Եթե ես լինեի Սերժ Սարգսյանը, ապա կֆինանասավորեի «Ո´չ»-ի ճակատը. Ստեփան Դանիելյան

Այսօր տեղի ունեցած Երիտասարդական սոցիալական ֆորումի ընթացքում սահմանադրական փոփոխությունների վերաբերյալ քննարկման ժամանակ ասաց «Համագործակցություն հանուն ժողովրդավարության» կենտրոնի նախագահ Ստեփան Դանիելյանը:

Բանախոսը դա հիմնավորեց այն հանգամանքով, որ «Ո´չ»-ի ճակատ կազմելու ու հաջողության չհասնելու դեպքում լեգիտիմացվելու է սահմանադրական հանրաքվեն: Դանիելյանը նշեց, որ ցանկացած ընտրության ժամանակ լինում է «այո´»-ի ճակատ և «ո´չ»-ի ճակատ, և եթե «ո´չ»-ի ճակատ չլինի, ապա այդ ընտրությունը ոչ լեգիտիմ կհամարվի:

Ըստ նրա ՝ «Ո´չ»-ի ճակատը ցույց է տալիս, որ սահմանադրական փոփոխությունների վերաբերյալ քննարկումներ են եղել, մարդկանց տվել են հեռուստատեսությամբ ելույթ ունենալու հնարավորություն, հանրահավաքներ են եղել և վերջում հաղթել է «այո´»-ի ճակատը: Այս դեպքում, ըստ Դանիելյանի, եթե սահմանադրական փոփոխությունների դեմ դուրս եկած մարդիկ սկսեն փողոցում պայքարել, ապա իշխանությունների համար հեշտ կլինի նրանց միջազգային հանրության աչքում ներկայացնել իբրև պարտված անլուրջ մարդկանց, ովքեր զանգվածային անկարգությունների են դիմում:

Դանիելյանի խոսքով՝ անհրաժեշտ է իշխանությունների առաջ հստակ պայմաններ դնել հանրաքվեին մասնակցելու համար: «Եթե դու պայման ես դնում, օրինակ, որ պետք է ընտրողների ցուցակները հրապարակվեն, հակառակ դեպքում չես մասնակցի հանրաքվեին, ապա միջազգային մամուլը և ողջ հանրութունը հասկանում է, որ դու ոչ թե սահմանադրական փոփոխություններին ես դեմ, ոչ թե հանրաքվեին, այլ պարզապս գիտակցում ես, որ Հայաստանում հանրաքվե չկա, այդ իսկ պատճառով չես մասնակցում դրան»,- ասաց Դանիելյանը: Վերջինիս խոսքով՝ եթե ամեն բան այս սցենարով ընթանա, ապա փողոցում մղվող պայքարը, իշխանությունը չի կարող անկարգություն որակել ու ֆիզիկապես ճնշել:

«Գնդակահարելը մարդկանց, որոնք փողոց են դուրս եկել, դժվար գործ է և դու դրա համար պետք է հիմք ունենաս, դու չես կարող մարդկանց գնդակահարել, որպեսզի ընտրողների ցուցակները չհրապարակես. Դա անհնար բան է. բացառվում է նման պահանջով բազմությանը ճնշելը: Եթե Հայաստանում ընտրական համակարգ գոյություն չունի, և ցուցակներում գրելու են երկրից բացակայող անձանց անունները, Կենտրոնական ընտրական հանձնաժողովը գրելու է այն, ինչ ուզի, ապա ստացվում է մասնակցել մի գործընթացի, որի վրա քո կարծիքը որևէ կերպ ազդել չի կարող:

Կրկնում եմ՝ ես կարծում եմ, որ այս երկրի խնդիրը ընտրակեղծիքն է, և եթե դուք ուզում եք այս երկրում փոփոխոթյուններ լինեն, ապա պետք է հարցը հստակ դրվի, այսինքն՝ ընտրական համակարգի փոփոխություն լինելո՞ւ է, թե՞ ոչ, եթե լինելու է, ապա պետք է նախապես ասել այն կետերը, որոնցում փոփոխություններ անցկացնելու դեպքում միայն պետք է մասնակցել ընտրություններին»,- ասաց Դաիելյանը։

Արաքս Մամուլյան