Առաջիկա ամիսներին արտաքին հատվածից էական գնաճային ազդեցություններ չեն ակնկալվում

ЭКОНОМИКА 12 Январь, 2017 18:31

Կենտրոնական բանկը շարունակում է ընդլայնողական քաղաքականություն իրականացնել: Վերջին ավելի քան մեկ տարվա ընթացքում, ԿԲ խորհուրդը, 2016 թ. դեկտեմբերի 27–ին, հերթական անգամ որոշել է իջեցնել վերաֆինանսավորման տոկոսադրույքը՝ 0,25%–ային կետով՝ սահմանելով այն 6,25%:

Չնայած այն բանին, որ նոյեմբերին արձանագրվել է 1% գնաճ, 12–ամսյա գնաճի ցուցանիշը շարունակել է բացասական մնալ՝ 0,6% գնանկում: Հենց այդ հանգամանքը և ԿԲ գնահատումներն առ այն, որ առաջիկա ամիսներին գնանկումային միջավայրը դեռ կպահպանվի, հիմնական պատճառն է հանդիսացել վերաֆինանսավորման տոկոսադրույքի իջեցման համար:

Սպասումներն արտաքին հատվածից նույնպես էական փոփոխություններ չեն կրել, քանի որ պահպանվել են համաշխարհային տնտեսության աճի դանդաղ տեմպերը, իսկ միջազգային ապրանքային շուկաներում շարունակել են արձանագրվել գնաճային զարգացումներ:

Ուստի, ըստ ԿԲ խորհրդի, առաջիկա ամիսներին արտաքին հատվածից էական գնաճային ազդեցություններ չեն ակնկալվում: Հնարավոր են միայն որոշ գնաճային ռիսկեր` կապված ԱՄՆ Դաշնային պահուստային համակարգի կողմից տոկոսադրույքի բարձրացման ընթացքի և զարգացող երկրների վրա դրա ազդեցության հետ:

Սակայն, ներքին գործոններով պայմանավորված գնանկումային ռիսկերը գերակշռում են, որը մղում է ԿԲ–ին թուլացնել դրամավարկային պայմանները: Մասնավորապես, չորրորդ եռամսյակի ծրագրով նախանշված որոշ գնանկումային ռիսկեր դառնում են ավելի առարկայական, այդ թվում՝ գնաճային սպասումների նվազումը և փետրվարին ակնկալվող էլեկտրաէներգիայի սակագնի իջեցումը: Անդրադառնալով տնտեսական ակտիվության տեմպի շարունակվող դանդաղմանը, ԿԲ–ն արձանագրել է, որ այն հիմնականում պայմանավորված է առաջարկի գործոններով, մասնավորապես՝ գյուղատնտեսության ճյուղի՝ սպասվածի համեմատ առավել խորը նվազմամբ:

Մյուս կողմից, սակայն, շարունակվում է նաև ներքին պահանջարկի վերականգնումը՝ առավելապես ի հաշիվ 2015–2016 թթ.–ի ընթացքում իրականացված խթանող դրամավարկային և հարկաբյուջետային քաղաքականությունների:

Ամեն դեպքում, ԿԲ խորհուրդը այն կարծիքն է արտահայտել, որ իրականացված դրամավարկային քաղաքականությունը բավարար խթաններ է ձևավորել 2017 թ. գնանկումային միջավայրը հաղթահարելու և կանխատեսվող հորիզոնում գնաճի նպատակի իրագործման համար:

ԿԲ գնահատմամբ, տոկոսադրույքները բավականին նվազել են և ավանդական դրամավարկային քաղաքականության հնարավորությունները ներկայում սահմանափակված են:

Այդուհանդերձ, նկատի ունենալով շարունակվող գնանկումային միջավայրը և պահանջարկի դանդաղ վերականգնումը, հարկ է շարունակել ընդլայնողական քաղաքականություն վարել: Այդ քաղաքականությունը ևս իր նպաստն է բերել արդյունաբերության և ծառայությունների ոլորտում արձանագրվող աճին:

Վերջին ամիսներին փոխարժեքի կայունությունը նույնպես նման քաղաքականությունը շարունակելու հնարավորություն է տալիս: Քանի դեռ փոխարժեքի վրա արտաքին հատվածից ազդեցություններ չկան, իսկ գնաճն էլ բացասական է, անհրաժեշտ է ակտիվ քայլեր ձեռնարկել տնտեսական ակտիվությունը խթանելու ուղղությամբ, որոնցից մեկն էլ վերաֆինանսավորման տոկոսադրույքի պարբերաբար իջեցումն է:

Նորայր Սարգսյան