Սահմանին լարվածություն ստեղծելն ադրբեջանական բլեֆ է, իսկ «Շանթ» զորավարժությունների նպատակը ոչ թե ժողովրդին պատերազմին պատրաստելը, այլ պատերազմը կանխելն էր. Կոմանդոս

Արցախյան ազատամարտի հերոս Արկադի Տեր- Թադևոսյանը՝ Կոմանդոսը, տարվա ընթացքում մի քանի անգամ Ադրբեջանի կողմից սահմանում լարված իրավիճակ ստեղծելը համարում է Ադրբեջանի կողմից ծրագրված բլեֆ:

«Սահմանին լարված իրավիճակի ստեղծումը Ադրբեջանի բլեֆն է, որը միակ միջոցն է՝ ցույց տալու, որ, իբր, իրենք ունեն մարտունակ բանակ, որ ուժեղ են, որ Ադրբեջանն է որոշողը»,- Past.am-ի հետ զրույցում ասաց Կոմանդոսը՝ կարծիք հայտնելով, որ Ադրբեջանի զինվորական կազմն իրականում պատրաստ չէ լուրջ գործողությունների: Նա հիշեցրեց, որ այս օրերին Ադրբեջանում լայնամասշտաբ զորավարժություններ անցկացնելու համար այնտեղ են հրավիրվել մասնագետներ Թուրքիայից և Իսրայելից:

«Նրանց 95%-ը Թուրքիայից է, 5%-ն էլ՝ Իսրայելից»,- ասաց Արկադի Տեր- Թադևոսյանը՝ միևնույն ժամանակ հիշեցնելով, որ չնայած Ադրբեջանի գործողությունների պատճառով հայկական կողմը զոհեր տալիս է, բայց նրանց կրած կորուստները մշտապես անհամեմատ ավելի շատ են լինում:

«Պետք է նկատել, որ նրանք ունեն հատուկ ջոկատներ, որոնք էլ սահմանի ուղղությամբ որոշակի գործողություններ են կատարում մեր սահմանը պահող հասարակ զինվորների դեմ, որոնք իրենց մարտական պատրաստականության շնորհիվ կարողանում են հակազդել: Ստացվում է, որ մեր հասարակ զինվորը հրաշալի կերպով հակազդում է Ադրբեջանի հատուկ ջոկատայիններին և հաճախ ոչ միայն հակազդում է, այլև մեծաթիվ զոհեր պատճառում ադրբեջանական կողմին»,- ասաց Կոմանդոսը։

Արկադի Տեր Թադևոսյանը նշեց նաև, որ ինքն ամռանը Հայաստանի շուրջ 80 երիտասարդի հետ եղել է Արցախում, այցելել է տարբեր զորամասեր և նրան ոգևորել է իր այցելած վայրերում գտնվող երիտասարդների և զինվորների՝ հայրենիքը պաշտպանելու պատրաստակամությունը:

«Զինվորների մարտական ոգին շատ բարձր է , բայց հերոսաբար իրենց հայրենիքը պաշտպանելու հետ մեկտեղ մեր զինվորները չեն կորցնում նաև զգոնությունն ու միշտ զգուշավոր են, այնպես որ, մի՛ անհանգստացեք, պատերազմ չի լինի»,- ասաց Արկադի Տեր- Թադևոսյանը:

Անդրադառնալով Հայաստանում «Շանթ-2015» զորավարժությունների վերաբերյալ տարածված տեսակետին, թե այդ զորավարժությունները Հայատանում անցկացվեցին՝ հայ ժողովրդին պատերազմին պատրաստելու համար, Կոմանդոսը հերքեց այդ տեսակետը:

«Պատերազմի հավանականություն միշտ էլ կա, բայց մենք՝ բոլորս, խաղաղություն ենք ուզում, իսկ եթե դու խաղաղություն ես ուզում, ուրեմն պետք է պատրաստվես պատերազմի, այսինքն՝ զորվարժություններն անցկացվում են ոչ թե ժողովրդին պատերազմի պատրաստելու համար, այլ պատերազմը կանխելու համար, քանի որ եթե դու լավ ես պատրաստ լինում կռվին, այն չի լինում»,- ասաց Կոմանդոսը:

Արաքս Մամուլյան