Ուզում եմ, որ երգերս իմ մասին պատմեն. Սրբուհի Սարգսյան

Life.panorama.am-ը գրում է.

Երգչուհի Սրբուհի Սարգսյանը, ով հայկական շոու բիզնես մուտք գործեց «X-Factor» նախագծով ու այդուհետ իր հզոր ձայնով գրավեց շատերի ուշադրությունը, վերջերս թողարկել է առաջին անգամ հատուկ իր համար գրված «Եթե կարող ես» երգի հիման վրա նկարահանած տեսահոլովակը: Երգչուհին, ով տարբեր համաշխարհային հիթերի քավրներ էր հնչեցնում, Life.panorama.am-ի հետ զրույցում նշեց, որ մեծ ուրախությամբ է նոր երգը ներկայացրել ու շեշտեց, որ ցանկություն ունի Հայաստանում զարգացնել փոփ ժանրը.

«Արդեն երեքից-չորս տարի է, ինչ համագործակցում եմ Նյու Յորքում բնակվող Լազարոյի եւ Արամ Աբգարյանի հետ, ու նոր աշխատանքս էլ այդ համագործակցության արդյունքն է: Ես, Լազարոն ու Արթուր Ալեքը դեռ էլի մտքեր ունենք, որոնք հույս ունեմ, ապագայում կիրականացնենք. 10-ից ավելի երգեր արդեն գրեթե պատրաստ են»,- նշեց Սրբուկն ու ավելացրեց` երկար են մտածել առաջին երգի ընտրության հարցում.

«Քանի որ բոլորս գիտենք, որ հայկական շոու բիզնես մեծամասամբ մուտք են գործում դանդաղ, հանգիստ երգերով, ուստի մեզ համար շատ կարեւոր էր երգ ընտրությունը. Ես չէի ուզում, որ տխուր երգով ներկայանայի, ուզում էի երգս լիներ ակտիվ, դրական ու գունավոր: Երբ երաժշտությունը պատրաստ էր, Գրիգոր Կոկչյանին խնդրեցի, որ խոսքերը գրելիս հեռու լինի սրտաճմլիկ բովանդակությունից. Իսկզբանե ուզում էի երգել մի աղջկա մասին, ով սիրում է չափից շատ սիրել: Ի դեպ` ուզում եմ, որ երգերս իմ մասին պատմեն, այս երգն էլ իր տեսակով նման է ինձ, իսկ մոտ ապագայում կթողարկեմ հաջորդ երգը, որն արդեն իմ կյանքի պատմությունը կներկայացնի»,- նշեց նա:

Ի դեպ` Սրբուհին նկատեց, որ հատուկ է որոշել հայերեն երգել.

«Իհարկե, բոլորս գիտենք, որ այս ժանրին ավելի համահունչ է անգլերենը, սակայն ես ունեմ որոշում. ուզում եմ, որ իմ լուման ներդնեմ մեր երկրում փոփ ժանրի զարգացման գործում, բացի այս` ես աշխատում եմ հայ հանդիսատեսի համար: Համոզված եմ, եթե երգը լիներ հայերեն, առավել լավ կլսվեր, քանի որ այս ժանրը առավել համահունչ է անգլերենին, սակայն որակյալ երաժշտությունը մեր երկրում զարգացնելու համար պետք է փոփ ժանրի հայերեն երգեր շատ թողարկել»,- ընդգծեց երգչուհին:

«Եթե կարող ես» տեսահոլովակի ռեժիսորը Արամայիս Հայրապետյանն է, օպերատորը` Սուրեն Թադեւոսյանը.

«Տեսահոլովակում շեշտը դրված է գույների ու իրարից տարբերվող երեք կերպարների վրա: Նշեմ, որ իմ ոճով զբաղվել է Ալբերտ Գրիգորյանը: Նա առանձնացրեց երեք կերպարներ, որոնցից կոստյումով լուքը կարծես թե հենց ինձ բնորոշեր, իսկ մյուս երկու կերպարները, որոնք ինձ համար շատ հետաքրքիր էին, փորձեցի  իրականություն դարձնել Ալբերտի եւ Արամայիսի օգնությամբ»,- նշեց նա:

Ի դեպ` մեզ հետ զրույցում երգչուհին պատմեց նաեւ, որ «Եթե կարող ես» երգի միքս-մաստերինգն իրականացրել է  հանրահայտ գործիքավորող Քրիս Գեհրինգերը, ով աշխատել է Ռիհաննայի, Լեդի Գագայի, Սիայի եւ այլ համաշխարհային ճանաչում ունեցող երգիչների հետ.

«Լազարոն որոշեց, որ այս երգս պետք է ցույց տա Քրիս Գեհրինգերին, ում ուղղակի հանդիպելու համար մեկ, երկու ամիս առաջ պետք է հերթագրվել: Ի ուրախություն ինձ, երբ Լազզարոն հանդիպել է նրան, վերջինս շատ է հավանել երգս, այլապես իր անխախտ սկզբունքին համաձայն` չէր զբաղվի իմ երգով: Նա անգամ ցանկացել է, որ ապագայում եւս համագործակցենք, ցանկություն է հայտնել ապագայում տեսնել ինձ: Մեծ հույս ունեմ, որ ինձ բախտ կվիճակվի նման տաղանդավոր մասնագետի հետ կրկին աշխատել, թեեւ արդեն մեծ հպարտություն է նրա համակրանքին արժանանալը»,- պատմեց Սրբուհի Սարգսյանը:

Սրբուկի սպասված մեծ ակումբային համերգը կայացավ բոլորովին վերջերս, մոտ ապագայում երգչուհին կրկին նախատեսում է նոր համերգներ, իսկ ավելի ուշ, նրա խոսքով, կզբաղվի հաջորդ հեղինակային երգով: