Life.panorama.am-ը գրում է.
Դերասան Դավիթ Հակոբյանն այս շրջանում նկարահանվում է Շանթ հեռուստաընկերության «Փոխնակ մայրը» հեռուստասերիալում: Life.panorama.am-ի հետ զրույցում Դավիթը պատմել է ոչ միայն նոր կերպարից, այլեւ հայրիկի կարգավիճակից:
«Կերպարս իր մասնագիտության մեջ կայացած տղա է, բավականին պարկեշտ անձնավորություն է, սակայն մի թուլություն ունի` խոսքը աղջիկների մասին է. նա ոչ մի կերպ չի կարողանում աղջիկներին ու նրանց հետ կապված հարաբերություններին լուրջ վերաբերվել, երբեք չի մտածում ընտանիք կազմելու մասին»,- նշեց դերասանն ու հարցին, թե որքանո՞վ է հեշտ նոր կերպարի մարմնավորումը, պատասխանեց.
«Առհասարակ` ոչ մի կերպար հեշտ չէ խաղալ, առավել եւս դժվար է կերպար կերտել սերիալում, քանի որ դերասանը չգիտի, թե սցենարիստը հաջորդ սերիայում ի՞նչ է պատրաստել հերոսիդ համար: Կարծում եմ` սերիալում բավականին բարդ է կերպար կերտելը, դրա համար շատ լավ կլիներ, որպեսզի մեր երկրի սերիալային ինդուստրիայում այդ հարցը շտկվեր ու նախապես սցենարը գրվեր: Ինչեւէ, ամեն դեպքում դերասանն իր հմտությունների շնորհիվ կարողանում է հասնել նրան, որ սիրվում ու ընդունվում է հեռուստադիտողի կողմից, ուրախ եմ, որ որոշ թերացումները հեռուստադիտողը կարողանում է ներել»:
Անդրադառնալով «Փոխնակ մայրը» հեռուստասերիալի բովանդակությանը, Դավիթ Հակոբյանը պատմեց, որ ուրախ է նման լուրջ ու կարեւոր թեմա շոշափող աշխատանքում ներգրավվածություն ունենալու համար.
«Իսկապես շատ լուրջ, կարեւոր ու մեր օրերում արդիական թեմա է ընկած մեր հեռուստասերիալի բովանդակության հիմքում: Ցավոք, վերջին տարիներին հատկապես աշխարհի շատ զույգեր դժավարանում են երեխա ունենալ ու երբեմն փոխնակ մայր գտնելն ու թեկուզեւ այդ ճանապարհով երեխա ունենալը ընտանիքների համար իսկական փրկություն է դառնում: Համոզված եմ, որ Հայաստանում շատերը նման միջոցով երեխա ունենալու մասին չգիտեն ու այս հեռուստասերիալը կարող է ճանաչողական լինել: Փոխնակ մայրը կյանքում կարող է լինել լավագույն ելքը, քանի որ կարեւորը երախայի կյանքն է` նրա գոյությունը»,- նշեց նա:
Դավիթ Հակոբյանն այս շրջանում թատրոններից եւ ոչ մեկում չի աշխատում, սակայն նրա խոսքով` առաջիկայում թատրոնում որպես մշտական աշխատակից դառնալը կարեւոր նպատակ է.
«Թեեւ առանձին ներկայացումներում մասնակցություն ունենում եմ, սակայն շատ եմ ուզում, որ թատրոնի մշտական աշխատակից դառնամ, քանի որ ինձ համար ֆիլմերից ու յուրաքանչյուր նկարահանումներից առավել հետաքրքիր ու սիրելի է բեմը: Հուսամ առաջիկայում կկատարվի այդ կարեւոր ցանկությունս, ես շատ արագ կլուծեմ այդ հարցը»,- ժպիտով հավելեց նա:
Անդրադառնալով իր նոր` հայրիկի կարգավիճակին, Դավիթը պատմեց զգացողություններից.
«Սա անպատմելի ապրումներ են, ես հայր եմ ու դրանով ասված է ամեն բան: Մեր կյանքը Էդուարդի ծնունդից հետո գլխիվայր փոխվել է` ամեն բան ավելի գունավոր ու ջերմ է դարձել, վերացել է էգոիզմը, ինչը մինչ ընտանիք կազմելը յուրաքանչյուր երիտասարդի մեջ կա: Հիմա կարծես թե հաշվետու լինեմ երեխայիս, կարծես թե առաջինն իր համար եմ ապրում: Ինքս թեեւ շատ եմ աշխատում, բայց ընդհանուր առմամբ օրվա մի մասը պարտադիր նվիրում եմ ընտանիքիս, իմ հրաշալի փոքրիկին: Մենք հաճախ զբոսնում ենք մեր սիրելի Կասկադով, երբեմն նաեւ Թումանյանի այգով, մենք սիրում ենք ընտանիքով միասին լինել. Կարծում եմ` որքան էլ ծնողները զբաղված լինեն, պետք է պարտադիր երեխային սեր ու ջերմություն նվիրեն, քանի որ մանկուց ստացած ուշադրությունն ու խնամքը մարդու վրա ազդեցություն է ունենում ողջ կյանքի համար` ձեւավորելով նրա տեսակն ու հոգեկան աշխարհը»:
Պատմելով 4.5 ամսական որդուց` Դավիթը նկատեց.
«Ինքս ուզում եմ ինձ նմանացնեմ որդուս ու ասեմ, որ աչքերի գույնով իսկապես նման է, բայց եթե շատ անկեղծ լինեմ, ապա պետք է նշեմ, որ Էդուարդը եւ ինձ, եւ մայրիկին, եւ հորեղբորը, եւ քեռիին է նման: Հիմա նա դեռ շատ փափլիկ չաղո է, կարծում եմ, երբ մի փոքր մեծանա ու նիհարի, ավելի պարզ կլինի դիմագծերն ու հետեւաբար կհասկանանք, թե ում է ավելի նման»:
