Երկար եմ սպասել այս օրվան ու հիմա անսահման երջանիկ եմ. Արթուր Աբրահամ

Aysor.am-ը գրում է.

Հայազգի բռնցքամարտիկ Արթուր Աբրահամի անձնական կյանքը միշտ էլ եղել ու մնում է հանրության ուշադրության կենտրոնում: Նախորդ տարի ամուսնացած չեմպիոնն օրերս վայելեց հայրության բերկրանքը. սեպտեմբերի 25-ին Գերմանիայում լույս աշխարհ եկավ Գրիգոր Ավետիքի Աբրահամյանը` Արթուր Աբրահամի (Ավետիք Գրիգորի Աբրահամյան) որդին:

«Ես երկար եմ սպասել այս օրվան ու հիմա անսահման երջանիկ եմ: Հիանալի զգացողություն է, որը չես կարող խոսքերով բացատրել, նկարագրել: Ե՛վ տղաս, և՛ կինս իրենց շատ լավ են զգում»,-Aysor.am-ի հետ զրույցում իր ուրախությամբ կիսվեց նորաթուխ հայրիկը:

Դիտարկմանը, որ սովորաբար դրսում փոքրիկներին երկու անուններով են կնքում, մեր զրուցակիցը պատասխանեց.

«Որդուս անունը Գրիգոր է, ու նա հայրիկիս անվանակիրն է: Կարիք չկա երկրորդ անուն դնելու: Ես հպարտ եմ, որ տղաս կրում է հայրիկիս անունը»:

Հայաստանում շատերը, սնահավատությունից ելնելով, մինչ երեխայի ծնվելը ոչինչ չեն գնում նրա համար: Արթուր Աբրահամի ընտանիքում նման մոտեցում չկա. փոքրիկն ի սկզբանե ամեն ինչ ուներ, ծնողները նախապես մանրակրկիտ պատրաստվել էին:

Թեև ծնողները միշտ էլ ասում են՝ երեխայի սեռը կարևոր չէ, բայց, միևնույն է, հատկապես առաջնեկի դեպքում յուրաքանչյուրն իր սրտում այս կամ այն սեռի երեխայի փափագ է ունենում:

«Գիտեք, բոլոր երեխաներն էլ սիրելի են` լինեն աղջիկ, թե տղա: Բայց չեմ ժխտի՝ երազանքս 3 որդի ունենալն է: Այնպես որ, երեք որդով հաստատ սեղան կնստեմ և գուցե ավելին»,- ժպիտով խոստովանեց նա:

Փոքրիկ Գրիգորի մկրտության հարցում ծնողները դեռ չեն շտապում:

«Դեռ չեմ մտածել մկրտելու մասին, վստահ եմ` մի օր հաստատ կմտածեմ»,- ընդգծեց Ա. Աբրահամը:

Հարցին, թե երեխայի խնամքի հարցում ո՞վ է օգելու նորաթուխ մայրիկին, տատիկներն այնտե՞ղ են, թե՞ դայակի օգնությանը կդիմեն, չեմպիոն հայրիկը նկատեց.

«Երեխայի խնամքի հարցում պատասխանատու է մայրիկը: Մայրիկից լավ երեխային ոչ ոք չի կարող խնամել»:

Արթուր Աբրահամը դեռ չգիտի՝ ե՞րբ հայրենիք կայցելի որդու՝ Գրիգոր Աբրահամյանի հետ, բայց այդ օրն էլ կգա:

Aysor.am-ը շնորհավորում է երջանիկ ծնողներին և անհոգ ու ուրախ մանկություն մաղթում փոքրիկ Գրիգորին: