ Ի վերջո, 1 տարի այդ համբույրը քեզ համար եղել է ամենօրյա հաճելի երևույթ:)

 Չգիտեմ՝ Սոսի մոտ ինչ էտապ է հիմա։ Կարծում եմ, որ այդ թրթիռը միշտ լինելու է, քանի-որ ունենք մի ամբողջ կյանք միասին ապրած։

 

 -Ամեն անգամ, երբ խոսում ես Սոսի մասին, տպավորություն է, որ նա քո մեծ սերն է եղել:

 -Այո, այդպես է, իմա՞ստը թաքցնելու:) Եթե չսիրեի, այդքան երկար միասին չէինք լինի։ Նա հետաքրքիր տղամարդ է: Դժվար կլիներ երկար ժամանակ շփվել նրա հետ ու չսիրել։

 -Հիմա ի՞նչ հարաբերություններ ունեք:

 -Վերջին շրջանում բացարձակ կապ չունեինք, նույնիսկ պատահաբար հասարակական վայրերում չէինք հանդիպում: Ներկայացումը առիթ դարձավ, որ նորից հանդիպենք: Սկզբում մի քիչ լարված էր, հետո անցավ։

 Հիմա շատ ընկերական հարաբերություններ ունենք: Մեկ-մեկ նույնիսկ կատակում ենք՝ ժամանակին իրար «միս ուտելու» վերաբերյալ:

 

 -Ինչի՞ համար կարող եք իրար «միս ուտել»:

 -Սոսը մի հարցազրույցի ժամանակ ասել է՝ ինձանից գնացին ուրիշի հետ ամուսնանալու ու երեխա ունենալու համար: Վաղուց չէինք հանդիպել, երբ տեսանք իրար, հեգնանքով ասաց՝  հն, ունեցա՞ր երեխա..., ասացի՝ ոչ:), Ասաց՝ ապրե՜ս: Ես էլ հարցրի՝ լա՞վ ա Հոլիվուդում (նա ինձ ասում էր` արի ամուսնանանք, բայց դեռ երեխա չունենանք, որովհետև ես ուզում եմ Հոլիվուդ գնալ, ավելի կայանալ), ծիծաղելով ասաց՝ շա՜տ լավ ա:)։ Փաստացի, ոչ մեկս չարեցինք այն, ինչի համար բաժանվեցինք: Մաղթում եմ, որ Սոսը մի օր իրոք գնա Հոլիվուդ ու հասնի իր նպատակներին:

 -Ափսոսանք կա՞:

 -Չէ: Ես արդեն նորմալ եմ նայում այս ամենին: Ես դեռ չեմ ընտրել իմ միակին, սակայն, բնականաբար, իմ կյանքում կան շփումներ: Հիմա ամեն մեկս ունենք մեր անձնական կյանքը ու հումորով ենք վերաբերում այդ ամենին:

 

 -Սոսը միշտ փորձում է փակ պահել՝ իր անձնական հարաբերություններում ինչն ինչպես եղավ: Մեր նախորդ հարցազրույցում դու շատ անկեղծ մանրամասներ էիր պատմել: Ինչպե՞ս նա արձագանքեց: Խոսե՞լ եք այդ մասին:

 - Ժպիտով, թեթև խոսակցություն ունեցանք: Զանգեց, ասաց՝ կլինի՞, էլ ինձանից չխոսես: Ասացի՝ դե հարցնում են, որ չխոսեմ, կասեն խուսափում է, ու էլի շատ ենթադրություններով պետք է կյանքս ուտեն, ավելի լավ է պարզ ասեմ, անցնենք առաջ։ Փորձում եմ շրջանցելով պատասխանել, բայց դե ինձ մոտ անկեղծ է ստացվում, կներես:) Ամեն դեպքում  ջղային խոսակցություն չէր:)