Ընդհանուր առմամբ, Հայաստանը բավարարված է ՀԱՊԿ-ի զարգացման ընթացքով. Սերժ Սարգսյան

Ընդհանուր առմամբ, Հայաստանը բավարարված է ՀԱՊԿ-ի զարգացման ընթացքով եւ ակտիվ աշխատանք է տարվում Կազմակերպության ուժային բաղկացուցչի ներուժի բարձրացման ուղղությամբ: Այս մասին, այսօր՝ սեպտեմբերի 15-ին, ՀԱՊԿ Հավաքական անվտանգության խորհրդի նստաշրջանից արդյունքներով լրատվամիջոցներին ուղղված իր խոսքում նշել է ՀՀ նախագահ Սերժ Սարգսյանը:

Ստորեւ ներկայացնում են Սերժ Սարգսյանի ելույթը.

«Բարեւ ձեզ, զանգվածային լրատվամիջոցների հարգելի ներկայացուցիչներ,

Մենք հենց նոր ավարտեցինք ՀԱՊԿ Հավաքական անվտանգության խորհրդի հերթական նստաշրջանը, որի ընթացքում քննարկեցինք դեկտեմբերյան նստաշրջանի որոշումների կատարումը եւ նախանշեցինք գալիք տարվա ծրագրերը: Հայաստանը Տաջիկստանի Հանրապետությունից ստացավ ՀԱՊԿ-ում նախագահության հերթափոխը: Օգտվելով առիթից՝ ցանկանում եմ մեկ անգամ եւս շնորհակալություն հայտնել նախագահ Ռահմոնին՝ Կազմակերպությունում արդյունավետ նախագահության համար:

Նիստի արդյունքներով ընդունվել է Հայտարարություն, որում ամրագրված են ՀԱՊԿ ձեւաչափով մեր փոխգործակցության բոլոր հիմնական ուղղություններով կատարված աշխատանքների գնահատականները:

Ընդհանուր առմամբ, մենք բավարարված ենք ՀԱՊԿ-ի զարգացման ընթացքով: Ակտիվ աշխատանք է տարվում Կազմակերպության ուժային բաղկացուցչի ներուժի բարձրացման ուղղությամբ:

Այս տարվա մայիսին Հավաքական անվտանգության խորհրդի որոշմամբ անցկացվեց ՀԱՊԿ արագ արձագանքման հավաքական ուժերի մարտական պատրաստվածության անսպասելի ստուգում: Միջոցառմանը մասնակցեց ՀԱՊԿ անդամ պետությունների արագ արձագանքման հավաքական ուժերի ամբողջ համակազմը՝ ավելի քան 2.5 հազար զինծառայող, անդամ պետությունների օպերատիվ խմբերը եւ ՀԱՊԿ Միացյալ շտաբը: Արագ արձագանքման հավաքական ուժերը ի զորու են ըստ իրենց նշանակության արագ արձագանքել ՀԱՊԿ պատասխանատվության տարածաշրջանում մարտահրավերներին ու սպառնալիքներին եւ պատրաստ են ետ մղել զինված հարձակումը, այդ թվում՝ ՀԱՊԿ անդամ առանձին պետությունների դեմ ուղղված ագրեսիան:

Նստաշրջանի արդյունքներով որոշում է ընդունվել ՀԱՊԿ հավաքական օդային ուժերի՝ Կազմակերպության ուժային բաղկացուցչի կարեւորագույն տարրի վերաբերյալ: Համաձայնագիր է ստորագրվել ռազմական եւ այլ կազմավորումների, դրանց շարժական գույքի, ինչպես նաեւ ռազմական նշանակության արտադրանքի փոխադրման ոլորտում համագործակցության մասին: Որոշում է կայացվել երկարացնել Համաձայնագրի գործողության ժամկետը, որը կանոնակարգում է ՀԱՊԿ անդամ պետությունների երկաթուղային ճանապարհների տեխնիկական ապահովության հարցերը:

Նիստի ընթացքում որոշում է կայացվել ՀԱՊԿ գլխավոր քարտուղարի եւ Միացյալ շտաբի ղեկավարի վերաբերյալ, Կազմակերպության գործունեության այլ կազմակերպչական եւ վարչարարական-ֆինանսական հարցերով, հաստատվել է գալիք տարվա բյուջեն:

Ես ներկայացրել եմ առաջիկա տարում Հայաստանի նախագահության առաջնայնությունները, մասնավորապես՝

- ՀԱՊԿ հավաքական ներուժի մեծացում՝ համաձայն Կազմակերպության օրենսդրության եւ ժառանգորդության սկզբունքի հիման վրա:

- ՀԱՊԿ գործունեության հայեցակարգային հիմքերի եւ ճգնաժամային արձագանքման համակարգի հետագա զարգացում:

- ՀԱՊԿ գործունեության արդյունավետության բարձրացման ինստիտուցիոնալ ասպեկտները, այդ թվում՝ արտաքին քաղաքականության համակարգման կատարելագործման եւ այլ միջազգային կազմակերպությունների հետ համագործակցության զարգացման հարցերը:

- ՀԱՊԿ համակարգի ուժերի ու միջոցների կառավարման համակարգի հետագա կատարելագործում, խաղաղապահ ներուժի մեծացում, ռազմատեխնիկական եւ ռազմատնտեսական համագործակցության խորացում, տարանցման եւ տեղափոխման լոգիստիկ բաղկացուցչի օպտիմալացում:

Մենք մտադիր ենք կենտրոնանալ միջազգային ահաբեկչությանը եւ ծայրահեղականությանը, նեոֆաշիզմի, շովինիզմի եւ այլատյացության այլ ձեւերի դրսեւորումներին համատեղ հակազդման հարցերի վրա: Այս համատեքստում կարեւոր նշանակություն ենք տալիս նաեւ կիբերանվտանգության ոլորտում համատեղ ուժերի ակտիվացմանը:

Համոզված եմ, որ ձեռք բերված պայմանավորվածությունների իրականացումը ծանրակշիռ ներդրում կլինի ՀԱՊԿ պատասխանատվության գոտում անվտանգության եւ կայունության ապահովման գործում»: